Azərbaycan Dövlət İnformasiya Agentliyi

DÜNYA

ƏLCƏZAİR PREZİDENTİ VƏZİFƏSİNƏ QADIN DA NAMİZƏDDİR

15.02.2004 [08:49]
Çap et
A⁺ A^-

AZƏRTAC-ın xarici informasiya agentliklərindən aldığı xəbərdə deyilir ki, Əlcəzair tarixində ilk dəfə olaraq, ölkə prezidenti vəzifəsinə namizədlər arasında qadın da vardır.

Əlcəzair Fəhlə Partiyası (ƏFP) fevralın 14-də bəyanat verərək bildirmişdir ki, aprelin 8-də keçiriləcək prezident seçkilərində Luiza Xanunun namizədliyini irəli sürür. Bəyanatda deyilir ki, Xanun qeydiyyat üçün tələb olunan 75 min seçici imzası toplamış və fevralın 23-dək - rəsmi qeydiyyatın sonuncu gününədək siyahıları seçki komissiyasına təqdim edəcəkdir.

L.Xanun ƏFP-də 1985-ci ildən işləyir, mahir natiqdir, əlcəzairlilər arasında böyük hörmətə malikdir və son seçkilərdə onun partiyasının parlamentin aşağı palatasında 23 yer almasında böyük xidməti olmuşdur.