EKOLOGİYA VƏ TƏBİİ SƏRVƏTLƏR NAZİRLİYİNİN İŞÇİLƏRİ PEŞƏ BAYRAMLARINI QEYD ETMİŞLƏR
Bakı, 24 may (AZƏRTAC). Mayın 24-də Ekologiya və Təbii Sərvətlər Nazirliyinin işçiləri peşə bayramlarını qeyd etmişlər.
Bayram münasibətilə nazirlikdə təşkil olunmuş tədbirdə ekologiya və təbii sərvətlər naziri Hüseynqulu Bağırov çıxış edərək vurğulamışdır ki, Azərbaycan Prezidenti İlham Əliyevin rəhbərliyi altında son bir neçə ildə ekoloji vəziyyətin sağlamlaşdırılması sahəsində ardıcıl və məqsədyönlü işlər görülmüşdür.
Nazir bildirmişdir ki, təbiətin qorunması, insanların sağlam mühitdə yaşaması və təbii sərvətlərdən xalqın rifahının yaxşılaşdırılması naminə istifadəsi məsələsi hazırda ölkədə aparılan sosial-iqtisadi islahatlarda mühüm yer tutur. 2010-cu ilin “Ekologiya ili” elan olunması da bunun bariz nümunəsidir.
Yeni Azərbaycan Partiyası sədrinin müavini-icra katibi, Milli Məclisin deputatı Əli Əhmədov ölkəmizdə bütün sahələrlə yanaşı, ətraf mühitin sağlamlaşdırılması istiqamətində görülən işlərdən də danışmışdır. O, ekoloqları bayram münasibətilə təbrik etmiş, Prezidentin müvafiq Sərəncamı ilə nazirliyin 6 əməkdaşının ətraf mühitin qorunmasındakı xidmətlərinə görə “Tərəqqi” medalı ilə, 4 nəfərin “Dövlət qulluğunda fərqlənməyə görə”, 2 nəfərin isə “Azərbaycan Respublikasının əməkdar mühəndisi” fəxri adı ilə təltif olunmasını dövlətin bu sahəyə qayğıkeş münasibəti kimi qiymətləndirmişdir.
Təltif olunan şəxslər dövlətin onlara göstərdiyi diqqətə görə minnətdarlıqlarını bildirmişlər.
Sonda nazirliyin bir sıra əməkdaşına fəxri fərmanlar verilmişdir.
Bölmənin digər xəbərləri
