Diləzbər Hüseynzadə: Ebru sənəti autizmli uşaqlara möcüzə kimi təsir göstərir - MÜSAHİBƏ
Bakı, 4 oktyabr, Fidan Əlizadə, AZƏRTAC
Rənglərin su üzərində rəqs etdiyi, hər toxunuşda yeni bir dünyanın yarandığı nadir sənət növlərindən biri də qədim türk sənəti Ebrudur. Ölkəmizdə bu sənətin tanıdılması və sevilməsi üçün “Özünü yarat” yaradıcı sənət mərkəzinin rəhbəri Diləzbər Hüseynzadə illərdir çalışır.
10 ildən artıqdır ki, bu sahədə fəaliyyət göstərən sənətçinin AZƏRTAC-a müsahibəsini təqdim edirik.
İxtisasca ibtidai sinif müəllimi olan Diləzbər Hüseynova üçün ebru yalnız bir incəsənət növü deyil, həm də uşaqlarla, böyüklərlə paylaşdığı sakitlik və yaradıcılıq yoludur.
– Ebru sənəti ilə necə tanış oldunuz?
– Mənim üçün bu sənət təsadüfi başlamadı. Əslində, incəsənət hər zaman ruhumda var idi. Ebrunu kəşf etdikdə isə suyun üzərində rənglərin necə harmoniya yaratdığını gördüm. Həmin andan qərar verdim ki, bu sənəti öyrənim və daha da inkişaf etdirim.
– Ebrunun özəlliyi nədədir?
– Bu sənətin əsas sirri xüsusi hazırlanmış suyun və boyaların üzərində fırçalarla naxışlar yaratmaqdır. Suyun üzərində yaranan hər əsər təkrarsız olur. Bu, həm sənət, həm də insan ruhu üçün bir müalicədir. İstifadə olunan su adi su deyil, xüsusi yapışqanlı olur. Boyanın içinə isə öd kisəsi qatılır ki, rənglər suyun üzərində açılsın. Fırçalar isə at tükündən hazırlanır. Əslində, hər bir detalın öz sirri var. Biz tələbələrə 3 aylıq proqramda suyun hazırlanmasını, boyaların qarışdırılmasını və müxtəlif texnikaları öyrədirik.
– Bu sahədə hansı çətinliklərlə qarşılaşırsınız?
– Ən böyük çətinlik materialların tapılmasıdır. Azərbaycanda yüksək keyfiyyətli ebru materiallarını əldə etmək çətindir. Çox vaxt Türkiyədən gətirirəm. Burada satılanların ya qiyməti baha olur, ya da keyfiyyəti zəifdir. Sənətimi daim inkişaf etdirmək üçün hər il Türkiyədə müəllimlərimin təkmilləşdirmə dərslərində iştirak edirəm.
– Bu sənətin insana hansı təsirləri olur?
– Ən önəmlisi, insanın ruhunu dincəldir. Su bütün yorğunluğu götürür. İş stressini atmaq, sakitləşmək üçün Ebru əsl vasitədir. Eyni zamanda, bu sənət insanların diqqətini, səbrini və yaradıcılıq bacarığını artırır. Mənim pedaqoji təcrübəm var və deyə bilərəm ki, uşaqlarla Ebru sənətində işləmək xüsusi zövqdür. Onlar çox səmimi olur və rənglərə başqa cür yanaşırlar. Hətta ruhu uşaq qalan böyüklər belə bu sənətdə özlərini azad hiss edirlər. Autizmli uşaqlara isə Ebru möcüzə kimi təsir göstərir. Enerjilərini düzgün istiqamətə yönəltməyə kömək edir. Mənim missiyam Azərbaycanda Ebru sənətini yüksək səviyyədə təbliğ etməkdir. İnsanlara göstərmək istəyirəm ki, rənglərin və suyun harmoniyası ilə həyat daha gözəldir.
Bölmənin digər xəbərləri
