Ekoaktivistlər: Biz Ermənistan hökumətinin biomüxtəlifliyi kobud şəkildə pozmasının şahidi olmuşuq
Bakı, 1 fevral, AZƏRTAC
“Biz Keniyada fəaliyyət göstərən bir təşkilat olaraq Ermənistan hökumətinin ətraf mühitin ekologiyasına vurduğu ciddi ziyanı və dağ-mədən sektorunda aparılan qeyri-qanuni işləri pisləyirik”.
AZƏRTAC xəbər verir ki, bunu Keniyada fəaliyyət göstərən Beynəlxalq TUBAE Təşkilatının rəhbəri Emeri Eliud deyib.
O bildirib ki, Ermənistanın dağ-mədən sektoru Şərqi Avropa və Mərkəzi Asiya ərazisində bir sıra ekoloji problemlərə səbəb olub: “BMT təmiz, sağlam və davamlı ətraf mühiti əsas insan hüquqlarından biri kimi tanıyır. Qlobal ictimaiyyətin BMT-nin Dayanıqlı İnkişaf Məqsədlərinə nail olmaq üçün səfərbər olduğu, ekoloji problemlərin həlli üçün səylərini gücləndirdiyi bir vaxtda Ermənistan hökumətinin bu hərəkətləri Transsərhəd Çaylar Konvensiyası və BMT-nin Avropa İqtisadi Komissiyasının Transsərhəd Kontekstdə Ətraf Mühitə Təsirin Qiymətləndirilməsi Konvensiyasının (Espoo Konvensiyası) tələblərini ciddi şəkildə pozur.
“2024-cü ilin noyabrında Cənubi Qafqazda - Azərbaycanın paytaxtı Bakı şəhərində keçirilməsi planlaşdırılan COP29-a hazırlaşdığımız bir vaxtda düşünürük ki, Ermənistan ətraf mühitin qorunması ilə bağlı üzərinə götürdüyü beynəlxalq konvensiyalardan irəli gələn öhdəliklərini yerinə yetirməlidir.
Ətraf mühitin müdafiəçiləri kimi biz Birləşmiş Millətlər Təşkilatının İqlim Dəyişikliyi üzrə Çərçivə Konvensiyasından irəli gələn öhdəlikləri yerinə yetirməyən tərəflərə qarşı konkret qətnamələr müəyyən etmək üçün tərəf dövlətlərin auditini aparmağa çağırırıq. Belə ki, həll yollarına zidd olan bu addımları aradan qaldırmaq üçün dəqiq hüquqi çərçivə yaradılmalıdır. Biz Ermənistan hökumətinin ətraf mühitin mühafizəsini və biomüxtəlifliyi kobud şəkildə pozan hərəkətlərinin şahidi olmuşuq”.
Bölmənin digər xəbərləri
