Deputat: Azərbaycan ən aktual məsələlərlə bağlı dünya siyasətinin gündəmini müəyyənləşdirən ölkələrdən biridir
Bakı, 7 noyabr, AZƏRTAC
Azərbaycan hazırda ən aktual məsələlərlə bağlı dünya siyasətinin gündəmini müəyyənləşdirən ölkələrdən birinə çevrilməkdədir. Bu, bir tərəfdən ölkəmizin beynəlxalq münasibətlər sistemində milli aktor kimi fəal davranışları və nüfuzu ilə əlaqədardırsa, digər tərəfdən onun mötəbər beynəlxalq təşkilatlara sədrlik etməsi ilə bağlıdır. Azərbaycanın beynəlxalq təşkilatlara sədrlik etmək və bu müddət ərzində onların fəaliyyətini səmərəli formada təmin etmək təcrübəsi var. Hələ 2011-2013-cü illərdə Azərbaycan BMT Təhlükəsizlik Şurasının qeyri-daimi üzvü kimi bu təşkilata sədrlik edən zaman terrorizmə qarşı mübarizə, beynəlxalq hüququn aliliyinin təmin edilməsi və bir sıra digər aktual məsələləri beynəlxalq gündəmə gətirə bilmişdi. Hazırda isə Azərbaycan BMT-dən sonra dünyanın ikinci ən böyük beynəlxalq təşkilatı olan Qoşulmama Hərəkatına rəhbərlik edir və bu statusda artıq bir neçə vacib məsələləri gündəmə gətirməklə qlobal problemlərin həlli istiqamətində təqdirəlayiq təşəbbüslərlə çıxış etməyi bacarıb.
Bu fikirləri AZƏRTAC-a açıqlamasında Milli Məclisin deputatı, “Yeni Azərbaycan” qəzetinin baş redaktoru Hikmət Babaoğlu bildirib.
Deputat deyib: “Hələ 2020-ci il mayın 4-də keçirilmiş Qoşulmama Hərəkatına üzv olan ölkələrin COVID-19 pandemiyasına qarşı mübarizə üzrə Təmas Qrupunun onlayn Zirvə görüşü zamanı Azərbaycan Prezidenti İlham Əliyev BMT Baş Assambleyasının koronavirusa qarşı mübarizəyə həsr olunmuş 31-ci Xüsusi Sessiyasının çağırılması təşəbbüsü ilə çıxış etmiş, bu təşəbbüs quruma üzv ölkələrin böyük əksəriyyəti tərəfindən dəstəklənmişdi. Bu il noyabrın 5-də isə BMT Baş Assambleyası öz plenar iclasında “Koronavirus xəstəliyi (COVID-19) pandemiyasına cavab olaraq Baş Assambleyanın Xüsusi Sessiyası” ilə bağlı qətnamə qəbul edib. Qətnaməyə əsasən, Azərbaycan Respublikasının Prezidenti tərəfindən Qoşulmama Hərəkatına üzv ölkələri adından irəli sürülən təşəbbüs əsasında BMT Baş Assambleyasının COVID-19-a qarşı mübarizəyə həsr olunan dövlət və hökumət başçıları səviyyəsində Xüsusi Sessiyasının bu il dekabrın 3-4-də keçirilməsi qərara alınıb”.
H.Babaoğlunun sözlərinə görə, burada əsas məsələlərdən biri də odur ki, açılış mərasimində BMT Baş Assambleyasının prezidenti, Baş katibi, İqtisadi və Sosial Şuranın prezidenti və Təhlükəsizlik Şurasının prezidenti ilə yanaşı, Qoşulmama Hərəkatının adından onun sədri qismində Azərbaycan Respublikasının Prezidenti İlham Əliyevin də çıxışı nəzərdə tutulur. Şübhəsiz ki, Prezident İlham Əliyev çıxışında pandemiyaya və ona qarşı mübarizə məsələləri ilə yanaşı, həm də Azərbaycan həqiqətləri, beynəlxalq hüququn və onun tələblərinin yerinə yetirilməsi, işğalçı Ermənistanın regionda təhlükəsizliyi təhdid edən terrorçu dövlət olması barədə də danışacaq, bunun ümumi rifaha və regional inteqrasiyaya, o cümlədən pandemiyaya qarşı mübarizədə birgə səylərə ciddi əngəllər törətdiyini bildirəcək. Bu isə indidən Ermənistanı narahat etməyə başlayıb.
“Dünyanın pandemiyadan əziyyət çəkdiyi bir vaxtda və beynəlxalq gündəmin ən mühüm məsələlərindən biri olan COVID-19-la mübarizəyə dair Xüsusi Sessiyanın çağırılması təşəbbüsünə ilk günlərdən qarşı çıxan Ermənistan onun reallaşdırmasına maneə yaratmağa çalışıb və qətnamənin giriş hissəsində Qoşulmama Hərəkatının sədrinin çıxışının qarşısını almağa yönələn addımlar atmağa cəhd edib. Ancaq yenə də həmişəki kimi, Ermənistan beynəlxalq ictimaiyyətin qəti mövqeyi ilə üzləşib və onun bu cəhdi də rədd edilib. Bu isə bir daha Azərbaycanın beynəlxalq nüfuzu və qlobal prosesləri idarəetmə bacarığı kimi qiymətləndirilməlidir”,- deyə Hikmət Babaoğlu bildirib.
Bölmənin digər xəbərləri
