Ermənistanın İtaliyadakı səfirinin Azərbaycanla bağlı sayıqlamalarına faktlar əsasında tutarlı cavab verilib
Bakı, 19 aprel, AZƏRTAC
Ermənistanın İtaliyadakı səfiri Sarkiz Qazaryan Ermənistan-Azərbaycan qoşunlarının təmas xəttində baş vermiş gərginliklə bağlı İtaliya mətbuatına yalan, təxribatçı məlumatlar verərək münaqişəni “sivilizasiyalararası qarşıdurma” və dini kontekstdə təqdim etməyə çalışıb, Azərbaycan Silahlı Qüvvələri tərəfdən guya terrorçuların döyüşməsi kimi gülünc iddialarla çıxış edib.
Məsələ ilə əlaqədar Azərbaycanın İtaliyadakı səfirliyinin yaydığı mətbuat açıqlaması İtaliyanın “Sicilia Journal” qəzetində dərc olunub.
Mətbuat açıqlamasında səfirlik erməni səfirinin öz ölkəsinin Azərbaycana qarşı təcavüzünü ört-basdır etmək üçün başqa arqumentlər tapa bilmədiyini, ciddilik hissini itirdiyini və öz vəzifə səlahiyyətlərini aşaraq Azərbaycana qara yaxmaq üçün bütün növ təxribatlara əl atdığını qeyd edib. Erməni səfirinin bu kimi bəyanatlarının onun Ermənistandakı hərbi diktaturanın təmsilçisi olmasından irəli gəldiyi, bu hərbi diktaturanın liderlərinin nəinki azərbaycanlı mülki şəxslərə, hətta Ermənistan vətəndaşlarına qarşı cinayətlər törətdiyi, Ermənistanın öz ərazisindən bütün etnik və dini azlıqları tərk etməyə məcbur edərək monoetnik dövlətə çevrildiyi vurğulanıb.
Açıqlamada Ermənistanın Azərbaycan ilə müqayisəyə gələ bilmədiyi, ölkəmizdə müxtəlif dinlərin sülh içində yaşadığı, Azərbaycanın multikulturalizm modelinin bu gün beynəlxalq ictimaiyyət üçün nümunə olduğu, aprelin 25-27-də Bakıda BMT-nin Sivilizasiyalar Alyansının Qlobal Forumunun keçiriləcəyini beynəlxalq ictimaiyyətin Azərbaycanın multikulturalizm modelinə verdiyi dəyərin göstəricisi olduğu vurğulanıb. Azərbaycanın Müqəddəs Taxt-Tacla münasibətləri, həyata keçirilən və planlaşdırılan səfərlər, Heydər Əliyev Fondunun xristian mədəni irsinin bərpasına böyük töhfələr verdiyi də xatırladaraq diqqətə çatdırılıb ki, məhz Azərbaycanın bu kimi uğurları erməni səfirini qıcıqlandırır və onu yalan danışmağa sövq edir.
Səfirlik əlavə edib ki, beynəlxalq humanitar hüquqa uyğun fəaliyyət göstərən Azərbaycan Silahlı Qüvvələrinə böhtan atmaq əvəzinə, erməni səfiri artıq öz təsdiqini tapmış ASALA erməni terrorçu təşkilatının Ermənistan silahlı qüvvələri tərəfindən döyüşməsi, bu təşkilatın dünyanın bir sıra ölkələrində terror aktları törətməsi, hərbi təcavüz zamanı azərbaycanlı mülki əhalinin xüsusi amansızlıq və vəhşiliklə qətlə yetirilməsi, onlara qarşı misli görünməmiş fiziki zorakılığın tətbiq edilməsi faktlarına aydınlıq gətirsin. Səfirlik, habelə İtaliya kütləvi informasiya vasitələrini erməni tərəfinin bu kimi təxribatlarına yer verməmələrinə və hər hansı bir məlumatın yayılmadan öncə diqqətlə və peşəkar qaydada yoxlanılmasına çağırıb.
Qeyd olunan fikirlər Azərbaycanın İtaliyadakı səfiri Məmməd Əhmədzadənin “TV2000” və “RaiNews24” kanallarına verdiyi müsahibələrdə də yer alıb.
Erməni səfirinin bu təxribatı İtaliya ictimaiyyətində birmənalı qarşılanmayıb. Belə ki, “Notizie Geopoltiche” onlayn qəzetinin baş redaktoru Enriko Oliari məsələyə dair erməni səfirinin fikirlərinə etiraz edərək bu fikirləri alt-üst edən dəlillərlə çıxış edib, Azərbaycanda dini tolerantlığın inkişaf etdiyini, dini azadlıqların qorunduğunu, Bakıda pravoslav və katolik kilsələrinin fəaliyyət göstərdiyini faktlarla göstərib.
Habelə italiyalı jurnalist Filippo Bovo “Opinione Pubblica” qəzetində məsələyə münasibət bildirərək qeyd edib ki, Ermənistanın Dağlıq Qarabağ münaqişəsini xristian və müsəlman sivilizasiyaları arasında qarşıdurma prizmasından təqdim etməsi xristian dünyasında özünə dəstək qazanmaq məqsədini daşıyır. Lakin Ermənistanın ərazi iddiaları üzərində qurulmuş bu münaqişəyə dini don geyindirmək uğursuz cəhddir. Müəllif vurğulayıb ki, Ermənistanın Gürcüstana da ərazi iddiaları irəli sürməsi münaqişənin dinlə heç bir aidiyyətinin olmadığını sübut edir.
Eyni zamanda, italiyalı jurnalist Domeniko Letizia “Opinione” qəzetində Azərbaycanın beynəlxalq humanitar hüquqa uyğun fəaliyyət göstərən nizami orduya malik olduğunu, əksinə Ermənistan tərəfdən ASALA beynəlxalq erməni terrorçu təşkilatının üzvlərinin döyüşdə iştirak etdiyinə dair sübutların mövcudluğunu qeyd edib, Azərbaycanın işğal olunmuş ərazilərinin beynəlxalq nəzarətdən kənarda qalması səbəbindən ermənilərin həmin ərazilərdə qeyri-qanuni olaraq narkotik maddələr yetişdirdiyini və bundan əldə edilən vəsaitlə həmin ərazilərdəki erməni terrorçu təşkilatlarını maliyyələşdirdiyini bildirib. D.Letizia Azərbaycanın dünyəvi, tolerant, xristian və yəhudilərin sülh içində yaşadığı bir ölkə olduğunu qeyd edib, Azərbaycanın xristian aləmi ilə münasibətlərinin yüksək səviyyədə olması və cari ilin oktyabr ayında Papa Françeskonun ölkəmizə səfərinin nəzərdə tutulduğu diqqətə çatdırıb. Jurnalist, habelə Azərbaycanda önəmli yəhudi icmasının yaşadığını, Azərbaycanın İsraillə yaxın əlaqələrinin olduğunu da vurğulayıb.
Bölmənin digər xəbərləri
