QAN YADDAŞI
ERMƏNİLƏRİN XOCALIDA TÖRƏTDİYİ CİNAYƏTLƏRİN NÖVBƏTİ İLDÖNÜMÜ İLƏ BAĞLI TƏDBİRLƏR KEÇİRİLƏCƏKDİR
Berlin, 18 fevral (AZƏRTAC). Almaniyadakı Azərbaycanlıların Koordinasiya Mərkəzindən bildirmişlər ki, fevralın 26-da Almaniya paytaxtında 17 il bundan əvvəl erməni quldur dəstələri tərəfindən Xocalıda dinc azərbaycanlılara qarşı törədilmiş soyqırımı qurbanlarının xatirəsinə həsr edilmiş bir sıra tədbirlər keçiriləcəkdir. Tədbirlər proqramı “sağalmaz yara” adlanır. Bu, Qarabağın kiçik şəhərinin qətlə yetirilmiş sakinlərinin xatirəsinin xalqımızın yaddaşından silinmədiyini adekvat əks etdirir.
Həmin gün Kayzer Vilhelm kirxasının qarşısında mitinq keçiriləcək, saat 19:00-da isə “Xocalı soyqırımı” sənədli filmi nümayiş etdiriləcəkdir. Azərbaycanın Almaniyadakı səfiri Pərviz Şahbazov tədbir iştirakçıları qarşısında çıxış edəcəkdir. Tədbirə Almaniyadakı Azərbaycan diasporunun, bu ölkədəki başqa diasporların nümayəndələri, habelə erməni cəlladlarının qətlə yetirdiyi, heç bir günahı olmayan Xocalı uşaqlarının, qadınların və qocaların anım günü ilə əlaqədar Azərbaycan xalqının kədərinə biganə olmayan sıravi Almaniya vətəndaşları dəvət edilmişlər.
Almaniyadakı Azərbaycanlıların Koordinasiya Mərkəzinin rəhbəri Samirə Patser-İsmayılova AZƏRTAC-ın müxbirinə demişdir: “Biz inanırıq ki, bu cür tədbirlər erməni quldur dəstələri tərəfindən xalqımıza qarşı törədilmiş vəhşi cinayətlər haqqında həqiqəti dünya ictimaiyyətinə çatdırmağa, habelə bütün sivil bəşəriyyət tərəfindən onların pislənməsinə kömək edə bilər”. Daha sonra o demişdir ki, heç bir cinayət cəzasız qalmamalıdır. Əks halda bu cinayətlər dunyanın başqa yerlərində təkrarlana bilər.
Vüqar Seyidov
AZƏRTAC-ın xüsusi müxbiri
Berlin