DİN “Qarabağ”–“Çelsi” oyunu zamanı görüləcək təhlükəsizlik tədbirlərini açıqlayıb
Bakı, 3 noyabr, AZƏRTAC
Noyabrın 5-də “Qarabağ”ın UEFA Çempionlar Liqasının əsas mərhələsində İngiltərənin “Çelsi” klubuna qarşı keçirəcəyi matçla əlaqədar bütün iştirakçıların, eləcə də məkanın təhlükəsizliyi polis əməkdaşları tərəfindən təmin ediləcək.
Bu barədə AZƏRTAC-a Daxili İşlər Nazirliyindən (DİN) məlumat verilib.
DİN-in mətbuat xidmətinin əməkdaşı Cəsarət Qənbərli bildirib ki, polis əməkdaşları tərəfindən azarkeşlər xüsusi detektorlarla yoxlanılacaq və qadağan olunmuş əşyalarla stadiona giriş məhdudlaşdırılacaq: “Burada polis əməkdaşları tərəfindən fasiləsiz xidmət təşkil olunacaq. Futbol oyunları zamanı birmənalı olaraq şüşə və metal əşyalar, kəsici-deşici alətlər, dəyənəklər, fişəng, partlayıcı maddələr, səsgücləndirici qurğular, iri çantaların stadionlara buraxılması qadağandır. Çünki bu əşyalar stadionda futbolçularla yanaşı, məşqçilər korpusu, oyunu idarə edən hakimlər briqadası və izləyən tamaşaçıların təhlükəsizliyini təhdid altına alır”.
Qeyd edək ki, noyabrın 5-də Tofiq Bəhramov adına Respublika Stadionunda keçiriləcək “Qarabağ”–“Çelsi” görüşü saat 21:45-də başlayacaq. İlk 3 turdan sonra hər iki komandanın aktivində 6 xal var. Azərbaycan çempionu 13-cü, London klubu isə 11-ci pillədə qərarlaşıb.
Bölmənin digər xəbərləri
