Dini Qurumlarla İş üzrə Dövlət Komitəsi dini icmalar arasında müsabiqə elan edir
Bakı, 19 mart, AZƏRTAC
Azərbaycan Respublikasının Dini Qurumlarla İş üzrə Dövlət Komitəsi Azərbaycan Xalq Cümhuriyyətinin 100 illik yubileyi münasibətilə dini icmaların üzvləri arasında “Azərbaycan Xalq Cümhuriyyəti dövründə dövlət-din münasibətləri” mövzusunda məqalə müsabiqəsi elan edir.
Dövlət Komitəsinin mətbuat xidmətindən AZƏRTAC-a bildiriblər ki, müsabiqəyə təqdim edilən məqalə mövzuya uyğun olmalı, elandan sonra qəzet, informasiya agentlikləri və ya xəbər saytlarında dərc edilməli, həcmi 8 min işarədən artıq olmamalıdır (1,5 aralıq məsafə ilə təxminən 3-4 A4 formatlı vərəq həcmində). Yazılar qəzetdə dərc edilərsə A4 formatlı vərəqdə (Times New Roman, 14 şrift) və 1 nüsxə qəzet şəklində, elektron media resursunda yayımlanarsa A4 formatlı vərəqdə (Times New Roman, 14 şrift) çap olunmalı və link əlavə edilərək Dövlət Komitəsinə təqdim edilməlidir.
Birinci yerin qalibinə 500 AZN, ikinci yeri tutana 400 AZN, üçüncü yerə layiq görülənə isə 300 AZN mükafat veriləcək. Bundan başqa, üç həvəsləndirici mükafat (100 AZN) da nəzərdə tutulub.
Müsabiqə üçün yazılar martın 27-dən aprelin 17-dək təqdim edilməlidir. Əlaqə telefonları: (012) 492-65-23/(012) 497-09-88. E-mail: [email protected]. Ünvan: Bakı şəhəri, Əhməd Cavad küçəsi 12.
Bölmənin digər xəbərləri
