Deputat: Prezident İlham Əliyev bütün dünyanı həmrəyliyə çağıran qlobal Lider kimi özünü təsdiqləyib
Bakı, 22 noyabr, AZƏRTAC
Şəxsiyyətin liderə çevrilməsi onun cəmiyyətə verdiyi töhfələrinə görə qazandığı etimaddan irəli gəlir. Liderlər həm bir ölkə hüdudunda, həm də dünya səviyyəsində ola bilər. Bir ölkə çərçivəsində liderlik etmək o xalqın etibarını qazanmaqdan qaynaqlanır. Qlobal səviyyəli lider kimi özünü təsdiq etmək üçün isə dünya ölkələrin etibarını qazanmaq lazım olur. Prezident İlham Əliyev qlobal səviyyədə insanların sağlamlıqlarının qorunması naminə irəli sürdüyü təşəbbüsləri ilə dünya siyasətçiləri arasında xüsusi fərqlənir. Prezident İlham Əliyevin irəli sürdüyü təşəbbüslər dünya ölkələri tərəfindən qəbul olunur. Çünki dövlətimizin başçısı qlobal lider kimi özünü təsdiq edib.
Bunu AZƏRTAC-a açıqlamasında Milli Məclisin deputatı Azər Badamov deyib.
Azərbaycanın Qoşulmama Hərəkatının ən fəal üzvlərindən biri olduğunu diqqətə çatdıran deputat qeyd edib: “Qoşulmama Hərəkatında sədrlik praktiki olaraq tariximizin ən çətin zamanına təsadüf edir. İki ildir qlobal pandemiya səbəbindən ölkələr bir-birindən ayrı düşüb. Həmçinin dövlət başçıları arasında canlı təmaslar yox dərəcəsindədir. Amma Prezident İlham Əliyevin Qoşulmama Hərəkatına sədrliyi ölkələri ilk dəfə virtual məkanda birləşdirdi. Sübuta yetirildi ki, canlı təmaslar olmasa da, qlobal əhəmiyyətli məsələləri videoformatda müzakirə edərək həll yolları tapmaq mümkündür. Deyə bilərəm ki, Qoşulmama Hərəkatının beynəlxalq təşəbbüslərinin ən fəal dövrü də Azərbaycanın sədrliyi dövrünə təsadüf edib.
Prezident İlham Əliyevin təşəbbüsü ilə 2020-ci ilin mayın 4-də Qoşulmama Hərəkatının Təmas Qrupunun koronavirusla mübarizəyə həsr edilmiş Zirvə görüşü keçirildi. Tədbirdə Qoşulmama Hərəkatının sədri kimi Prezident İlham Əliyev BMT Baş Assambleyasının koronavirusla mübarizəyə həsr edilmiş dövlət və hökumət başçıları səviyyəsində xüsusi sessiyasının keçirilməsini təklif etmişdi. Bu təşəbbüsü Qoşulmama Hərəkatına üzv olan 120 ölkə hamılıqla dəstəklədi. O cümlədən BMT-nin 150-dən çox üzv dövləti də həmin təşəbbüsə dəstəyini ifadə etdi.
Beləliklə, dekabrın 3-də Nyu-Yorkda BMT Baş Assambleyasının COVID-19 pandemiyası ilə mübarizəyə həsr edilmiş dövlət və hökumət başçıları səviyyəsində xüsusi sessiyası keçirildi”.
A.Badamov qeyd edib ki, Prezident İlham Əliyevin tapşırığı ilə Azərbaycanın Qoşulmama Hərəkatı adından BMT-nin İnsan Hüquqları Şurasında irəli sürdüyü "Bütün ölkələrin peyvəndlərə bərabər və universal çıxışının təmin edilməsi" adlı qətnamənin 2021-ci ilin martında yekdilliklə qəbul olunması dünyada bu sahədə ayrı-seçkiliyi göstərən ilk çıxış idi. Dünyada peyvənd millətçiliyinə və qeyri-bərabər, ədalətsiz paylanmaya qarşı dünyanı həmrəyliyə çağırış edən ilk lider Prezident İlham Əliyev olmuşdur.
“Azərbaycan ölkə daxilində də koronavirus infeksiyasına qarşı səmərəli mübarizəyə nail oldu. Bununla yanaşı, Azərbaycan həm də dünyada bu mübarizənin səmərəli təşkilinə çağırışlar etməklə yardımlar və ianələr də vermişdir. Ölkəmiz, həmçinin Ümumdünya Səhiyyə Təşkilatına 10 milyon dollar ianə edib, 30-dan çox ölkəyə isə humanitar və maddi yardımlar göndərməklə bərabər, 4 ölkəyə 150 mindən çox vaksini yardım olaraq yollayıb. Amma bütün çağırışlarımıza baxmayaraq, dünyada peyvəndlərin bərabər əlçatanlığı hələ də təmin olunmayıb. Bu gün dünyada vaksinlərin 80 faizdən çoxu inkişaf etmiş ölkələr tərəfindən istehlak edilib. Amma kasıb ölkələrdə vaksinin əldə olunması ilə bağlı çətinlik qalmaqdadır. Belə vəziyyətin davam etməsi bu mövzuda qlobal təşəbbüslərin yenidən müzakirə olunmasının aktuallığını göstərir”, - deyə deputat əlavə edib.
Azər Badamov, eyni zamanda, vurğulayıb ki, noyabrın 18-də BMT Baş Assambleyasının 76-cı sessiyası çərçivəsində Azərbaycan Respublikası Prezidentinin təşəbbüsü ilə Qoşulmama Hərəkatının üzvləri adından irəli sürülən "COVID-19 əleyhinə peyvəndlərə bərabər, məqbul qiymətə, vaxtında və universal əlçatanlığın təmin edilməsi" adlı qətnamə BMT-yə üzv dövlətlər tərəfindən qəbul edilib. Bu qətnamənin lehinə 171 dövlət səs verib, 7-si isə bitərəf qalıb. Bitərəf qalan dövlətlərin arasında həmişə olduğu kimi, bu dəfə də Ermənistan yer alıb. Ermənistanın bitərəf qalmasının səbəbi isə bu qətnamənin Azərbaycan tərəfindən irəli sürülməsidir. Bu, həm qısqanclıqdır, həm də Ermənistanın Azərbaycanın irəli sürdüyü təşəbbüslərin dünya üçün əhəmiyyətindən asılı olmayaraq, öz düşmənçilik mövqeyinin nümayişi kimi başa düşmək olar. Əslində, Prezident İlham Əliyevin təşəbbüsünə səs verən ilk ölkələrdən biri Ermənistan olmalı idi. Çünki Ermənistan ən az vaksin əldə etmiş ölkədir. Biz də öz təşəbbüsümüzlə peyvəndə ehtiyacı olan ölkələrin vaksinlə təmin edilməsi təklifini irəli sürmüşük. Yəni, qeyd etdiyim kimi, Prezident İlham Əliyev bütün dünyanı həmrəyliyə çağıran qlobal Lider kimi özünü təsdiq edib.
Bölmənin digər xəbərləri
