Ekspert: WUF13 təhsil sahəsində yeni əməkdaşlıqlar üçün imkan yaradacaq
Bakı, 20 may, AZƏRTAC
Artıq ölkəmiz bir sıra beynəlxalq tədbirlərə uğurla ev sahibliyi edib və bu sahədə ciddi təcrübə qazanıb. Beynəlxalq ictimaiyyət tərəfindən nüfuzlu hesab olunan tədbirlərin Azərbaycanda keçirilməsi daim dünya dövlətlərinin diqqət mərkəzində olur. Ötən illərdə Bakıda keçirilən COP29 beynəlxalq tədbiri də Azərbaycanın etibarlı və təhlükəsiz ölkə olduğunu beynəlxalq ictimaiyyətə açıq şəkildə nümayiş etdirdi. Azərbaycanın iqtisadi inkişafı, müstəqil siyasəti və təhlükəsizliyi diqqətdən kənarda qalmadı.
Bu fikirləri AZƏRTAC-a müsahibəsində təhsil eksperti Ramin Nurəliyev deyib. O bildirib ki, Ümumdünya Şəhərsalma Forumunun 13-cü Sessiyası (WUF13) çərçivəsində də təhsil sahəsində yeni əməkdaşlıqlar üçün imkanlar yaranacaq: “Biz bunun nümunəsini COP29 zamanı gördük. Prezident İlham Əliyevin müxtəlif dövlət başçıları ilə memorandumlar imzalaması, elm və təhsil naziri Emin Əmrullayevin bir sıra ölkələrin nümayəndələri ilə təhsil sahəsində əməkdaşlıq təşəbbüsləri irəli sürməsi və müqavilələrin bağlanması mühüm addımlar idi. Bu təşəbbüslər nəticəsində Hökumətlərarası Təqaüd Proqramlarının (HTP) sayı artdı, xarici tələbələrin Azərbaycanda təhsilinə maraq gücləndi. Hesab edirəm ki, WUF13 çərçivəsində də beynəlxalq əməkdaşlıqlar genişlənəcək, HTP-də iştirak edən ölkələrin sayı artacaq. Forumdan sonra Azərbaycan bir çox tərəfdaş ölkə ilə tələbə mübadiləsi proqramlarını inkişaf etdirəcək. Həm Azərbaycan vətəndaşlarının xaricdə, həm də xarici tələbələrin Azərbaycanda təqaüdlə təhsil imkanları daha da genişlənəcək. Bu tədbir Azərbaycanın təhlükəsiz ölkə imicini daha da gücləndirəcək. Belə beynəlxalq forumlara ev sahibliyi edən ölkələrin təhlükəsizliyi hər zaman diqqət mərkəzində olur. Azərbaycanın dost və tərəfdaş ölkə kimi tanınması isə burada təhsil almaq istəyən xarici tələbələrin sayına müsbət təsir göstərəcək”.
Ekspertin sözlərinə görə, forumda Azərbaycan universitetlərinin iştirakı və tələbələrin aktiv fəaliyyəti də bu əməkdaşlığa əlavə təkan verəcək: “Azərbaycan universitetləri ilə xarici dövlətlərin ali təhsil müəssisələri arasında ikili diplom proqramları üzrə yeni müqavilələr imzalana bilər. “Erasmus” proqramlarının sayı arta, xarici universitetlərin Azərbaycanda filiallarının açılması və birgə ali təhsil layihələrinin həyata keçirilməsi mümkün ola bilər. Təhlükəsiz ölkədə təhsil almaq istəyən xarici tələbələr üçün Azərbaycan universitetləri əlverişli seçimdir. Tədbirdə təmsil olunan dövlət nümayəndələri ölkəmizin iqtisadi gücünü gördükdən sonra əməkdaşlıqda daha maraqlı olacaqlar. Dünya mediasında Azərbaycanla bağlı məlumat və videogörüntülərin yayılması ölkəmiz haqqında müsbət ictimai rəy formalaşdıracaq. Bu da turizm sektoruna da müsbət təsir göstərəcək. Həm tədbir iştirakçılarında, həm də onların təmsil etdikləri ölkələrin vətəndaşlarında Azərbaycana maraq artacaq.
Forumun yüksək səviyyədə təşkili ölkədə nizam-intizamın və sistemli fəaliyyətin göstəricisi olacaq. Bu yanaşma digər sahələrdə olduğu kimi, təhsil sektorunda da diqqəti cəlb edəcək. Nəticə etibarilə müxtəlif istiqamətlərlə yanaşı, təhsil sahəsində də beynəlxalq əməkdaşlıqlar daha da genişlənəcək”.
Bölmənin digər xəbərləri
