Deputat: Azərbaycana qarşı qərəzli hərəkətlərin qarşısını almaq bizim müqəddəs borcumuzdur
Bakı, 6 oktyabr, AZƏRTAC
Sentyabrın 27-dən başlayaraq rəşadətli Silahlı Qüvvələrimiz Ermənistanın törətdiyi hərbi təxribata cavab olaraq uğurlu əks-hücum əməliyyatı aparır. Çox sevinirik ki, hər gün yaşayış məntəqələrimiz, kəndlərimiz, strateji əhəmiyyət kəsb edən yüksəkliklərimiz azad olunur. Lakin bu qələbələr elə də asanlıqla əldə olunmur. Döyüş meydanında uduzan düşmən ölkəmizə, əhalimizə qarşı yeni-yeni təxribatlar törədir. Beynəlxalq hüququn heç bir norma və prinsiplərinə hörmət qoymur. Əhalinin sıx yaşadığı, cəbhə bölgəsindən, eyni zamanda, təmas xəttindən xeyli uzaqda yerləşən şəhər və rayonlarımıza Ermənistan ərazisindən raket hücumları, qadağan olunmuş bombalarla zərbələr endirilir. Nəticədə, dinc əhali, o cümlədən qadınlar, uşaqlar, yaşlı insanlar həlak olub və ya yaralanıb. Yaşayış evlərinə, mülki obyektlərə ziyan dəyib. Ermənistan Silahlı Qüvvələrinin hücumları nəticəsində sentyabrın 27-dən indiyədək ermənilərin yaşayış məntəqələrini atəşə tutması nəticəsində 27 mülki şəxs həlak olub, onlardan 5-i azyaşlıdır. Həmçinin 141 mülki şəxs müxtəlif dərəcəli bədən xəsarətləri alıb. Onların 7-si uşaqdır. Ermənistanın bu təhrikedici və məsuliyyətsiz hərəkətləri beynəlxalq humanitar hüququn və insan haqlarının, xüsusilə 1949-cu il Cenevrə konvensiyaları və ona 1 saylı Əlavə, həmçinin Uşaqların hüquqlarına və İnsan hüquqlarının müdafiəsi və fundamental azadlıqlara dair Konvensiyanın ciddi şəkildə pozulmasıdır. Qəhrəman əsgərlərimizin döyüş meydanında göstərdikləri cəsarətin və igidliyin qarşısında davam gətirməyən ermənilər hazırda başqa vasitələrdən istifadə etməyə çalışır. Erməni lobbisi dünyanın ayrı-ayrı ölkələrində, xüsusilə də ABŞ, Fransa və Rusiyada çox fəallaşıb.
Bu fikirləri AZƏRTAC-a açıqlamasında Milli Məclisin deputatı Hicran Hüseynova söyləyib.
Hicran Hüseynova deyib: “Son günlər daha da aqressivləşən bu lobbi ABŞ Konqresinin Nümayəndələr Palatasının müzakirəsinə 1165 saylı qətnamə çıxarmağa çalışır. Bilirik ki, ABŞ-da qarşıda prezident seçkiləri gəlir və bu fürsətdən istifadə edən erməni lobbisi daha da fəallaşıb. Çünki təkcə prezident deyil, bütün digər seçkili orqanlara seçilmək üçün hər hansı namizədin bu lobbinin dəstəyinə ehtiyacı var. Məhz bu baxımdan ermənilər Konqresdə belə bir sənədin qəbul edilməsinə nail olacaqlarından əmindirlər. Bu qətnamənin, eləcə də buna oxşar digər addımların qarşısını almaq üçün hər birimiz Vətənimiz, dövlətimiz, torpağımız qarşısında şərəf borcumuzu, vətəndaşlıq missiyamızı yerinə yetirməliyik. Bütün ölkələrdə yaşayan azərbaycanlılar daha diqqətli və fəal olmalı, Azərbaycanımızın haqq səsini dünyaya çatdırmaq üçün hər bir imkandan məqsədyönlü surətdə istifadə etməliyik. Məsələn, ABŞ-da 40 mindən çox azərbaycanlı yaşayır. Onlar həqiqətin qələbə çalması, torpaqlarımızın azad edilməsi, Xocalıda törədilən soyqırımının bir daha təkrarlanmaması üçün fəal olmalıdırlar.
Məlum olduğu kimi, Amerikada yaşayan azərbaycanlılar 2013-cü il yanvarın 25-dən etibarən Xocalı soyqırımının tanınması, onun qurbanlarının anılması və ABŞ Prezidentinin bununla bağlı bəyanat verməsi məqsədilə Ağ evin rəsmi veb-səhifəsində “Biz xalqıq” bölməsində petisiya yerləşdirdilər. Qısa müddətdə petisiyaya dünyanın müxtəlif ölkələrindən 100 mindən çox insan imza atdı. İndiyədək ABŞ-ın 50 ştatından 21-i Xocalı ilə bağlı sənəd qəbul edib. Buna görə də biz daha çox iş görməliyik ki, erməni vandalizminin qarşısını alaq və Azərbaycan əleyhinə qətnamənin qəbuluna imkan verməyək. Bütün vasitələri səfərbər edərək, sosial şəbəkələrdə geniş və əsaslandırılmış məlumatları yaymalıyıq. Tanınmış və bizi dəstəkləyən siyasətçiləri, ictimai-siyasi xadimləri, siyasi partiyaları, ictimai təşkilatları, ayrı-ayrı dost lobbiləri, onların nümayəndələrini bu prosesə cəlb etməliyik, gənclərimizin, xüsusilə də xaricdə yaşayan gənclərimizin potensialından yararlanmalıyıq”.
Deputat qeyd edib ki, bu gün Azərbaycan çox şərəfli tarixi anlar yaşayır, yeni dövr yaradır. Harada yaşamağımızdan, fəaliyyət göstərdiyimiz sahədən asılı olmayaraq, hamımız bu müqəddəs mübarizəyə öz töhfəmizi verməliyik. Azərbaycan naminə bir olmalıyıq, həmrəylik göstərməliyik!
Bölmənin digər xəbərləri
