Deputat: Beynəlxalq ictimaiyyət Azərbaycan Prezidentinin peyvənd millətçiliyinə qarşı qlobal təşəbbüslərini dəstəkləyir
Bakı, 19 noyabr, AZƏRTAC
Dünyada COVID-19 pandemiyası elan edildiyi gündən bütün ölkələrdə müxtəlif çətinliklər özünü büruzə verməyə başladı. Xəstəliyin sürətlə yayılması və zamanında qabaqlayıcı tədbirlərin görülməməsi hətta səhiyyəsi yüksək səviyyədə inkişaf edən ölkələri belə çətin məqamlarla üz-üzə qoydu. Lakin Azərbaycan koronavirusa qarşı dərhal qabaqlayıcı tədbirlər görməklə ölkədə yoluxma hallarının qarşısını ala və vəziyyəti nəzarətdə saxlaya bildi. Prezident İlham Əliyevin rəhbərliyi ilə Azərbaycan dövlətinin COVID-19-la mübarizədə ölkə miqyasında həyata keçirdiyi tədbirlər Ümumdünya Səhiyyə Təşkilatı və digər beynəlxalq təşkilatlar tərəfindən yüksək qiymətləndirildi, bir çox ölkələr üçün nümunə olaraq göstərildi.
Bu fikirləri AZƏRTAC-a açıqlamasında Milli Məclisin deputatı Cavid Osmanov bildirib.
“Prezident İlham Əliyevin COVID-19 pandemiyasına qarşı mübarizə tədbirləri ölkə miqyası ilə məhdudlaşmayıb”, - deyən deputat bildirib ki, dövlətimizin başçısı pandemiya ilə mübarizənin bütün dünya ölkələri tərəfindən mütəşəkkil qaydada aparılmalı olduğunu bir sıra beynəlxalq tribunalardan bəyan edərək müvafiq təşəbbüslər irəli sürdü. Azərbaycan Prezidenti COVID-19-la mübarizənin bütün dünya miqyasında səyləri birləşdirərək aparılmasını ilk vurğulayan dünya liderlərindən birincisidir. Bu istiqamətdə çox ciddi əməli addımlar atılmış, Azərbaycan Qoşulmama Hərəkatının sədri qismində COVID-19 pandemiyasına qarşı mübarizə naminə beynəlxalq səylərin səfərbər edilməsi sahəsində liderliyi ilə seçilmişdir. Belə ki, dünya ölkələrinin əksəriyyəti özünə qapandığı zaman Azərbaycan pandemiyanın öhdəsindən gəlmək üçün beynəlxalq həmrəyliyin və əməkdaşlığın təbliği ilə məşğul olub.
“Qoşulmama Hərəkatına sədrlik edən Azərbaycanın Prezidenti bir sıra qlobal təşəbbüslərlə çıxış etdi. 2020-ci ilin mayında məhz Prezident İlham Əliyevin təşəbbüsü ilə Qoşulmama Hərəkatının Zirvə toplantısı keçirilərək dünyanın qarşılaşdığı yeni çağırışlar, pandemiya ilə mübarizə üsulları beynəlxalq miqyasda geniş formatda müzakirə edildi. Bundan əlavə, Azərbaycan Prezidentinin şəxsi təşəbbüsü əsasında 2020-ci ilin dekabrında 150-dən çox dövlətin dəstəyi ilə BMT Baş Assambleyasının dövlət və hökumət başçıları səviyyəsində Xüsusi Sessiya keçirildi.
COVID-19 əleyhinə peyvəndlər istehsal edildikdən sonra bütün ölkələrin bərabər qaydada peyvənd əlçatanlığının olması təşəbbüsü də məhz Prezident İlham Əliyev tərəfindən irəli sürüldü. Həmçinin dövlətimizin başçısının tapşırığı ilə Azərbaycan Qoşulmama Hərəkatı adından BMT-nin İnsan Hüquqları Şurasında irəli sürdüyü “Bütün ölkələrin peyvəndlərə bərabər və universal çıxışının təmin edilməsi” adlı qətnamə 2021-ci ilin mart ayında yekdilliklə qəbul olundu.
Azərbaycan Prezidenti hər zaman çıxışlarında qeyd edir ki, istər varlı, istərsə də kasıb ölkələr peyvəndlərlə eyni qaydada təmin edilməlidir. Məhz bu halda pandemiya ilə mübarizə yüksək nəticə verər”, - deyə C.Osmanov qeyd edib.
Deputat vurğulayıb ki, Azərbaycan dünya miqyasında pandemiya ilə mübarizəyə əməli töhfələrini verir. Azərbaycan koronavirusla mübarizədə 30-dan çox ölkəyə humanitar və maliyyə yardımı göstərib. Ölkəmiz həm də Ümumdünya Səhiyyə Təşkilatına 10 milyon ABŞ dolları məbləğində könüllü ianə edib, bu yaxınlarda isə dörd ölkəyə təmənnasız olaraq 150 min doza vaksin göndərib.
C.Osmanov, həmçinin deyib: “Bu il sentyabrın 24-də BMT Baş Assambleyasının 76-cı sessiyasının illik ümumi müzakirələrində videomüraciətdə çıxışı təqdim edilən Prezident İlham Əliyev dünyada mövcud olan peyvənd millətçiliyini bir daha qınamış, Azərbaycan tərəfindən Qoşulmama Hərəkatı adından peyvəndlərə bərabər və universal çıxışının təmin olunması ilə bağlı BMT Baş Assambleyasında da qətnamənin irəli sürüləcəyini elan etmişdi. Noyabrın 18-də BMT Baş Assambleyasının 76-cı sessiyası çərçivəsində Assambleyanın Üçüncü Komitəsində sözügedən qətnamə layihəsi müzakirə olunub və səsvermə yolu ilə qəbul edilib. Heç bir ölkə qətnamənin əleyhinə səs verməyib, 171 ölkə qətnamənin lehinə olub. Qətnaməyə münasibətdə bitərəf qalmış 7 dövlətdən biri Ermənistandır ki, bu ölkə də regionda ən az peyvəndləmə səviyyəsinə malikdir. Qeyd etmək lazımdır ki, bu, Ermənistanın bütün məsələlərə, hətta humanitar məsələlərdə də Azərbaycanın nailiyyətlərini qısqanclıqla qarşılamasının bariz nümunəsidir”.
Deputat sonda vurğulayıb ki, BMT Baş Assambleyasının 76-cı sessiyası çərçivəsində Assambleyanın Üçüncü Komitəsində qəbul olunan qətnamə beynəlxalq ictimaiyyətin Azərbaycan Prezidenti İlham Əliyevin COVID-19 pandemiyasına, peyvənd millətçiliyinə qarşı qlobal mübarizəsini və təşəbbüslərini dəstəklədiyini göstərir. Həmin qətnamə dekabr ayında artıq BMT Baş Assambleyasının plenar sessiyasında da qəbul olunacaq.
Bölmənin digər xəbərləri
