Donald Tramp: ABŞ İranla nüvə razılaşmasına yaxındır
Bakı, 15 may, AZƏRTAC
ABŞ Prezidenti Donald Tramp Tehranla Vaşinqtonun İranın nüvə proqramı ilə bağlı razılığa gəlməyə yaxın olduqlarını düşünür.
AZƏRTAC xəbər verir ki, Birləşmiş Ştatların dövlət başçısı bunu Dohada ABŞ və Qətərin işgüzar dairələrinin nümayəndələri ilə görüşündə deyib.
“Tehran bizim şərtlərimizlə razılaşıb. Onların işlərinin yaxşı getməsini istəyirəm. İran böyük ölkədir, lakin onların nüvə silahına malik olmasına yol verə bilmərik. Bu, çox sadədir və 30 səhifəlik sənədə ehtiyac yoxdur. Düşünürəm ki, biz saziş bağlamağa yaxınıq", - deyə Donald Tramp bildirib.
Uzunmüddətli sülh əldə etmək üçün Tehranla çox ciddi danışıqlar apardıqlarını vurğulayan ABŞ lideri İranın nüvə proqramı ilə bağlı böhranı “sərt yolla deyil, ağlabatan yolla” həll etmək istədiklərini qeyd edib. Donald Tramp, həmçinin vurğulayıb ki, o, “misli görünməmiş zorakılığa” deyil, “doğru yola” üstünlük verir.
Xatırladaq ki, ABŞ və İran Omanın vasitəçiliyi ilə son aylarda Tehranın nüvə proqramı ilə bağlı fikir ayrılıqlarını həll etmək üçün dörd raund danışıqlar aparıb.
Bölmənin digər xəbərləri
