DÜNYADA İLK ƏRİŞTƏ 4 MİN İL ƏVVƏL ÇİNDƏ HAZIRLANMIŞDIR

13.10.2005 [13:22]
Çap et
A⁺ A^-

Dünyada ilk əriştə 4 min il əvvəl qədim Çində hazırlanmışdır. AZƏRTAC-ın İTAR-TASS agentliyindəın aldığı xəbərə görə, Çin Elmlər Akademiyasının bir qrup alimi “Neyça” elmi jurnalının səhifələrində bu fikri irəli sürmüşdür.

Alimlər Xuanxe çayının deltasında yerləşən qədim Latszya kəndində arxeoloji qazıntılar zamanı bu xəmir məmulatının qalıqları olan kip bağlanmış gil kasa tapmışlar. Ekspertlərin sözlərinə görə, sarımtıl rəngli, kifayət qədər nazik və təxminən 50 santimetr uzunluğunda əriştə çinlilərin sevimli “lamyan” əriştəsinə bənzəyirdi. Tapıntının yaşını müəyyənləşdirmək üçün radioaktiv karbon izotopunun ölçülməsi üsulundan istifadə olunmuşdur.

Əvvəllər güman edilirdi ki, əriştənin vətəni Yaxın Şərqdir və italyanlar məşhur spagettilərini ərəblərdən əxz etmişlər. Çində isə əriştə barədə erkən məlumata hələ eramızdan əvvəl III əsrdə rast gəlinir. O vaxt əriştə darıdan hazırlanırdı.

Həmin dövrdən düyü ilə yanaşı, əriştə hər bir çinlinin sevimli təamına çevrilmişdir.