Diasporla İş üzrə Dövlət Komitəsində Eskişəhər valisi ilə görüş olmuşdur
Bakı, 19 aprel (AZƏRTAC). Aprelin 19-da Diasporla İş üzrə Dövlət Komitəsinin sədri Nazim İbrahimov Azərbaycanda səfərdə olan Türkiyənin Eskişəhər şəhərinin valisi Kadir Koçdemir ilə görüşmüşdür.
AZƏRTAC xəbər verir ki, görüşdə 2013-cü il üçün türk dünyası mədəniyyət paytaxtı ilə bağlı hazırlıq işləri çərçivəsində iki qurum arasında fəaliyyətin perspektivlərinə dair məsələlər müzakirə olunmuşdur.
Eskişəhər şəhərinin valisi Kadir Koçdemir ilə yanaşı bölgənin ümumi məclis sədri Ahmet Yapıcı və Türkiyənin Azərbaycandakı səfirliyinin ikinci katibi Bahar Doğanın da iştirak etdiyi görüşdə Azərbaycan ilə Türkiyə arasında əlaqələrin daha da genişləndirilməsi istiqamətində atılan mühüm addımlardan danışılmışdır. Eskişəhərdə Azərbaycan dərnəklərinin səmərəli fəaliyyətinə də toxunulmuşdur.
Qeyd olunmuşdur ki, Eskişəhər şəhərinin 2013-cü il üçün “Türk dünyasının mədəniyyət paytaxtı” elan edilməsi təklifini 2011-ci ildə Qazaxıstanın Astana şəhərində keçirilən TÜRKSOY Mədəniyyət Nazirləri Daimi Şurasının XXIX toplantısında Türkiyənin mədəniyyət və turizm naziri Ərtoğrul Günay irəli sürmüş və bu təklif yekdilliklə dəstəklənmişdir.
Bölmənin digər xəbərləri
