Ermənilərin “humanitar böhran” şousunun heç bir perspektivi yoxdur - Hərbi ekspert
Bakı, 26 avqust, AZƏRTAC
Son vaxtlar Ermənistanın şərti sərhəddə intensivləşən təxribatlarının məqsədi ölkəmizlə sülh müqaviləsindən yayınmaqdır. Erməni silahlılarının mövqelərimizi atəşə tutmasının səbəblərindən biri də məhz budur. Çox təəssüflər olsun ki, bu məsələdə onlara dəstək olan, havadarlıq edən güclər də əllərindən gələni edir, onları bir növ ruhlandırırlar. Amma nə olursa-olsun Azərbaycan sonda məqsədinə çatacaq. Görünən odur ki, bəzi güclər həm də ATƏT-in keçmiş Minsk qrupunu yenidən dirçəltmək istəyirlər. ATƏT sədrinin şəxsi nümayəndəsinin İrəvanda peyda olması, Ermənistan xarici işlər naziri ilə Laçın yolu məsələsini müzakirə etməsi bunu deməyə əsas verir ki, beynəlxalq qurumlar da Ermənistana havadarlıq edirlər. Onlar Ermənistanı beynəlxalq hüquqa hörmətlə yanaşmağa dəvət etmək əvəzinə, bu yolu seçirlər. Bu da dəfələrlə qeyd etdiyimiz ikili, üçlü standartların bariz nümunəsidir.
Bunu AZƏRTAC-a hərbi jurnalist, ekspert, ehtiyatda olan polkovnik Üzeyir Cəfərov deyib.
O qeyd edib ki, Azərbaycan dəfələrlə ən yüksək, hətta dövlət başçısı səviyyəsində ermənilərə və Qarabağda qalan separatçılara Azərbaycanın mövqeyini çatdırıb. Odur ki, terrorçular silahı təhvil verməli, separatçılıq meyillərindən və xülyalarından əl çəkməlidirlər. Onlar başa düşməlidirlər ki, Azərbaycan müstəqil dövlətdir və ölkəmizlə zor gücü ilə danışmaq mümkün deyil. Azərbaycan öz ərazisində istənilən qərarı vermək iqtidarındadır, onun nə Ermənistana, nə Avropaya, nə də kiməsə heç bir aidiyyəti yoxdur. Çox təəssüflər olsun ki, bütün bunları bildikləri halda ABŞ və Avropa rəsmiləri bəyanat səsləndirirlər. Onlar ölkəmizdəki nümayəndələri ilə əlaqə saxlasalar və ya müraciət etsələr Azərbaycan onların səfirlərini, hərbi attaşeləri həmin yerə aparıb göstərə bilər ki, Laçın sərhəd-buraxılış məntəqəsi sırf Azərbaycan ərazisindədir. Ona görə də ermənilərin “Spayk” şirkəti ilə avtomobilləri Azərbaycan sərhədinə yığıb və orada saxlayaraq dünyaya “humanitar” şousunu göstərməsinin, o cümlədən Xankəndində separatçıların müxtəlif hiyləgərliklərinin perspektivi yoxdur.
Ü.Cəfərovun sözlərinə görə, bunu separatçıların rəhbərləri Araik Arutunyan və Rubian Vardanyan, onlara havadarlıq edən İrəvanda, Moskvada, Parisdə və digər mərkəzlərdə oturan qüvvələr də başa düşürlər. Ona görə də ermənilər təxribatlara son qoymalıdırlar. Belə təxribatlarla onlar danışıqların dalana dirənməsini və tərəflərin uzun müddət bir araya gəlməməsini istəyirlər. Aydındır ki, məqsəd bizim şimal qonşumuzun sülhməramlılarının daha uzun müddət Qarabağda qalması, onlara rəsmi şəkildə hansısa mandatın verilməsidir. Yenə də Azərbaycan öz haqq işini davam etdirəcək.
“Sərhəd-buraxılış məntəqəsi normal fəaliyyət göstərir. Azərbaycan bütün lazım olan infrastrukturu yaradır və bundan sonra da yaradacaq. Qarabağda olan bir ovuc separatçı və onlara havadarlıq edənlər də başa düşməli və tezliklə qərarlarını verməlidirlər ki, sonradan peşman olmasınlar. Çünki atalar sözünə görə, “sonrakı peşmançılıq fayda verməz”. Ermənilər və onlara havadarlıq edənlər sonradan peşman olacaqlar, amma artıq gec olacaq”, - deyə hərbi ekspert vurğulayıb.
Bölmənin digər xəbərləri
