Daxili İşlər Nazirliyinin Baş Cinayət Axtarışı, Mütəşəkkil Cinayətkarlıqla Mübarizə İdarələrinin, Gəncə şəhər polisinin, Baş Prokurorluğun Ağır Cinayətlərə Dair İşlər üzrə İstintaq İdarəsi ilə birgə həyata keçirdikləri tədbirlər 2001-2004-cü illər ərzində Azərbaycanda və Rusiya Federasiyasının ərazisində törədilmiş bir sıra ağır və xüsusilə ağır cinayətlərin üstünün açılması, həmin əməlləri törədənlərdən 13 nəfərin həbs olunması ilə nəticələnmişdir.

Yüksək peşəkarlıqla həyata keçirilmiş əməliyyat-axtarış tədbirləri və istintaq hərəkətləri nəticəsində müəyyən edilmişdir ki, Kəlbəcər rayon sakini, Gəncənin Gülüstan qəsəbəsində müvəqqəti məskunlaşmış Pərviz Məmmədov, Gəncə şəhər sakinləri İmran və Müşfiq Cənnətov, Vasif və Xəqani Namazov qardaşları, Rauf Qasımov, Ceyhun Qurbanov, Elnur Quliyev, Anar Kərimov, Zaur Məmmədov, Sadiq Əliyev, Anar Qarayev, Zamiq İbrahimov, Kəlbəcər rayonunda anadan olmuş, hazırda Rusiya Federasiyasının Sankt-Peterburq şəhərində yaşayan Aftandil Şükürov və digərləri mütəşəkkil cinayətkar dəstə yaradaraq odlu və soyuq silahlar tətbiq etməklə bir sıra qətllər və digər ağır cinayətlər törətmişlər.

Onlardan Pərviz Məmmədov, İmran Cənnətov və Rauf Qasımov, habelə cinayətkar dəstəyə cəlb edilmiş Gəncə şəhər sakini Anar Həsənov 2001-ci il martın 21-də Azərbaycan Kənd Təsərrüfatı Akademiyasının dosenti, Xankişi Ələsgərovun evinə quldurcasına basqın etmiş, onu və ruhi xəstə olan oğlu Yaşarı çoxsaylı bıçaq zərbələri ilə qətlə yetirərək şəxsi əmlakını talamışlar.

2002-ci il noyabrın 13-də Pərviz Məmmədov, Ceyhun Qurbanov, İmran və Müşfiq Cənnətovlar Buzovna qəsəbəsindəki bağ evlərindən birinə də basqın etmiş və orada olan Azərbaycan Dövlət Neft Şirkətinin Dənizdə Neft və Qazçıxarma İstehsalat Birliyinin Maddi-Texniki Təchizat İdarəsinin şöbə müdiri Vaqif Qədimovu və Qıztamam Qurbanovanı çoxsaylı bıçaq zərbələri ilə qətlə yetirmişlər. Cinayətin iştirakçıları Qədimovun evindən 41.500 ABŞ dolları və külli miqdarda qızıl-bəzək əşyalarını talayıb aparmışlar.

2003-cü il iyunun 18-də Pərviz Məmmədov, Elnur Quliyev, Anar Kərimov və Zaur Məmmədov Gəncənin Gülüstan qəsəbəsində yaşayan Sevinc Məmmədovanın mənzilinə quldurcasına basqın edərək onu, eləcə də azyaşlı uşaqları Rufan və Ayseli odlu silahla qətlə yetirmiş, külli miqdarda şəxsi əmlakını, o cümlədən qızıl-bəzək əşyalarını və 9.500 ABŞ dollarını talamışlar.

Bundan sonra cinayətkar dəstənin üzvlərindən bəziləri Moskva şəhərinə getmiş və orada bir neçə ağır cinayət hadisəsi törətmişlər. Müəyyən edilmişdir ki, 2003-cü ilin iyul ayında Pərviz Məmmədov, Anar Kərimov, Vasif Namazov və Sadiq Əliyev birgə taladıqları əmlakın bir hissəsini xəlvəti mənimsəmiş cinayətkar dəstənin üzvü Ceyhun Qurbanovu cəzalandırmaq məqsədi ilə, onu Moskva şəhəri yaxınlığındakı “Yeqorovsk” adlanan ərazidə bıçaqla qətlə yetirib meyitini yandırmışlar.

