Deputat: Azərbaycan-Özbəkistan əməkdaşlığı regional sabitliyə və qlobal tərəfdaşlığa töhfə verir
Bakı, 28 avqust, AZƏRTAC
Özbəkistan Prezidenti Şavkat Mirziyoyevin avqustun 22-23-də Azərbaycana səfəri iki ölkə arasında qarşıdakı illər üçün geniş spektrdə səmərəli əməkdaşlığı bir qədər də gücləndirdi. Bu səfər bir sıra önəmli məsələlərlə diqqəti çəkir. İlk növbədə, qeyd etmək lazımdır ki, Mirziyoyev ötən ay keçirilən növbədənkənar seçkilərdə prezident seçildikdən sonra ilk rəsmi səfərini Azərbaycana etdi. Bu çox mühüm bir hadisədir və iki ölkə arasında mövcud qardaşlıq, dostluq münasibətlərinin bariz nümunəsidir. Digər tərəfdən bu görüşlər fikir mübadiləsi aparmaq, birgə tapşırıqların icrasına nəzarət etmək və əməkdaşlığa dair ümumi öhdəliklərini gücləndirmək üçün platforma rolunu oynayır. Prezident İlham Əliyevin Özbəkistan Prezidenti ilə birgə mətbuat konfransı zamanı qeyd etdiyi kimi, artıq əldə edilmiş nəticələr hər iki ölkənin düzgün yolda olduğunu göstərir. Azərbaycan və Özbəkistan arasında diplomatik əməkdaşlığın konkret nəticələri onların ikitərəfli əməkdaşlığın genişləndirilməsinə sadiqliyinə əyani sübutdur. Belə ki, səfər zamanı bir sıra mühüm ikitərəfli sənədlər imzalanıb. Qeyd etmək lazımdır ki, bunların sırasında xüsusi mühüm əhəmiyyət kəsb edən Azərbaycan ilə Özbəkistan arasında Ali Dövlətlərarası Şuranın yaradılması haqqında müqavilədir.
Bu sözləri Milli Məclisin Ailə, qadın və uşaq məsələləri komitəsinin sədri, professor Hicran Hüseynova AZƏRTAC-a açıqlamasında bildirib.
Komitə sədri qeyd edib ki, iki dost dövlətin iqtisadi əlaqələri təkcə ticarət dövriyyəsini əhəmiyyətli dərəcədə genişləndirmək deyil, həm də neft-kimya, qaz, mədənçıxarma və nəqliyyat sektorlarında birgə layihələrin həyata keçirilməsi üçün investisiya komponentini əhəmiyyətli dərəcədə gücləndirmək niyyətindədir. Bakı və Daşkənd Türk Dövlətləri Təşkilatının inteqrasiya təşəbbüslərində çox yaxından iştirak edir, regional nəqliyyat, tranzit və logistika layihələrində əməkdaşlıq edir, ikitərəfli və çoxtərəfli ticarəti fəal şəkildə artırır. Xüsusilə, Xəzər dənizinə birbaşa çıxışı olmayan Özbəkistan Transxəzər Beynəlxalq Nəqliyyat Marşrutunun və Orta Dəhlizin digər marşrutlarının iştirakçısı olan ölkələrin aktiv yükdaşıyıcısı və tərəfdaşıdır. Bu gün hər iki ölkənin tranziti genişləndirmək, Transxəzər dəhlizi boyunca yükdaşımaların həcmini artırmaqla bağlı mövqeləri tam üst-üstə düşür. Son vaxtlar mülki aviasiya sahəsində əməkdaşlıq çox fəal şəkildə inkişaf etdirilir: iki ölkənin aviaşirkətləri həftədə 15 uçuş həyata keçirir və Bakı forumunun yekunlarına əsasən, hava hərəkətinin intensivliyinin artırılması ilə bağlı razılıq əldə olunub.
