DAŞQININ QARŞISININ ALINMASI MƏQSƏDİ İLƏ GÖRÜLƏN TƏDBİRLƏR SƏMƏRƏ VERİR
Bakı, 26 may (AZƏRTAC). Kür boyu ərazilərdə daşqın suları basmış rayonlarda Prezident İlham Əliyevin göstərişlərinə uyğun olaraq kompleks işlər davam etdirilir.
İmişli, Saatlı, Sabirabad rayonlarını əhatə edən Sarısı gölü ətrafında bəndbərkitmə və bərpa işləri davam etdirilir. Mayın 24-25-də Sarısu gölündə bəndin yuyulması nəticəsində Sabirabad rayonunun Qasımbəyli, Muradbəyli, Əsgərbəyli, Yuxarı Axtaçı kəndlərində təhlükə yaranmışdır. Saatlı rayonunun Novruzlu, Dəllər, Nərimankənd və Musalı kəndləri də təhlükə ilə üz-üzə qalmışdır. Bu kəndlərin əhalisi köçürülmüşdür.
Bəndbərkitmə və bərpa işləri Hacıqabul rayonunun Meyniman kəndində də davam etdirilir. Selin Şirvan şəhəri istiqamətində axmasının qaşısını almaq məqsədi ilə qabaqlayıcı tədbirlər həyata keçirilir, bəndbərkitmə işləri görülür və kanallar qazılır. İşə Fövqəladə Hallar Nazirliyi və Daxili Qoşunların şəxsi heyəti və kənd sakinləri cəlb olunmuşdur.
İmişli rayonunda vəziyyət sabitdir. Araz çayının tarixi qolunun bərpası istiqamətində işlər sürətləndirilmişdir. Tarixi qolun bərpası həm Araz çayında suyun səviyyəsinin azalmasına, həm də İmişli və Biləsuvar rayonlarının əkin sahələrinin suvarma suyu ilə tam təmin edilməsinə xidmət edəcəkdir. Çayın yeni 130 kilometrlik qolu Azərbaycanın 7 rayonunun ərazisindən keçəcəkdir.
Bölmənin digər xəbərləri
