Ermənistan Azərbaycanla İran arasındakı dostluq münasibətlərinə xələl gətirməyə çalışır ŞƏRH
Bakı, 12 sentyabr, AZƏRTAC
Ermənistanın siyasi-hərbi rəhbərliyi artan təxribatları fonunda həm də Bakı-Tehran münasibətlərində gərginliyin yaranmasında və inkişafında maraqlı olduğunu gizlətmir. Bu istiqamətdə konkret addımlar atır. Çalışır ki, Azərbaycan və İran arasındakı mehriban qonşuluq və dostluq münasibətlərinə ciddi xələl gəlsin, çatlar yaransın, ancaq onların bu istəkləri ürəklərində qalacaq. Elə bu günlərdə İran Silahlı Qüvvələrinin nümayəndə heyətinin Bakıya səfəri, onların Hərbi Qənimətlər Parkında olması, oradan fotoşəkillər və videolar çəkməsi, həmin materialların mətbuatda yayımlanması göstərir ki, Ermənistanın ölkələrimiz arasındakı münasibətlərdə gərginlik yaratmaq, bu əlaqələrin mahiyyətini dəyişmək niyyəti baş tutmayıb. Tam tərsi, əks effekt verib. Artıq İran Ermənistanı ittiham etməyə başlayıb. Hesab edirəm ki, heç bir zaman İran-Ermənistan münasibətlərində belə ciddi problemlər yaranmamışdı.
Bu sözləri AZƏRTAC-a açıqlamasında Milli Məclisin deputatı Elman Nəsirov deyib.
Onun sözlərinə görə, İranın siyasi rəhbərliyi çox dəqiq bilir və açıq şəkildə ifadə edir ki, Ermənistanın baş naziri Nikol Paşinyanın Qərb yönümlü addımları, Amerika Birləşmiş Ştatları ilə sıx əməkdaşlığı, həm də regionda onların maraqlarının ziddinə fəaliyyət deməkdir. Yəni heç kəsə sirr deyildir ki, İran-ABŞ münasibətləri düşmənçilik səviyyəsindədir. Bu reallıq fonunda Ermənistan sentyabrın 11-dən 20-nə qədər ABŞ-la birgə hərbi təlimlər keçirir. Deməli, bu, həm də İranın strateji maraqları üçün təhlükə deməkdir. Bundan savayı, Ermənistan Avropa İttifaqı və NATO-nun nümayəndələrini sülhpərvər missiya adı altında ölkəsinə gətirib. Onların hansı fəaliyyətlə məşğul olduğu İran üçün də sirr deyil. Faktiki olaraq, İranın qulağının dibində Ermənistan bir casus şəbəkəsi yaradır. Bu gün onun adını “sülhpərvər” mülki missiya qoyub. Amma onun tərkibi mülkü deyil. Artıq tərkibi mülki-hərbi missiyadır. Heç kim təminat vermir ki, o, tamamilə hərbi missiyaya çevrilməyəcək. Yeri gəlmişkən, Paşinyan İran İslam Respublikasının Prezidenti İbrahim Rəisiyə də telefon zəng etdi. Danışığın çox mürəkkəb, çox qəliz getdiyi sirr deyil. Bununla bağlı İranın vitse-prezidenti öz tiviter səhifəsində paylaşımlar edib. Qeyd olunub ki, rəsmi Tehran 3+3 formatında danışıqların, əməkdaşlığın tərəfdarıdır. Bu formatdan kənar prosesləri qəbul etmir. Nəzərə alsaq ki, Rusiya-İran münasibətləri də bir çox parametrlər baxımından strateji xarakter kəsb edir, Ermənistanın atdığı son addımlar bu ölkədə də çox böyük qəzəb doğurur. Bu nöqteyi-nəzərdən İran ilə Rusiyanın mövqeyi üst-üstə düşür.
“Beləliklə, Ermənistanın siyasi rəhbərliyinin siyasi hoqqabazlığı, mürəkkəb kombinasiyalı oyunları ölkəsinin mövqelərinin möhkəmlənməsi və strateji məsələlərdə üstünlük təmin edilməsi məqsədini güdürdü. Ancaq bütün bunlar hamısı fiaskoya uğramaqdadır. Həm Rusiya, həm İranla münasibətlər heç bir zaman olmadığı səviyyədə korlanmaqdadır. Azərbaycanın isə həm Rusiya, həm də İranla münasibətlərində bir dinamizm var və qarşılıqlı anlaşma mühiti hökm sürməkdədir. İranın siyasi rəhbərliyi bir daha bəyan etdi ki, Ermənistanın yaydığı məlumatlar dezinformasiyadır. Heç bir halda İran-Azərbaycanla sərhəddə qoşun toplamır. Belə bir niyyəti də yoxdur. Əgər qoşun toplamış olsa, bu, Azərbaycan əleyhinə yox, İran əleyhinə olmalıdır. İranın düşmənlərini bölgəyə gətirən məhz elə Ermənistandır. Ona görə də hesab etmək olar ki, Ermənistanın artıq diplomatik cəbhədə atdığı addımlar fiaskoya uğramaqdadır. Hərbi müstəvidə isə Ermənistanın Azərbaycanla üz-üzə dayanmaq, müharibə vəziyyətinə girmək potensialı yoxdur. Azərbaycan son dərəcə güclü dövlətdir. Azərbaycanın güclü Lideri, yenilməz Ordusu və dəmir yumruğa çevrilmiş xalqı var. Bu reallıqlar və Azərbaycanın güclü müttəfiqləri fonunda Ermənistanın perspektivi çox dumanlı və qaranlıq görünür”, - deyə Elman Nəsirov qeyd edib.
Bölmənin digər xəbərləri
