Deputat: Kəlbəcərdə sürətlə həyata keçirilən layihələr rayonun işıqlı gələcəyindən xəbər verir
Bakı, 22 noyabr, AZƏRTAC
Kəlbəcər rayonu Ermənistan silahlı qüvvələri tərəfindən 1993-cü il aprelin 2-də işğal olunmaqla 60 minə yaxın sakin öz doğma torpağından didərgin salındı. Bu qəsbkarlıq zamanı 511 dinc insan öldürüldü, 321 nəfər isə əsir götürüldü. Bununla da Ağdam, Füzuli, Qubadlı və Cəbrayıl rayonlarının işğalına yol açıldı. Əslində isə bu, Qarabağın artıq itirilməsi, düşmən caynağına keçməsi demək idi.
BMT Təhlükəsizlik Şurası (TŞ) tərəfindən 1993-cü il aprelin 30-da Azərbaycanın Kəlbəcər rayonunun işğalı ilə əlaqədar 822 saylı qətnamə qəbul olundu. Sənəddə işğalçı qüvvələrin Kəlbəcər və digər rayonlardan dərhal çıxarılması tələb edildi. Bu qətnamənin qəbulundan sonra ATƏT-in Minsk qrupu qəsbkarın Azərbaycanın işğal altında saxladığı ərazilərindən geri çəkilməsi ilə bağlı “təcili tədbirlər haqqında vaxt cədvəli” hazırladı. Lakin Ermənistan bütün bunlara məhəl qoymayaraq, 20 faiz torpağımızı 30 il ərzində işğalda saxladı.
Bu fikirləri AZƏRTAC-a açıqlamasında, Milli Məclisin deputatı, YAP İdarə Heyətinin üzvü Rəşad Mahmudov söyləyib.
Ermənistanın işğal dövründə Kəlbəcərin qədim və zəngin maddi-mədəni irsini tamamilə məhv etdiyini bildirən deputat deyib: Düşmən bölgədə yerləşən və Azərbaycanın qədim alban xristian irsinə aid olan monastrların orijinal arxitektur xüsusiyyətlərini dəyişdirərək erməniləşdirib. Kəlbəcərin təbii resurslarını və faydalı qazıntılarını qanunsuz şəkildə istismar edib. Qəsbkar bunlar azmış kimi, rayon ərazisində qanunsuz məskunlaşdırma da aparıb.
Davamlı sülhə nail olunmasının yeganə yolu isə Ermənistan silahlı qüvvələrinin Kəlbəcərdən, eləcə də işğal olunmuş digər ərazilərimizdən qeyd-şərtsiz və tamamilə çıxarılması, məcburi köçkünlərin öz doğma torpaqlarına qayıtmaları üçün hüquqlarının təmin edilməsi idi. Belə bir hüquq, haqq-ədalət isə düşmən ölkənin silahlı qüvvələrinin ötən il sentyabrın 27-də törətdiyi növbəti təxribata, hərbi obyektləri və mülki əhalini hədəfə almasına cavab olaraq Ordumuzun həyata keçirdiyi əks-həmlə əməliyyatları ilə başlanan və 44 çəkən Vətən müharibəsində qazandığı möhtəşəm Qələbə ilə bərpa edildi”.
Rəşad Mahmudov bildirib ki, savaş zamanı düşmənin işğal etdiyi ərazilərdə möhkəmləndirdiyi hərbi mühəndis-istehkam qurğuları Azərbaycan Ordusunun əks-hücumu nəticəsində darmadağın edildi, Füzuli, Cəbrayıl, Zəngilan, Qubadlı, Kəlbəcər, Laçın, Ağdam və Hadrut azad edildi. Bütövlükdə, 5 şəhər, 4 qəsəbə və 300-ə yaxın kəndin ərazisi hərbi yolla qəsbkardan təmizləndi.
