ƏNƏNƏVİ ÇİN TƏBABƏTİNİN QİÇS ƏLEYHİNƏ DƏRMANLARININ KLİNİK TƏCRÜBƏDƏN KEÇİRİLMƏSİNİN İKİNCİ MƏRHƏLƏSİ BAŞLANMIŞDIR

02.11.2004 [15:41]
Çap et
A⁺ A^-

AZƏRTAC-ın Sinxua agentliyindən aldığı xəbərə görə, Çinin müstəqil hazırladığı “Keayte” dərman preparatı bu günlərdə ÇXR Dərmanların Qiymətləndirilməsi Mərkəzində qəbul edilmişdir. Qazanılmış immun çatışmazlığı sindromuna (QİÇS) tutulmuş xəstələrin müalicəsində bu preparatın klinik təcrübələrinin ikinci mərhələsi qida məhsullarına və dərman preparatlarına Dövlət Nəzarət İdarəsinin icazəsindən sonra başlanır.

“Keayte” preparatı ənənəvi Çin təbabətinin üsulları ilə canlı dəniz orqanizmlərindən və uca dağlarda bitən bitkilərdən hazırlanmışdır. 2001-ci ilin iyulundan başlayaraq, Xenan, Xebey əyalətlərində və Pekin şəhərində QİÇS-ə tutulmuş 148 xəstə bu preparatla müalicə kursu keçmişdir. İlkin nəticələrə görə, dərmanın səmərəliliyi azı 98 faizdir.

İndiyədək planetimizdə immun çatışmazlığı sindromuna tutulanların sayı 80 milyonu keçmiş, onlardan da 30 milyon nəfərdən çoxu bu xəstəliyin qurbanı olmuşdur.