Dövlət İdarəçilik Akademiyasında soyqırımı qurbanlarının xatirəsi yad edilmişdir
Bakı, 30 mart (AZƏRTAC). Azərbaycan Respublikasının Prezidenti yanında Dövlət İdarəçilik Akademiyasında (DİA) 31 mart - Azərbaycanlıların Soyqırımı Günü ilə əlaqədar anma mərasimi keçirilmişdir.
DİA-nın mətbuat xidmətindən AZƏRTAC-a bildirmişlər ki, tədbirdə soyqırımı qurbanlarının xatirəsi bir dəqiqəlik sükutla yad edilmişdir.
Akademiyanın birinci prorektoru, professor Əlikram Abdullayev azərbaycanlıların soyqırımı tarixindən, XX əsrin əvvəllərində erməni millətçiləri və daşnakların “böyük Ermənistan” yaratmaq xülyası ilə Bakıda və şəhərətrafı kəndlərdə, eləcə də Şamaxıda, Qubada, Qarabağda, Zəngəzurda, Naxçıvanda, Cənubi Azərbaycanda, Şərqi Anadoluda və digər ərazilərdə vaxtaşırı qırğınlar, talanlar, yanğınlar, terror və digər zorakılıq aktları həyata keçirmələrindən danışmışdır. O, tədbir iştirakçılarına əsrlər boyu soyqırımı və depressiyaya məruz qalmış xalqımızın başına gətirilən müsibətlər barədə ətraflı məlumat vermişdir.
Bütün sahələrdə olduğu kimi, Azərbaycan dövlətinin milli maraqlarının qorunması istiqamətində də ulu öndər Heydər Əliyevin siyasətini uğurla davam etdirən Prezident İlham Əliyevin xalqımızın haqq səsini dünya ictimaiyyətinə çatdırmaq üçün bütün mötəbər tribunalardan istifadə etdiyini, məhz onun rəhbərliyi altında Azərbaycanın həyata keçirdiyi diplomatiyanın bu gün təcavüzkar Ermənistanı çıxılmaz vəziyyətdə qoyduğu vurğulanmışdır.
Tədbir iştirakçılarına Azərbaycanın əzəli torpaqlarında erməni dövlətinin yaradılmasına zəmin hazırlığını nümayiş etdirən XVIII -XIX əsrlərə aid Rusiya İmperiyasının hərbi mütəxəssisləri tərəfindən tərtib olunmuş xəritə təqdim edilmişdir. Bu xəritələr İrəvan, Naxçıvan, Qarabağ xanlıqları hesabına erməni vilayətinin yaradılmasının və Azərbaycanın torpaqlarına qarşı təcavüzün təkzibolunmaz sübutudur.
Akademiyanın tarix kafedrasının müdiri Firdovsiyyə Əhmədova, professorlar Namiq Axundov, Musa Quliyev, Nigar Ələkbərova və başqaları ermənilərin ölkəmizə qarşı apardıqları mənfur siyasət və onların havadarları tərəfindən əsrlər boyu başımıza gətirilən faciələr barədə danışmışlar. Onlar bu qanlı hadisələrə beynəlxalq ictimaiyyət və təşkilatlar tərəfindən tezliklə layiqli qiymətin veriləcəyinə əminliklərini bildirmişlər.
Bölmənin digər xəbərləri
