Erməni ideologiyası xəyanət, satqınlıq və başqalarının torpaqlarını zəbt etmək niyyəti üzərində qurulub
Bakı, 3 sentyabr, Səadət Hakıyeva, AZƏRTAC
Bu bir həqiqətdir ki, təcavüzkar Ermənistanda faşizm ideologiyası artıq uzun illərdir dövlət siyasətinə çevrilib. Bunun da əsas səbəbi tarixboyu bu xalqın “tarixi şəxsiyyətləri”nin və “tarixi qəhramanları”nın onları fəlakətə aparmasıdır. Bu fakt isə dünyanın Herodotdan Strabona, Tomsondan Veliçkoya və Şopenə kimi onlarca görkəmli şəxsiyyətlərinin əsərlərində öz əksini tapıb. Bu, bütün dünyaya bəllidir. Məhz bu reallıqlar ermənilərin Andranik, Njde, Dro kimi faşist düşüncəli “qəhrəmanları”nın fəaliyyəti ilə bir daha təsdiq olunur.
Bu fikirləri AZƏRTAC-a açıqlamasında Milli Məclisin deputatı Məlahət İbrahimqızı söyləyib.
M.İbrahimqızı bildirib ki, həmin ənənə indi də davam edir və XXI əsrdə öz xalqını fəlakətə sürükləyən, onları faşist ideologiyasında tərbiyə edən Serj Sarkisyan, Nikol Paşinyan kimi “liderlər” yetişib. Bu fitnəkar və yalançı insanların simasında erməni xalqının milli ideologiyası formalaşıb. “Ermənistanda kim bu çərçivədən kənara çıxırsa, onun taleyi qaranlıqlara qərq olur. Erməni millətçilərinin ideologiyası xəyanət, satqınlıq, başqa xalqların tarixini, mədəniyyət və incəsənətini, hətta xalq qəhramanlarını oğurlamaq və mənimsəmək, böyük güclərin alətinə çevrilmək, hər cildə girmək kimi dəyərlər əsas prinsip kimi götürülür. Bu gün erməni siyasətçiləri, öndə gedən liderlər öz sələflərinin yolunu “sədaqətlə” davam etdirirlər. Yəni, Ermənistanda bu ideologiya elə qurulub ki, hər gələn yeni “xalq lideri” sələfinin yolunu davam etdirir. Baxın, Paşinyan Serj Sarkisyana, Ter Petrosyana düşmən kimi rəqibdir. Bu ideologiya və ənənə bütün dövrlərdə belə olub. Bir sözlə, faşist ideologiyası xalqın şüuruna elə həkk olub ki, bunun dəyişəcəyi çox çətin görünür”, - deyə deputat qeyd edib.
Vurğulanıb ki, Nikol Paşinyan özündən əvvəlki hakimiyyəti devirib baş nazir olanadək və hakimiyyətinin ilk aylarında sələfinə düşmən kimi baxırdı, onun yaxın adamlarını həbs etdirirdi. Paşinyan hakimiyyətə gələndə xalqa söz vermişdi ki, onu yaşadıqları ağır sosial vəziyyətdən çıxaracaq. Əslində, o, Qarabağ problemini ön plana çıxarmırdı. Çünki ölkədə aclıq, işsizlik hökm sürürdü və vətəndaşlar üçün Qarabağ deyil, sosial vəziyyətin yaxşılaşdırılması daha vacib idi. “Lakin qısa müddətdən sonra faşizmə xidmət edən bir insanın nəvəsi N.Paşinyan hakimiyyətinin də mahiyyəti elə faşizm ideologiyasından ibarət oldu. Bu gün Ermənistanda ağır sosial-iqtisadi vəziyyət gündən-günə daha da pisləşir. Lakin Paşinyan ölkəsindəki ağır vəziyyəti düzəltmək əvəzinə, Azərbaycanla sərhəd ərazilərdə hərbi təxribatlar törətməkdə davam edir”, - deyə M.İbrahimqızı diqqətə çatdırıb.
Paşinyanın Qarabağa səfərinin də təxribat xarakterli olduğunu diqqətə çatdıran deputat vurğulayıb ki, bu səfər Ermənistan hakimiyyətinin ölkəmizə qarşı yeni hücum planları qurduğunu, hərbi əməliyyatların yenidən bərpasına başlamaq niyyətində olduğunu deməyə əsas verir.
“Erməni siyasətçiləri və ideoloqları dəfələrlə dünya ictimaiyyəti qarşısında ifşa olunsalar da, utanıb çəkinmirlər. Bu yaxınlarda BBC televiziyasının “HARDtalk” proqramında həm N.Paşinyan, həm də həm də ölkənin Xarici İşlər naziri yalan və saxtakarlıqlarına, təcavüzkar siyasət apardıqlarına görə ifşa olundular. Amma onlarda utanan üz yoxdur. Erməni xisləti dəyişməz olaraq qalır. Çünki erməni ideologiyası xəyanət, satqınlıq və başqalarının torpaqlarını zəbt etmək niyyəti üzərində qurulub”, - deyə deputat bildirib.
Azərbaycan Prezidenti İlham Əliyevin Ermənistan baş nazirini dəfələrlə ifşa etdiyini xatırladan Məlahət İbrahimqızı qeyd edib ki, dövlətimizin başçısının yüksək tribunalardan çıxış edərək məntiqi təfəkkürü, tarixi faktlar ilə Paşinyanı susdurması, pərt etməsi indi də danışılır. İşğalçı ölkənin rəhbəri və apardığı siyasət “Valday” Beynəlxalq Diskussiya Klubunun XVI toplantısında, Münhen Təhlükəsizlik Konfransı çərçivəsində keçirilən dəyirmi masada dünya ictimaiyyətinin diqqətinə çatdırılıb. Dünyanın gözündə gülüş hədəfinə çevrilən Paşinyan hakimiyyəti məhvə məhkumdur.
Azərbaycan əvvəl-axır öz ərazi bütövlüyünü bərpa edəcək. Çünki haqq da, ədalət də, qanun da bizim tərəfimizdədir.
Bölmənin digər xəbərləri