“Son iki ildə işgüzar əməkdaşlığın daha bir mühüm rolunu vurğulayan deputat qeyd edib ki, avtomobil sənayesi, kənd təsərrüfatı sektoru və yüngül sənaye sahələrində birgə istehsal layihələrinin həyata keçirilməsi ilə bağlı iki ölkənin hökumətlərinin və işgüzar dairələrinin təşəbbüsləri olub. O cümlədən, artıq iki ildir ki, Hacıqabul sənaye məhəlləsində “Chevrolet” markalı avtomobillərin yığılması üçün Azərbaycan-Özbəkistan birgə müəssisəsi fəaliyyət göstərir. Azərbaycanın “Azərmaş” və Özbəkistanın “UzAvtoSanoat” SC-nin yaratdığı birgə müəssisədə “Chevrolet”in “Cobalt”, “Malibu”, “Tracker” və “Equinox” kimi modellərinin istehsalı nəzərdə tutulub. Gələcəkdə Azərbaycan-Özbəkistan birgə müəssisəsinin məhsullarının Türkiyəyə, Mərkəzi Asiya, MDB ölkələrinə, digər yaxın xarici ölkələrin bazarlarına çıxarılması planlaşdırılır. Ən böyük regional pambıqtəmizləyici avadanlıq istehsalçısı Özbəkistanın PAHTAMAŞ şirkətinin dəstəyi ilə Azərbaycanda pambığın ilkin emalı zavodunun tikintisi nəzərdə tutulur. Bir sözlə, Özbəkistanla əməkdaşlıq çoxvektorludur və iqtisadiyyatın müxtəlif sahələrini əhatə edir. Azərbaycan-Özbəkistan İnvestisiya Fondu isə iqtisadi əlaqələrin daha da möhkəmlənməsinə, qarşılıqlı investisiyaların stimullaşdırılmasına, ölkələrimizin regionları və işgüzar dairələri arasında əlaqələrin inkişafına mühüm töhfə verəcək”, - deyə deputat vurğulayıb.
Azərbaycan-Özbəkistan əməkdaşlığının regional sabitliyə və qlobal tərəfdaşlığa töhfə verdiyini diqqətə çatdıran H.Hüseynova əlavə edib: “Onların birgə səyləri Mərkəzi Asiya regionunda qarşılıqlı etimadın gücləndirilməsində və əlaqənin təşviqində mühüm rol oynayır. Hər iki ölkə Türk Dövlətlərinin Təşkilatı, eyni zamanda, Qoşulmama Hərəkatı, Şanxay Əməkdaşlıq Təşkilatı çərçivəsində çoxtərəfli əlaqələrin inkişafına sadiqliyini nümayiş etdirir. Azərbaycan ilə Özbəkistan arasında münasibətlər inkişaf etdikcə gələcək əməkdaşlığın perspektivləri ümidvericidir. Prezidentlər İlham Əliyev və Şavkat Mirziyoyevin diplomatik müzakirələrin və təşəbbüslərin aparılmasında nümayiş etdirdiyi liderlik, qətiyyət daha dərin əməkdaşlığın təməl daşı olacaqdır. Hər iki liderin həyata keçirdiyi şəxsi diplomatiya onların ikitərəfli münasibətlərinin istiqamətinin formalaşmasında həlledici amil olaraq qalır”.
Deputat bildirib ki, Prezident Şavkat Mirziyoyevin Azərbaycana səfəri zamanı baş verən digər əlamətdar hadisə Füzulidə Mirzə Uluqbəy adına 1 nömrəli tam orta məktəbin açılışıdır. Dövlətimizin başçısı İlham Əliyevin bildirdiyi kimi, "Bu, Qarabağın bərpası işində xarici dövlətin ilk hədiyyəsidir və biz bu qardaşlıq, həmrəylik, dəstək jestini çox yüksək dəyərləndiririk”.
Özbəkistanın dövlət başçısı Şavkat Mirziyoyev Türkiyənin Prezidenti Rəcəb Tayyib Ərdoğandan sonra işğaldan azad olunmuş Füzuli və Şuşanı ziyarət edən ikinci xarici ölkə Prezidentidir. Bu, çox böyük addımdır. Hər iki dövlət başçısı Azərbaycan Prezidenti İlham Əliyevin yanında dayanaraq ölkəmizin Qələbəsindən sevindiklərini və hər zaman ölkəmizin yanında olduqlarını bir daha nümayiş etdirdilər.
“Prezidentlər İlham Əliyev və Şavkat Mirziyoyev arasında keçirilən görüşlər Azərbaycan və Özbəkistan arasında diplomatik əlaqələrin davamlı və dinamik inkişaf etdiyini sübut etdi. Açıq dialoq və ortaq baxış, dəyər, mədəniyyət sayəsində bu liderlər təkcə öz ölkələrinin strateji tərəfdaşlığını möhkəmləndirməyib, həm də sənayedən tutmuş mədəniyyətə qədər müxtəlif sektorlarda əhəmiyyətli nəticələr əldə ediblər. Onların diplomatik səyləri regional sabitlik, iqtisadi artım və qlobal əməkdaşlıq vəd edir”, - deyə deputat bildirib.
Bölmənin digər xəbərləri
