Ekspert: “Ətir bahalıdırsa, qalıcı olmalıdır” fikri yanlışdır
Bakı, 21 aprel, AZƏRTAC
Ətir əsrlər boyu insanların gündəlik həyatında, mədəniyyətində və estetik dünyagörüşündə mühüm yer tutub. Müasir dövrdə ətir xoş qoxu vasitəsi olmaqla yanaşı, həm də fərdi üslubun və zövqün ifadə formasıdır. Onun düzgün seçimi və istifadəsi insanın fərdi imicini tamamlayır. Lakin sağlamlıq və keyfiyyət amilləri hər zaman nəzərə alınmalıdır.
AZƏRTAC-ın əməkdaşı ətir seçimi, onun hazırlanma prosesi, keyfiyyət amilləri, ətir alarkən ən çox diqqət edilməli məqamlarla bağlı ekspert Sübhi Xəlilbəyovla söhbətləşib.
O, əvvəlcə ətrin hazırlanması prosesi barədə məlumat verib. Bildirib ki, ilkin olaraq çiçəklərdən, ağaclardan xüsusi yağlar, yeni essensiyalar alınır, sonra ətir hazırlayanlar onları qarışdırırlar: “Ətir qoxunun keyfiyyətli olması üçün xüsusi qablarda aylarla saxlanılır. Bu proses parfümeriya sahəsində “Maceration” adlanır”.
Ətirdən istifadə edərkən nələrə diqqət etmək lazımdır?
Ekspert qeyd edib ki, əsas məsələ ətri harada və necə istifadə etməkdən asılıdır: “Ətri həmişə nəbz vuran yerlərə - boyuna, biləyin içinə vurmaq lazımdır ki, qoxu ətrafa yaxşı yayılsın. Əgər qalıcılığa önəm verilirsə, bu zaman ətri paltara vurmaq məsləhətdir. Pambıq geyimlərdə qoxu daha çox qalacaq. Bir də ən böyük səhv ətri vurandan sonra biləkləri bir-birinə sürtməkdir. Bu çox yanlışdır, çünki qoxunun molekulları tez buxarlanır və açılış sıralaması pozulur. Bir də ətri nəm dəriyə vuranda qalıcılığı lap çox olur”.
Ətrin insan üçün müsbət və mənfi xüsusiyyətləri nədir?
Onun sözlərinə görə, ətirlərin müsbət tərəfi odur ki, aura dəyişir, gözəl qoxu insana özgüvən verir: “Çünki qoxu birbaşa yaddaşla bağlıdır. Keçmişi, xoş günləri, xarakteri xatırlada bilər. Mənfi tərəfi də odur ki, bəzi ucuz, keyfiyyətsiz ətirlər insana başağrısı verir, miqren yaradır, hətta həssas dərisi olanlarda allergiya da verə bilir. Keyfiyyətli ətri tanımaq o qədər də çətin deyil, ətri ilk vuranda ondan acı spirt qoxusu gəlməməlidir. Buruna birbaşa təmiz notlar gəlməlidir. Sonra da ətir dəridə dəyişməlidir. 15-20 dəqiqədən sonra ətir açılır və ayrı qoxu verir. Bundan əlavə, ətir nöqtə kimi bir yerə vurulmalı deyil, o duman kimi səpələnməlidir”.
Ətir alarkən ən çox edilən səhvlər hansılardır?
Sübhi Xəlilbəyov ətir alarkən ən çox rast gəlinən səhvin onu balaca kağızlarda qoxulamaq olduğunu bildirib: “Ətir mütləq dəriyə vurulmalı və gözlənilməlidir. Bir də insanlar çox vaxt ətri vuran kimi qoxulayıb alırlar, halbuki o qoxu 10 dəqiqəyə uçub gedəcək. Ən azı 20 dəqiqə gözləmək lazımdır. Bundan başqa, insanlar bir-birinin ardınca 4-5 ətri qoxulayıb alırlar. Bu isə burnu yorur, ona görə də səhv seçim edirlər. Əlavə olaraq 3-4 ətri qoxulamısınızsa, burun növbəti ətri seçə bilməyəcək. Bunun üçün 10-15 dəqiqə təmiz hava almaq və 1 stəkan su içmək lazımdır. Kofeni qoxulamaq isə mifdir, çünki onun özü də bir qoxudur”.
Ətrin qalıcılığı nədən asılıdır?
Ekspert vurğulayıb ki, hər kəs elə bilir ki, ətir bahalıdırsa, qalıcı olmalıdır, amma bu fikir yanlışdır: “Bu məsələdə əsas iki şərt var. Birincisi, tərkibindəki yağın faizi, yəni parfüm və ya üzərində (EDP) yazılanlar həmişə daha qalıcı olur. İkincisi, notları sitrus, gül qoxulu olan ətirlər təbii ki, tez uçacaq. Amma ətrin tərkibində ud, ağac, vanil varsa, qoxu dəridə günlərlə qala bilər”.
Ətir insanlarda niyə fərqli qoxur?
O bildirib ki, bir ətrin ayrı-ayrı insanlarda fərqli qoxuması tamamilə orqanizmlə bağlıdır: “Hər kəsin dərisinin bir xüsusiyyəti var. Eyni ətirdən iki müxtəlif şəxs istifadə etsə də, nəticə fərqli olacaq. Belə ki, yağlı dəridə ətir tez uçur. Bundan başqa, qidalanma da birbaşa qoxuya təsir edə bilir. Məsələn, ədviyyatlı qidalardan istifadə edənlərin orqanizmindən hər zaman özünəməxsus spesifik qoxu gəlir”.
Müxbir - Günel Türksoy, Murad Hüseynli
Bölmənin digər xəbərləri
