Donald Tramp Səudiyyə Ərəbistanına dövlət səfəri edib
Bakı, 13 may, AZƏRTAC
ABŞ Prezidenti Donald Tramp vəzifəyə başladıqdan sonra ilk dövlət səfərini Səudiyyə Ərəbistanına edib.
AZƏRTAC xəbər verir ki, Al Arabiya telekanalının məlumatına görə, Donald Trampın təyyarəsi Ər-Riyad şəhərinin “Kral Xalid” beynəlxalq hava limanına enib. ABŞ Prezidentinin bu gün Səudiyyə Ərəbistanı rəhbərliyi ilə görüşəcəyi və iki dövlət arasında investisiya forumunda iştirak edəcəyi gözlənilir.
Birləşmiş Ştatların dövlət başçısı mayın 13-dən 16-dək Səudiyyə Ərəbistanı, Qətər və Birləşmiş Ərəb Əmirliklərinə səfər edəcək. Aprelin sonunda Papa Fransiskin dəfn mərasimində iştirakı nəzərə alınmazsa, bu, Donald Trampın ilk xarici səfəridir. ABŞ nümayəndə heyətinə Dövlət katibi Marko Rubio, Pentaqonun rəhbəri Pit Heqset və maliyyə naziri Skott Bessent də daxil edilib.
Səfər çərçivəsində ərəb monarxiyaları ilə investisiya əməkdaşlığının genişləndirilməsi məsələlərinə diqqət yetiriləcək. Görüşlər zamanı, həmçinin müdafiə və təhlükəsizlik məsələləri, o cümlədən Qəzza sektoru, Yəmən və Ukraynadakı münaqişələrin həlli ilə bağlı mövzular müzakirə ediləcək.
Bölmənin digər xəbərləri
