Denk partiyasının sədri: Azərbaycan icması Niderlandın ictimai-siyasi həyatında fəal rol oynayır
Rotterdam, 20 noyabr, AZƏRTAC
Avropa Azərbaycanlıları Konqresi Assosiasiyasının (AAK) sədri Sahil Qasımovun rəhbərlik etdiyi heyət Niderlandın Denk siyasi partiyasının sədri E.Kose ilə görüşüb.
AZƏRTAC xəbər verir ki, görüş partiyanın Rotterdam şəhərindəki ofisində keçirilib.
AAK-ın sədri Sahil Qasımov Azərbaycanın 44 günlük Vətən müharibəsində qazandığı Zəfər və Ermənistanın ölkəmizə qarşı qisasçı siyasəti, sərhədlərimizdə törədilən erməni təxribatları ilə bağlı qarşı tərəfi məlumatlandırıb.
Ali Baş Komandan İlham Əliyevin rəhbərliyi ilə rəşadətli Azərbaycan Ordusunun 44 günlük Vətən müharibəsində torpaqlarımızı azad etməsindən söz açıb.
Partiyanın sədri E.Kose AAK-a təşəkkürünü bildirərək, ölkəmizin haqlı mübarizəsində ədalətli mövqe tutacaqlarını, hər zaman mənəvi və siyasi dəstək verəcəklərini bildirib. Niderlanddakı Azərbaycan icmasının ölkənin ictimai-siyasi həyatında fəal rol oynadığını qeyd edərək, partiya ilə AAK arasında əməkdaşlığın genişləndirilməsində maraqlı olduqlarını deyib.
AAK-ın sədri qarşı tərəfə milli hədiyyələr bağışlayıb.
Görüşdə AAK-ın üzvləri Lena Sangin, Leyla van Hartog, Ofelya Babayeva da iştirak ediblər.
Xatırladaq ki, Denk partiyası Niderland parlamentində üç nümayəndə ilə təmsil olunur. E.Kose 2020-ci ildən partiyaya sədrlik edir. Partiya sıralarında ölkədə yaşayan müxtəlif icmaların nümayəndələrini birləşdirir.
Şəhla Ağalarova
AZƏRTAC-ın xüsusi müxbiri
Rotterdam
Bölmənin digər xəbərləri
