Deputat: Azərbaycan Asiya ilə Avropa arasında əlaqələndirici rol oynayır
Bakı, 11 oktyabr, AZƏRTAC
Azərbaycan nəinki regionun, həm də yer kürəsinin böyük bir hissəsini təşkil edən Asiya ilə Avropa arasında əlaqələndirici rol oynayır. Bu gün əməkdaşlıq əlaqələrini möhkəmləndirən dövlətlərə daha çox ehtiyac var. Çünki dünya düzənində ziddiyyətlər gündən-günə dərinləşir və ölkələr arasındakı ənənəvi bağlantılar qırılır. Həmçinin dünyanın siyasi-iqtisadi düzənində əhəmiyyətli yer tutan bəzi böyük güclər təcrid olunur və kənarlaşdırılır. Bu da böyük bir coğrafiyanın siyasi-iqtisadi mənzərəsində yeni reallıqlar yaratmaqdadır.
Bu fikirləri AZƏRTAC-a açıqlamasında Milli Məclisin deputatı Azər Badamov söyləyib.
O qeyd edib ki, Prezident İlham Əliyevin uzaq görən siyasəti sayəsində Azərbaycan yaranmış bu yeni reallıqda vacib amilə çevrilib. Qitələrin iqtisadi mənzərəsində ölkəmizin rolu gözlə görünür və yüksək qiymətləndirilir. Belə ki, Azərbaycanın zamanında ərsəyə gətirdiyi karbohidrogen ehtiyatlarının önəmini Avropa dövlətləri bir neçə il əvvələ qədər əhəmiyyətli hesab etmirdilərsə də, hazırda ölkəmiz bu qitənin enerji təhlükəsizliyində yeganə alternativ mənbəyə çevrilib. Düzdür, Azərbaycan qazı Avropanın enerji təminatında o qədər də böyük yer tutmasa da, bugünkü reallıqda mövcud resurslarımız üzərində böyük rəqabət başlayıb.
“Azərbaycan-Avropa əməkdaşlığı təkcə enerji sektoru ilə kifayətlənmir. Ölkəmizdə yenilənmiş müasir yol infrastrukturu, o cümlədən avtomobil-dəmir yollarımız, “Bakı Beynəlxalq Dəniz Ticarət Limanı” və Bakı-Tbilisi-Qars dəmir yolu xətti Asiya ilə Avropa arasında iqtisadi əlaqələrin davam etdirilməsində vacib marşruta çevrilib. Qeyd olunmalıdır ki, Çindən və Hindistandan çıxan yüklər Körfəz ölkələri və Xəzər dənizini keçməklə “Şimal-Cənub”, “Şərq-Qərb” və “Cənub-Qərb” tranzit dəhlizləri vasitəsilə dövriyyə olunur. Təkcə cari ilin 6 ayında ölkəmizin üzərindən keçən tranzit yüklərinin həcminin 50 faizdən çox artması da bu günün reallığıdır.
Zəngəzur dəhlizinin istifadəyə verilməsindən sonra ölkəmizin yük buraxma imkanları daha da genişlənəcək. Prezident İlham Əliyevin təşəbbüsü ilə ərsəyə gətirilmiş nəqliyyat dəhlizləri uzun illər ölkəmizə böyük iqtisadi gəlirlər gətirməklə yanaşı, regionumuzun təhlükəsizliyinin qarantına çevrilməkdədir. Azərbaycan əməkdaşlığını ancaq iqtisadi platformalarda davam etdirməklə kifayətlənmir. Həm də ölkəmiz qitələrin siyasi mənzərəsinin formalaşmasında da yaxından iştirak edir. Belə ki, bu ilin oktyabrın 6-da Prezident İlham Əliyevin Praqada “Avropa siyasi birliyi” Zirvə Toplantısının açılışında iştirakı və bu toplantı çərçivəsində keçirdiyi görüşlər yeni siyasi mənzərənin formalaşmasında Azərbaycanın xüsusi rolu olduğunu bir daha göstərdi”,-deyə A.Badamov vurğulayıb.
O bildirib ki, 44 ölkənin iştirak etdiyi “Avropa siyasi birliyi” qitənin ölkələri arasında siyasi əlaqələndirmə platformasıdır. Birliyin məqsədi ümumi maraq doğuran məsələlərin həlli üçün siyasi dialoqu və əməkdaşlığı inkişaf etdirmək, Avropa qitəsinin təhlükəsizliyini, sabitliyini və rifahını gücləndirməkdir. Zirvə Toplantısı çərçivəsində “Avropa qitəsində sülh və təhlükəsizlik” mövzusunda keçirilən dəyirmi masada Azərbaycan Respublikasının Prezidenti İlham Əliyev çıxış edərək regionda sülhün və sabitliyin yaranması üçün atılmalı vacib addımlardan danışaraq Cənubi Qafqazda sülh və sabitliyin təmin olunması üçün Azərbaycan-Gürcüstan-Ermənistan arasında yeni siyasi dialoq platformasının yaradılmasını təklif edib. Bu gün Cənubi Qafqaz regionunda sülhün və sabitliyin davamlı və möhkəm olması nəinki regionumuz üçün, həm də Avropa və Asiya üçün də vacib məsələlərdən biridir.
Deputat əlavə edib ki, Azərbaycan Türk Dövlətləri Təşkilatının (TDT) da aktiv üzvü olaraq Asiya ölkələrinin də vahid siyasi-iqtisadi mövqedən çıxış etməsində əlaqələndirici körpü rolunu oynayır. Ölkəmizin iki qitənin mərkəzində yerləşməsi böyük bir coğrafiyanın birləşdirilməsində lokomotiv olaraq özünü təsdiq edir. Bu da Asiya və Avropanın yeni reallığında müasir dövrün çağırışlarına uyğun siyasi sabitliyin yenidən formalaşmasında ölkəmizin iştirakı ilə yeni dialoq platformalarının yaranmasını labüd edib.
Bölmənin digər xəbərləri
