“Dayanıqlı inkişaf və gənclər: yeni imkanlar və çağırışlar” mövzusunda beynəlxalq onlayn konfrans keçirilib
Bakı, 11 iyul, AZƏRTAC
Gənclər və İdman Nazirliyinin təşkilatçılığı ilə 11 iyul - Dünya Əhali Gününə həsr olunmuş “Dayanıqlı inkişaf və gənclər: yeni imkanlar və çağırışlar” mövzusunda beynəlxalq onlayn konfrans keçirilib.
Nazirliyin mətbuat xidmətindən AZƏRTAC-a bildiriblər ki, gənclərin dayanıqlı inkişaf məqsədlərini necə başa düşmələri və bunun onlar üçün hansı məna daşımasına dair müzakirələr aparıldığı konfransdakı çıxışlarda 2020-ci il üçün BMT-nin Dayanıqlı İnkişaf Məqsədləri (DİM) İndeksində Azərbaycanın 166 ölkə arasında 54-cü yeri tutaraq Cənubi Qafqaz regionunda lider olduğu və MDB-nin bir ölkələrini geridə qoyduğu diqqətə çatdırılıb.
Qeyd olunub ki, Dayanıqlı İnkişaf Məqsədlərinə inteqrasiya üçün ümumilikdə 17 məqsəd, 169 hədəf və 244 göstəricidən Azərbaycan üçün 17 məqsəd, 88 hədəf, 119 göstərici seçilib. Dayanıqlı İnkişaf Məqsədləri 2030-cu ilə qədər müəyyən edildiyinə görə, onların reallaşdırılması istiqamətində əldə edilmiş nəticələrdən və nailiyyətlərdən məhz bu günün gəncləri faydalanacaq. Buna görə də gənclərin DİM-lər, eləcə də bu məqsədlərin reallaşmasına necə yardım edə biləcəkləri, eləcə də ideyalarının və səslərinin beynəlxalq miqyasda necə eşidilə biləcəyi barədə məlumatlandırılmaları çox vacibdir.
Vurğulanıb ki, Azərbaycan Prezidenti İlham Əliyevin 2014-cü il 8 iyul tarixli Fərmanı ilə Azərbaycan Respublikası Hökuməti ilə Birləşmiş Millətlər Təşkilatının İnkişaf Proqramı arasında qlobal siyasi müzakirələrdə gənclərin fəal iştirakını dəstəkləmək üçün yeni platformaların yaradılması haqqında layihə sənədi təsdiqlənib. Layihənin əsas fəaliyyət istiqamətləri - Azərbaycanda BMT Modelinin institutlaşdırılması və Bakıda Gənclər Siyasəti üzrə Birinci Qlobal Forumun təşkili olub. Layihənin üç il ərzində uğurlu icrasını nəzərə alaraq Gənclər və İdman Nazirliyi və BMT İnkişaf Proqramı layihənin davam etdirilməsi barədə razılığa gəliblər. Hazırda layihənin əsas istiqamətlərindən biri - Dayanıqlı İnkişaf Məqsədlərinin təbliği, DİM-lər üzrə gənc səfirlərin seçilməsi və könüllü milli hesabatların hazırlanmasında gənclərin iştirakıdır. Məhz bu məqsədlə seçilmiş 17 gənc səfirin əsas məqsədi Dayanıqlı İnkişaf Məqsədlərini Azərbaycanda təbliğ etmək, DİM-lərə nail olmaqda gənclərin iştirakını təşviq etmək, bu sahə üzrə fəaliyyət göstərən dövlət qurumlarına tam könüllü formada dəstək göstərmək, yerli, milli və beynəlxalq səviyyədə atılan addımlar barədə cəmiyyətin məlumatlandırılmasına, milli hesabatların hazırlanmasına töhfə vermək və ölkədə DİM-lərlə əlaqəli həyata keçirilən təşəbbüslərdə fəal iştirak etməkdir. Həmin 17 səfir 2018-ci ildə keçirilmiş Dayanıqlı İnkişafa dair Bakı Forumunda təqdim olunub.
Konfransda məlumat verilib ki, Gənclər və İdman Nazirliyinin təşkilatçılığı ilə ötən ilin may-iyun aylarında respublikanın 10 şəhər və rayonunda "Dayanıqlı inkişaf məqsədləri və insan hüquqları" mövzusunda təlim kursları keçirilib. Təlim prosesində iştirakçılara 3 istiqamət - sosial, iqtisadi, ekoloji hüquqlar və DİM-lər haqqında ətraflı məlumat verilib, yeni biliklər öyrədilib. Bununla yanaşı, qeyd edilib ki, Gənclər və İdman Nazirliyi ilə Azərbaycan Respublikasının Prezidenti yanında Dövlət İdarəçilik Akademiyası arasında 2018-ci il dekabrın 13-də imzalanmış Əməkdaşlıq Memorandumu əsasında Akademiyada Davamlı İnkişaf üzrə Gənclərin Tədqiqat və Təlim Mərkəzi yaradılıb. 2018-ci ilin oktyabrında keçirilən və 5 mindən çox gənci əhatə edən Azərbaycan Gənclərinin VIII Forumunun əsas mövzuları Azərbaycan Xalq Cümhuriyyətinin yaranmasının 100 illiyi və Dayanıqlı İnkişaf Məqsədlərinin həyata keçirilməsi olub.
Qeyd edək ki, konfransda Gənclər və İdman nazirinin müavini İntiqam Babayev, BMT-nin Əhali Fondunun Azərbaycandakı ofisinin rəhbəri Fərid Babayev, BMT-nin Uşaq Fondunun Azərbaycandakı nümayəndəsi Edvard Karvardin, BMT-nin İnkişaf Proqramının rezident nümayəndəsinin müavini (BMTİP-nin rezident nümayəndəsinin səlahiyyətlərini müvəqqəti icra edən) Çaru Bist, Azərbaycan Respublikasının Dayanıqlı İnkişaf üzrə Milli Əlaqələndirmə Şurasının Katibi, İqtisadiyyat Nazirliyinin Dayanıqlı inkişaf şöbəsinin müdiri Hüseyn Hüseynov, deputatlar Məzahir Əfəndiyev, Müşfiq Cəfərov, Bakı Şəhər Gənclər və İdman Baş İdarəsinin rəisi Raqif Abbasov, Gənclər Təşkilatları Milli Şuranın sədri Məryəm Məcidova, DİM-lər üzrə gənc səfirlər Zərifə Zülfüqarova, Samir Qədirov, Məhbubə Musayeva, Asiya Gəncləri Sülh Şəbəkəsinin rəhbəri, Asiya Gənclər Şurasının BMT nümayəndəsi Regine Guevara, Rusiya Federasiyasının DİM-8 üzrə gənc səfiri Veronika Yakovleva, Belarus Dayanıqlı İnkişaf üçün Gənclik Təşkilatının rəhbəri, Qırğızıstandan DİM üzrə gənc səfir İrina Ponedelnik və digərləri çıxış ediblər.
Bölmənin digər xəbərləri
