Dneprdə Azərbaycan diasporu 20 Yanvar şəhidlərinin əziz xatirəsini yad edib
Kiyev, 20 yanvar, AZƏRTAC
Ukraynanın Dnepr şəhərində Azərbaycanın diaspor fəalları, soydaşlarımız 20 Yanvar faciəsinin 36-cı ildönümü ilə bağlı anım tədbiri keçiriblər.
AZƏRTAC xəbər verir ki, 1990-cı il yanvarın 19-dan 20-nə keçən gecə Bakıda həlak olanların xatirəsini yad etmək məqsədilə təşkil olunan tədbirdə əvvəlcə Dövlət Himni səsləndirilib.
“Dnepropetrovsk vilayəti azərbaycanlıları liqası”nın sədri Sərxoş İsmayılov, tanınmış tarixçi Eldar Tağıyev, diaspor fəalları İqbal Zeynalov, Rövşən Nəbiyev, Təbriz Əlizadə və başqaları çıxışlarında vurğulayıblar ki, 1990-cı il yanvarın 20-də baş verən qanlı hadisələr Azərbaycan xalqının həqiqi azadlıq arzusunu məhv edə bilməyib.
Qeyd olunub ki, qardaş Ukrayna və Azərbaycan xalqların tarixində çoxlu ortaq cəhətlər var və onları birləşdirən əsas xüsusiyyətlər ədalətə, azadlığa və həqiqi müstəqilliyə can atmaqdır.
“Biz çox rəmzi bir tarixdə toplaşmışıq. Məhz 1990-cı ilin yanvar günlərində Bakıya sovet qoşunları yeridildi və dinc əhaliyə qarşı qanunsuz, qanlı qətliam törədildi. Bu faciəli hadisələr Azərbaycan dövlətçiliyi və müstəqilliyi uğrunda mübarizənin simvoluna çevrildi”, - deyə S.İsmayılov qeyd edib.
Həlak olanların xatirəsi dualarla, bir dəqiqəlik sükutla və memorial instalyasiya önündə rəmzi şamların yandırılması ilə yad edilib. Faciələrin xronikasını və azadlığa gedən yolu əks etdirən kitablar və fotomateriallar nümayiş etdirilib.
Yanvar hadisələri və müasir fəaliyyət haqqında “Bazar günü məktəbi”nin direktoru Yaqut Bəşirova məlumat verib.
Sonra şagirdlər vətənpərvər şeirlər səsləndirərək həlak olanların xatirəsinə dərin ehtiram ruhunda xüsusi mənəvi ab-hava yaradıblar.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
