SİYASƏT
DƏMİRYOLU RƏHBƏRLƏRİNİN BAKI GÖRÜŞÜ TƏXİRƏ SALINMIŞDIR
Azərbaycan, Rusiya və İran dəmiryolu idarələri rəhbərlərinin “Şimal-Cənub” layihəsinin inkişafı çərçivəsində noyabrın 3-4-də Bakıda keçirilməsi nəzərdə tutulmuş görüşü qeyri-müəyyən müddətə təxirə salınmışdır.
Azərbaycan Dövlət Dəmiryolu İdarəsinin mətbuat xidmətindən AZƏRTAC-a bildirmişlər ki, görüşün vaxtının dəyişdirilməsi tədbirdə Rusiya nümayəndəsinin iştirak edə bilməməsi ilə bağlıdır.
Xatırladaq ki, görüş iştirakçıları “Şimal-Cənub” nəqliyyat dəhlizi çərçivəsində Azərbaycan ərazisindən keçməklə Rusiya ilə İran arasında dəmir yolu əlaqəsinin nizama salınmasını, bir sıra sərmayə layihələrini müzakirə etməli idilər. Həmin sərmayələr Rusiya ilə Hindistan arasında nəqliyyat əlaqəsinin yaradılması layihəsinin iştirakçısı olan ölkələrin nəqliyyat infrastrukturlarının birləşdirilməsinə və bərpasına sərf olunacaqdır.