Əl-Küveytdə Azərbaycanın müstəqilliyinin 107-ci ildönümünə həsr olunmuş rəsmi qəbul keçirilib
Qahirə, 28 may, AZƏRTAC
Küveytdə Azərbaycan səfirliyi tərəfindən ölkəmizin müstəqilliyinin 107-ci ildönümünə həsr edilmiş rəsmi qəbul təşkil olunub.
AZƏRTAC xəbər verir ki, tədbirdə Küveyt Xarici İşlər Nazirliyinin rəsmiləri, Küveyt Dövlətinin Azərbaycan Respublikasındakı sabiq diplomatları, hakim ailənin üzvləri, yerli ictimaiyyətin tanınmış və nüfuzlu ictimai-siyasi xadimləri, ölkəmizdə təhsil almış küveytlilər, Küveyt Dövlətinin Səhiyyə, Təhsil, İnformasiya, Daxili İşlər, Sosial Müdafiə, Ticarət, Gömrük Nazirliklərinin əməkdaşları, Küveytin ali təhsil ocaqlarının, elmi araşdırmalar və beyin mərkəzlərinin nümayəndələri, akkreditə olunmuş diplomatik nümayəndəliklərin rəhbərləri və diplomatları, Küveyt Dövlətində yaşayan Türk icmasının, habelə bu ölkədə yaşayan və təhsil alan Azərbaycan icmasının üzvləri iştirak ediblər.
Rəsmi qəbulda əsas qonaq qismində Küveyt Dövlətinin xarici işlər nazirinin müavini Şeyx Carrah Cabir əl-Əhməd əl-Sabah iştirak edib.
Rəsmi qəbul Azərbaycanın və Küveytin Dövlət himnlərinin səsləndirilməsi ilə başlanıb.
Səfir Emil Kərimov çıxışında 107-ci ildönümünü qeyd etdiyimiz Müstəqillik Gününün bağlı olduğu tarixi dövr haqqında danışıb. Qeyd edilib ki, 1918-ci il mayın 28-də müsəlman dünyasında ilk dəfə olaraq Azərbaycan Xalq Cümhuriyyəti yaradılıb və dövlət rəmzləri təsdiq olunub, Parlament seçilib, dövlət institutları və universitet təsis edilib.
Azərbaycan Xalq Cümhuriyyətinın keçdiyi mərhələlərə toxunan diplomat 1920-ci ildə Paris Sülh Konfransında onun tanındığını və bununla da Azərbaycanda xarici nümayəndəliklərin akkreditə olunduğunu bildirib.
Müstəqilliyimizin 1991-ci ildə bərpasından sonra ilk illərdə ölkəmizdə xaos və iqtisadi böhranın, çox ağır sosial vəziyyətin hökm sürdüyünü və ölkəmizin vətəndaş müharibəsi təhlükəsi ilə üzləşdiyini bildirən səfir 1993-cü ildə Azərbaycan Prezidenti seçilən Ümummilli Lider Heydər Əliyevin səyləri nəticəsində sabitliyin bərpa olunduğunu qeyd edib.
Eyni zamanda, səfir Azərbaycan-Küveyt münasibətlərinin daim inkişaf edən dinamikasına diqqəti cəlb edərək, əsası 1994-cü ildə İslam Konfransı Təşkilatının Kasablankada keçirilən Zirvə Konfransında dövlətimizin başçısı Heydər Əliyevlə Küveyt Əmiri Şeyx Cabir Əl-Əhməd Əl-Sabah arasında baş tutmuş görüşdə qoyulmuş ikitərəfli əlaqələrin sonrakı illərdə daha da möhkəmləndiyini bildirib. Qeyd olunub ki, Azərbaycan Respublikasının Prezidenti İlham Əliyevin 2009-cu ildə Küveytə rəsmi səfərindən sonra ölkələrimiz arasında münasibətlərdə yeni dövr başlanıb.
Vurğulanıb ki, ölkələrimiz arasında baş tutan yüksək səviyyəli qarşılıqlı səfərlər və bu əsnada keçirilən görüşlər ikitərəfli əlaqələrin daha da inkişafına töhfə verməkdədir. Bu kontekstdə ötən il Küveyt Dövlətinin Vəliəhdi Şeyx Sabah Xalid əl-Haməd əl-Sabahın Bakıda COP29-un Liderlər Sammitində iştirak etməsinin və səfər çərçivəsində Azərbaycan Prezidenti İlham Əliyevlə keçirilən görüşünün ikitərəfli əlaqələrin daha da möhkəmlənməsinə xidmət etdiyi və əməkdaşlığın müxtəlif sahələrdə genişləndirilməsi üçün yeni perspektivlər açdığı vurğulanıb.
Ölkələrimiz arasında iqtisadi münasibətlərə toxunan səfir ticarət dövriyyəsini artırmaq üçün, xüsusilə ərzaq sənayesi, turizm, yüngül sənaye və kənd təsərrüfatı sahələrində böyük potensialın mövcud olduğunu bildirib.
Qeyd olunub ki, Azərbaycan sevimli turizm istiqamətlərindən biri kimi ötən il 31 mindən çox küveytlini qəbul edib.
Daha sonra, səfir Emil Kərimov ölkədə qəbul olunmuş qaydaya görə Küveyt Dövlətinin xarici işlər nazirinin müavini Şeyx Carrah Cabir əl-Əhməd əl-Sabah ilə birlikdə üzərində hər iki ölkənin bayrağı əks olunmuş tortu kəsiblər.
Şeyx Carrah Cabir əl-Əhməd əl-Sabah səfir E.Kərimovla təkbətək söhbəti əsnasında 28 May – Müstəqillik Günü münasibətilə Azərbaycan xalqını təbrik edib, azərbaycanlı həmkarına salamlarının çatdırılmasını xahiş edib. Nazir müavini müxtəlif sahələrdə ölkələrimiz arasında ikitərəfli və çoxtərəfli münasibətlərin inkişafından məmnunluğunu ifadə edib.
Bundan başqa, tədbirin qonaqları respublikamızın görməli məkanlarını əks etdirən fotolardan ibarət stendlə tanış olublar, həmçinin zalda quraşdırılmış böyük ekranlarda ölkəmizin turizm potensialını əks etdirən videogörüntülərə baxıblar.
Tədbirdə, həmçinin “Made in Azerbaijan” brendinin Küveytdə təbliği məqsədilə “Azərçay” məhsullarının yarmarkası təşkil olunub.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