Azərbaycanın qədim mədəniyyət beşiyi sayılan və hər bir azərbaycanlının qəlbində qürur, iftixar simvolu olan Şuşa şəhərinin düşmən əsarətindən azad edilməsi ilə tam məğlubiyyətə uğrayan Ermənistan 2020-ci il noyabrın 10-da kapitulyasiya aktına imza ataraq, Azərbaycanın işğal altındakı digər ərazilərindən qoşunlarını çıxarmağa məcbur oldu. Beləliklə, Azərbaycan özü BMT Təhlükəsizlik Şurasının müvafiq qətnamələrinin icrasını gerçəkləşdirdi. Bununla da Prezident İlham Əliyevin müdrik və qətiyyətli siyasəti Ermənistan və onun ədalətsiz havadarlarının acı məğlubiyyəti ilə nəticələndi, ölkəmiz uzun illər çəkən bu haqsız siyasi-hərbi mübarizədən qalib çıxdı.
Ordumuz uğurlu əməliyyatları ilə status-kvonu dəyişdirdi, təmas xəttini darmadağın etdi. Haqq işində Azərbaycan xalqının birliyi, qalib Prezidentinə və qəhrəman Ordumuza inamı bu tarixi Qələbəni reallaşdırdı.
Azərbaycan, Rusiya və Ermənistan rəhbərləri tərəfindən imzalanan birgə Bəyanatın qüvvəyə minməsi ilə münaqişənin hərbi fazası başa çatdı. Bəyanata uyğun olaraq, dekabrın 1-dək üç rayon-Ağdam, Kəlbəcər və Laçın Azərbaycana təhvil verildi.
Deputat qeyd edib ki, ötən il noyabrın 25-də azadlığına qovuşan Kəlbəcər şəhəri də daxil olmaqla, rayonun 147 yaşayış məntəqəsi düşməndən təmizləndi. Müzəffər Ali Baş Komandan, Prezident İlham Əliyevin müvafiq sərəncamları ilə rayonun azadlığı uğrunda aparılan döyüş əməliyyatlarında iştirak edərək şəxsi igidlik və şücaət göstərən Azərbaycan Silahlı Qüvvələrinin 9424 hərbi qulluqçusu “Kəlbəcərin azad olunmasına görə” medalı ilə təltif olundu.
Vətən müharibəsində Kəlbəcərdəki strateji yüksəkliklərin götürülməsi işğalçının acı məğlubiyyətinin əsas məqamlarından biri oldu. Çünki bu yüksəkliklər ermənilərin yararlandıqları nəqliyyat-kommunikasiya infrastrukturuna nəzarət etməyə imkan verdi. Prezident İlham Əliyev bununla bağlı çıxışlarının birində dedi: “İkinci Qarabağ müharibəsinin ilk günlərində döyüşlər gedən zaman Kəlbəcərin şimal hissəsi Azərbaycan Silahlı Qüvvələri tərəfindən işğalçılardan azad edilmişdir. Biz Kəlbəcərin şimal hissəsində strateji yüksəklikləri götürərək erməni silahlı qüvvələrinin hərəkətlərini bu istiqamətdə böyük dərəcədə məhdudlaşdıra bildik və faktiki olaraq onlar Basarkeçər-Kəlbəcər yolundan istifadə edə bilmədilər. Bəzi istiqamətlərdə strateji nöqtələri götürərək Ermənistan ordusunun hərəkətlərini demək olar ki, iflic vəziyyətə salmışdıq”.
Azərbaycan Prezidenti, Silahlı Qüvvələrin Müzəffər Ali Baş Komandanı İlham Əliyev və birinci xanım Mehriban Əliyeva düşməndən təmizlənən Kəlbəcərdə 2021-ci il avqustun 16-da səfərdə olarkən, dövlətimizin başçısı burada Azərbaycan bayrağını qaldırdı və rayonda bərpa-quruculuq, tikinti işlərinə rəsmi start verdi.
Hazırda rayon ərazisində fərqli təyinatlı infrastruktur layihələri reallaşdırılır. Toğanalı-Kəlbəcər avtomobil yolu üzərində Murovdağda tunelin tikintisi həyata keçirilir. Qısa müddətdə işə salınan 110/35/10 kilovoltluq “Kəlbəcər” yarımstansiyası isə rayonun işıqlı gələcəyindən xəbər verir.
Bölmənin digər xəbərləri
