Ermənilər məkrli planlarını həyata keçirmək üçün siyasi terrordan geniş istifadə ediblər VİDEO
Quba, 28 mart, Elxan Yusifli, AZƏRTAC
2018-ci ilin “Azərbaycan Xalq Cümhuriyyəti İli” elan olunması və dövlətimizin başçısının “1918-ci il azərbaycanlıların soyqırımının 100 illiyi haqqında” imzaladığı Sərəncamlara uyğun olaraq, martın 28-də bir qrup fəal gəncin Quba Soyqırımı Memorial Kompleksinə ziyarəti təşkil edilib.
AZƏRTAC-ın bölgə müxbiri xəbər verir ki, Azərbaycan Respublikasının Prezidenti yanında Bilik Fondu, Binəqədi və Quba Rayon İcra hakimiyyətlərinin birgə təşkil etdiyi səfərə Fondun “Tariximizi öyrənək və öyrədək”, "Diplomatlar" klublarının üzvləri, təcrübəçi tələbələr, Binəqədi Rayon İcra Hakimiyyətində təcrübə keçən ASAN könüllülərinin təmsilçiləri və yerli gənclər cəlb olunublar.
Bilik Fondunun "İl boyu bilik" proqramı çərçivəsində, "Heç kim unudulmur, heç nə yaddan çıxmır" devizi ilə keçirilən səfərin iştirakçılarına bildirilib ki, Quba soyqırımı məzarlığı 2007-ci il aprelin 1-də ərazidə torpaq işləri görülərkən aşkarlanıb. Bundan sonra Azərbaycan Milli Elmlər Akademiyasının Arxeologiya və Etnoqrafiya İnstitutunun əməkdaşları tərəfindən kütləvi məzarlıqda geniş tədqiqat işləri aparılıb. Tədqiqatlar nəticəsində məzarlığın 1918-ci ildə ermənilərin yerli dinc əhaliyə qarşı törətdikləri soyqırımı ilə bağlı olduğu müəyyən edilib.
Diqqətə çatdırılıb ki, Heydər Əliyev Fondunun dəstəyi ilə yaradılan Quba Soyqırımı Memorial Kompleksi 2013-cü il sentyabrın 18-də açılıb. Kompleksdə XX əsrin əvvəllərində Quba şəhərinin müxtəlif ərazilərinin görüntüləri, o zaman burada aparılan tikinti-quruculuq işləri, əhalinin həyat tərzi haqqında fotolar var. Burada quraşdırılmış sensor ekranlı monitordakı xüsusi xəritədə ermənilərin ötən əsrdə xalqımıza qarşı respublikamızın müxtəlif bölgələrində həyata keçirdikləri soyqırımı aktları barədə bir neçə dildə məlumat əldə etmək mümkündür.
Kompleks barədə ətraflı məlumat verildikdən sonra gənclərin iştirakı ilə “Azərbaycanlıların soyqırımı: tarix və bu gün” mövzusunda tədbir keçirilib.
İştirakçılar Bilik Fondunun sektor müdiri Hacı Abdullanın “1918-ci il soyqırımı - tariximizin ibrət dərsləri”, AMEA Tarix İnstitutunun dissertantı Rəxşəndə Bayramovanın “Azərbaycan Xalq Cümhuriyyəti dövründə ermənilərin Quba qəzasında törətdikləri soyqırımı” mövzusunda mühazirələrini dinləyiblər.
Tədbirdə Binəqədi Rayon İcra Hakimiyyətinin ictimai-siyasi və humanitar məsələlər şöbəsinin müdiri Elman Dadaşov, Yeni Azərbaycan Partiyası Binəqədi Rayon Təşkilatının aparat rəhbəri Sevinc Abdullayeva, Quba Rayon Gənclər və İdman İdarəsinin rəisi Mustafa Nöhbalayev çıxış edərək erməni terrorizminin dəhşətlərindən söz açıblar. Qeyd olunub ki, "Armenakan", sonradan "Hnçak" və "Daşnaksütyun" partiyaları məkrli planlarını həyata keçirmək üçün siyasi terror aksiyalarından geniş istifadə ediblər.
Tədbirdə gənclərə Azərbaycanın yaşadığı soyqırımlarını unutmamaq, Vətənin haqq səsinin dünyada eşidilməsi uğrunda mübarizə aparmaq tövsiyə olunub.
Ziyarətçilər səfər çərçivəsində yəhudilərin kompakt yaşadıqları Qırmızı qəsəbəyə də ekskursiya ediblər.
Bölmənin digər xəbərləri
