DÜNYANIN ƏN HÜNDÜR TORTU İRANDA HAZIRLANMIŞDIR

10.02.2004 [13:07]
Çap et
A⁺ A^-

AZƏRTAC-ın Tehrandan aldığı xəbərə görə, İranın Mazandaran əyalətində konditerlər dünyada ən böyük tort hazırlamışlar. Onun hündürlüyü 22 metrdir və o, farsca “Ba Əli” (Əli ilə) yazısı formasına malikdir. Əyalətin Sari şəhərinin konditerləri bu yolla şiələrin bayramını - Məhəmməd peyğəmbərin şiələrin böyük məhəbbət bəslədikləri 12-ci İmam Əlini öz varisi elan etdiyi günü qeyd etməyi qərara almışlar.

15 nəfərin hazırladığı 7 tonluq tortun üzərindəki örtük fevralın 10-da Qədir bayramında götürüləcəkdir. Örtük İranın dövlət bayrağının rəmzi olan 3 rəngli 300 qatdan ibarətdir. Təntənəli mərasim qapalı binada keçiriləcək və onu seyr etməyi arzulayanlar bilet almalı olacaqlar. Biletlərin satışından əldə olunan gəlirin hamısı Bəm şəhərindəki zəlzələ nəticəsində valideynsiz qalan uşaqlara, eləcə də Mazandaran əyalətinin yetim uşaqlarına yardım fonduna köçürüləcəkdir.

Avstriya konditerlərinin hazırladıqları və hündürlüyü 18 metr olan tort indiyə qədər dünyada ən hündür tort hesab edilirdi.