Getdikcə azğınlaşan cinayətkar dəstə, ədavətli olduqları Gəncə sakini, Moskva şəhərində yaşayan Elçin Quliyevi də öldürmək qərarına gəlmişdir. Bu məqsədlə Vasif və Xəqani Namazov qardaşları, Anar Kərimov, Pərviz Məmmədov və Sadiq Əliyev ötən il iyul ayının sonlarında Elçin Quliyevi aldadıb Moskva ətrafındakı meşəliyə aparmış və “TT” markalı tapançadan atəş açıb onu öldürmüşlər. Bir gün sonra isə həmin hadisədən xəbərdar olmuş Elçin Quliyevin həmyerlisi, Moskvada yaşayan Fərid Məmmədov da onlar tərəfindən bıçaqla qətlə yetirilmişdir.

2004-cü ilin yazında Pərviz Məmmədov, Vasif Namazov, Aftandil Şükürov, habelə şəxsiyyətləri hələlik istintaqa məlum olmayan başqaları Rusiya Federasiyasının Samara şəhərində Drozdov soyadlı bir nəfərin şəxsi əmlakını ələ keçirmək məqsədi ilə evinə quldurcasına basqın edib onu və hadisə yerində olan qonağını qətlə yetirmişlər.

Cinayətkar dəstənin üzvlərindən Vasif Namazov və Rauf Qasımov Rusiya Federasiyasının ərazisində törətdikləri digər cinayətlərə görə həmin ölkənin hüquq mühafizə orqanları tərəfindən həbs olunmuşlar.

Aparılmış əməliyyat-istintaq tədbirləri nəticəsində cinayətkar dəstənin digər üzvləri Pərviz Məmmədov, Müşfiq Cənnətov, Elnur Quliyev, Anar Kərimov, Zaur Məmmədov, Aftandil Şükürov, Anar Qarayev, Anar Həsənov, Zamiq İbrahimov, Kəlbəcər rayon sakini İlqar Bağırov, həmçinin qanunsuz döyüş sursatı saxladığına görə Anar Qarayevin atası Rafael Qarayev həbs olunmuşlar.

İstintaq zamanı cinayətkarlardan 2 ədəd “Makarov” tipli tapança, xeyli sayda patron, habelə zərərçəkənlərə məxsus qızıl-bəzək əşyaları, videokamera və sairə müəyyən edilərək maddi sübut kimi götürülmüşdür.

Göstərilən cinayət faktları üzrə istintaq-əməliyyat tədbirləri davam etdirilir. Cinayətkar dəstənin digər üzvlərinin, onların cinayətdə istifadə etdikləri alət və vasitələrin, zərər çəkmiş şəxslərin talanmış əmlakının müəyyən edilməsi məqsədi ilə əlavə tədbirlər görülür.

Qeyd olunanlarla yanaşı, əvvəllər törədilmiş daha bir ağır cinayətin üstü də Daxili İşlər Nazirliyinin Baş Cinayət Axtarışı, Mütəşəkkil Cinayətkarlıqla Mübarizə İdarələri və respublika Baş Prokurorluğu tərəfindən açılmışdır. Aparılmış əməliyyat-istintaq tədbirləri nəticəsində 1996-cı il aprelin 12-də metronun Gənclik stansiyasının yaxınlığından Gürcüstanın Bolnisi rayonunda anadan olmuş Pərviz Ələmdar oğlu Xasıyevin oğurlanması və 18 gün saxlanıldıqdan sonra ailəsindən 160 min ABŞ dolları və qızıl zinət əşyaları alınaraq buraxılması faktı aşkar edilmişdir.

Həyata keçirilmiş tədbirlərlə bu cinayətin iştirakçılarından biri – quldurluq, xuliqanlıq və qanunsuz olaraq odlu silah saxlama cinayətlərinə görə 6 il müddətinə azadlıqdan məhrum edilmiş, hazırda İslah Əmək Müəssisəsində cəza çəkən Gürcüstanın Bolnisi rayon sakini Bəylər Allahverdiyev müəyyən edilmişdir. Onun 1995-ci ildə Gürcüstandan gətirib Bakının Əhmədli qəsəbəsində yaşayan yaxın qohumu Əhliman Qacarova 355 ABŞ dollarına satdığı “Makarov” tipli tapança sonuncunun evindən götürülmüş və haqqında həbs qətimkan tədbiri seçilmişdir.

