QAN YADDAŞI
EFİRDƏ YARIM SAAT XOCALI FACİƏSİ HAQQINDA
Berlin, 19 fevral (AZƏRTAC). Diaspor ilə İş üzrə Dövlət Komitəsi başçısının birinci müavini Valeh Hacıyev və Azərbaycan-Almaniya Forumunun prezidenti Otto Hauzer Almaniyanın “FOX” telekanalında fevralın 26-da efirə veriləcək Xocalı soyqırımı haqqında yarım saatlıq verilişdə çıxış edəcəklər.
Valeh Hacıyev, Maynts şəhərindəki Azərbaycan Cəmiyyətinin başçısı Bəşər Kömür və Frankfurt Azərbaycan Cəmiyyətinin sədri Kəmalə İskəndərovanın “Avropa kanalı” telekanalında çıxış edəcəkləri gözlənilir. Almaniya Azərbaycanlıları Əlaqələndirmə Şurasının rəhbəri Samirə Patser-İsmayılova AZƏRTAC-ın xüsusi müxbirinə bildirmişdir ki, soyqırımı qurbanlarının Berlində keçiriləcək xatirə gecəsinə Almaniya Bundestaqının deputatlarından bir qrupu dəvət olunmuşlar. Erməni silahlı quldur dəsətələrinin Xocalıda törətdikləri vəhşiliklərdən bəhs edən sənədli film nümayiş etdiriləcək, bu faciəni əks etdirən uşaq rəsmləri sərgisi təşkil olunacaqdır.
Vüqar Seyidov
AZƏRTAC-ın xüsusi müxbiri
Berlin