Erməni havasına oynayan AŞPA və ya həqiqətlərə göz yuman Avropa - ŞƏRH
Bakı, 30 yanvar, AZƏRTAC
Dünyadakı vəziyyət çoxdan - ermənilərin torpaq iddiası başlayandan və onların absurd, əsassız umacaqlarına qanad gərib ayaqları altına daş qoyanların sayı yağışdan ardınca peyda olan göbələklər kimi çoxalandan sonra bir az da qəlizləşib. Bizim şanlı Qələbəmiz, torpaqlarımızı işğaldan qurtarmağımız nəinki ermənilərin və ona havadarlıq edən Fransa kimi dövlətlərin, həm də o boyda AŞPA-nın işinə yaramadı. Əgər belə olmasaydı, bu təşkilat işini-gücünü atıb, cinayətkar bir dövlətin maraqlarının müdafiəsinə qalxmazdı.
AZƏRTAC xəbər verir ki, bu sözləri Qərbi Azərbaycan İcmasının Qadınlar Şurası sədrinin müavini Telli Pənahqızı söyləyib.
O qeyd edib ki, bu dünya AŞPA-nın rahat kürsülərində vaxt keçirməyə toplaşan, ağızlarına və ağıllarına gələni danışmaqla vəzifə borclarını başa vuran, yalan-palan məlumatları siyasət müstəvisinə çıxarıb kiməsə tərəfkeşlik etməklə bitmir, günlərin birində ən azından olmayan vicdanların ağrısına da çarə axtarmaq lazım gələcək. Bu təşkilat yaranan gündən bəri özünün ən rüsvayçı dönəmini yaşayır. Maraqlıdır, görəsən oraya toplaşan nümayəndələrin hamısımı vicdansızdır ki, Azərbaycan haqqında ermənilərin onlara ötürdüyü cəfəngiyyatı dilə gətirib millətimizə köçəri deyir, bizi Qafqaza ermənilərdən sonra gələn vəhşi tayfa adlandırır, “Onları gəldikləri çöllərə yenidən qaytarmaq lazımdır” kimi başından böyük bir hökm verməyə cəsarət edir?! Məncə, biz illərdən bəri erməni diasporunun “möhtəşəm” xidmətlərini bir qədər deyəsən şişirtməklə onları “qüdrət sahibi, ermənilərin xaricdəki yenilməz havadarı” kimi qələmə vermişik və bu da sanki ermənilərin “gücünə güc” qatıb, bəzi ermənipərəst qruplar da diasporun cəfəng fikirlərini müdafiə etmək müqabilində yaxşı qazanc yeri tapıblar. Amma gəlin unutmayaq ki, məşhur milyarder Ruben Vardanyan da ötən il bu vaxtlar Xankəndidə at oynadırdı. Amma indi o, Bakı təcridxanasında Araik Arutunyanın və əli Azərbaycan xalqının qanına bulaşmış digər canilərin koğuş yoldaşıdır.
Bu gün Azərbaycanda yaşanan möhtəşəm reallığı görməzdən gələn müxtəlif beynəlxalq təşkilatlar, o cümlədən bütün üzvlərinin uğurunu və faciəsini eyni baxış bucağından qiymətləndirməyə borclu olan AŞPA-dakı səlahiyyət sahiblərinə sual vermək istəyirəm: Ermənilərin Azərbaycan torpaqlarında törətdikləri qətliamlara illər boyu niyə susurdunuz, cəmi 44 günlük müharibədə öz ərazilərini 30 illik erməni işğalından azad edən bir ölkə ilə düşmənçiliyiniz nədən qaynaqlanır?
İllər boyu Azərbaycan ərazisini xarabazara çevirən, işğal altında saxladığı torpaqlarda salamat bir tikili belə qoymayan, minlərlə günahsız insanı qətlə yetirib ev-eşiyini, halal torpaqlarını zəbt edən ermənilərə niyə “gözünüz üstə qaşınız var” deməyə cəsarət etmirsiniz? Sizə mane olan, gözünüzü kor, vicdanınızı lal edən nədir?
Bu gün də minaladıqları torpaqların xəritəsini verməyən, itkin düşmüş, girov götürülmüş yüzlərlə vətəndaşımızın yerini bildirməyən ermənilər sizin gözünüzə niyə mələk cildində görünür? Niyə onlara söz deməyə, haqsız olduqlarını dilə gətirməyə cəsarətiniz çatmır? Bəlkə diasporun rüşvəti, bəlkə tərəfkeşliyi? Yoxsa qarın qardaşdan, cib vicdandan daha dəyərlidir sizin üçün?
Siz zaman-zaman özünüzü dünyanın “ən sivil avropalısı” adlandırırsınız, amma sivil insanlar daha çox əyilməz vicdanları, həqiqəti müdafiə əzmkarlığı ilə fərqlənməlidirlər. Siz isə həmişə olduğu kimi, vicdanınızı çoxdan unudub, haqdan, ədalətdən uzaq düşmüşünüz. Əgər belə olmasaydı, Azərbaycan kimi bir ölkəni hədəfə almaqdan çəkinər, bu kütləvi psixoz qərarı qəbul etməzdiniz!
“Mən Qərbi Azərbaycandakı, indiki Ermənistandakı yüz minlərlə azərbaycanlı ailədən birinin övladıyam. Ermənilər bizim ailələrimizin əlindən əmlakını, varını-dövlətini alıb qışın qarlı-çovğunlu bir günündə yurdundan didərgin salanda da siz susdunuz. Yüzlərlə soydaşımız erməni vandallarının qurbanı olanda da susdunuz!
Zori Balayan kimi bir erməni “yazıçısı”nın kitabı bəlkə sizin də evinizdə var, axı siz hədiyyə götürməyi sevirsiniz. Yəqin ki, onun Azərbaycan uşaqlarını xüsusi qəddarlıqla qətlə yetirilib sonra bu prosesi təsvir edib oxuculara necə “qəhrəmanlıq” etdiyini söylədiyini də oxumusunuz. Amma siz də onun kimi deyəsən heç vicdan ağrısı yaşamamısınız. Yoxsa bu gün o qatilin təmsil etdiyi millətin absurd ideyalarına qahmar çıxmazdınız! Heç bu barədə düşündünüz? Yəqin ki, yox! Bir daha soruşuram: Ermənilər hansı cəhətləri ilə sizin gözünüzə pərdə çəkiblər ki, siz həqiqətlərə göz yummağa çalışır, günahkarı cəzalandırmaq əvəzinə, onlara qol-qanad gərirsiniz?”, - deyə T.Pənahqızı vurğulayıb.
Bölmənin digər xəbərləri