Cinayətkar dəstənin digər iştirakçıları - Gürcüstanın Bolnisi rayonunda anadan olmuş Şahbaz Eminov, İmran Ömərov, onun oğulları Hümbət və Nağmat da həbs olunmuş, çoxsaylı ağır cinayətlər törətmiş digər oğlu Muğdat isə axtarışa elan edilmişdir. Axtarış zamanı onların evindən tapılmış maddi sübutlar – qızıl zinət əşyaları zərərçəkənlər tərəfindən tanınmışdır. Cinayətkar dəstənin bütün üzvlərinin tapılıb tutulması üçün intensiv əməliyyat-axtarış tədbirləri davam etdirilir.

Azərbaycan Respublikası Daxili İşlər Nazirliyinin Mütəşəkkil Cinayətkarlıqla Mübarizə İdarəsi tərəfindən narkotiklərin və saxta pulların qanunsuz dövriyyəsinə, habelə insanların həyat və sağlamlığı əleyhinə olan cinayətlərə qarşı mübarizə sahəsində də bir sıra əhəmiyyətli işlər görülmüşdür.

Uğurlu əməliyyat-axtarış tədbirləri nəticəsində bu ilin iyun ayında Bakı şəhər sakinləri Habil Vəliyev və Saməddin Məmmədov İran İslam Respublikasından qaçaqmalçılıq yolu ilə gətirdikləri 500 qramdan çox, Sumqayıt şəhər sakini Azər Axundov isə 110 qrama yaxın heroini satarkən yaxalanmışlar.

Bundan başqa Mütəşəkkil Cinayətkarlıqla Mübarizə İdarəsi tərəfindən aparılmış xüsusi əməliyyat tədbirləri nəticəsində son 3 ay ərzində qanunsuz dövriyyədən 220 min ABŞ dolları məbləğində 100 nominallı saxta valyuta çıxarılmışdır. Belə ki, cari ilin aprel ayında İran İslam Respublikasının vətəndaşları Vəli Mirzai və Taher Moştaq Naxçıvan şəhərində 170 min ABŞ dollarını, iyun ayında isə Rusiya Federasiyası Dağıstan Respublikasının Xasavyurt şəhərinin sakini Orusxan Adalxanov Bakı şəhərində 50 min ABŞ dolları məbləğində saxta əskinazları satarkən tutulmuşlar.

Bu ilin iyun ayında idarənin həyata keçirdiyi daha bir uğurlu tədbir ilə paytaxtın Nərimanov rayonu ərazisində qanunsuz fəaliyyət göstərən sexdə Türkiyə Respublikasının və Rusiya Federasiyasının dövlət əmtəə nişanları əks olunmuş, istehlak standartlarına cavab verməyən və hər birinin tutumu 750 qram olan 826 qutu “Salina” və “Ekstra” duzu aşkar edilmişdir. Həmçinin, Masazır gölündən yığılmış 11,2 ton, İran istehsalı adı altında xammal şəklində 10 tondan artıq, Naxçıvandan gətirilmiş 220 kisə, Ukrayna və Rusiya istehsalı olduğu göstərilən 8 min 400 qutu belə qida məhsulu, habelə qablaşdırılması üçün hazır şəkildə saxlanılmış 19 min ədəd boş qutu müsadirə olunmuşdur.

Nazirliyin Narkotiklərlə Mübarizə İdarəsi tərəfindən görülmüş əməliyyat tədbirləri ilə bu ilin may ayında Lənkəran şəhərində külli miqdarda psixotrop maddələr və güclü təsirə malik ekstazi, həmçinin 1 kiloqramdan çox narkotik vasitə olan həşiş satarkən İran İslam Respublikasının vətəndaşı Məhəmməd Axundi yaxalanmışdır.

Göstərilən faktlar üzrə cinayət işləri başlanılmış, araşdırmalar aparılır.

Azərbaycan Respublikasının Daxili İşlər Nazirliyi və onun yerli orqanları, Baş Prokurorluq və ona tabe olan strukturlar tərəfindən cinayətlərin qarşısının alınması, açılması, ictimai təhlükəsizliyin və ictimai qaydanın təmini sahəsində aparılan işlər qətiyyətlə davam etdiriləcək, dövlətin və vətəndaşların qanuni mənafelərinin hüquqazidd əməllərdən qorunması üçün bundan sonra da ən təsirli tədbirlər görüləcəkdir.

29 iyun 2004-cü il