Ermənistanın silahlandırılması faydasız olmaqla bərabər, bu ölkə üçün əslində sui-qəsddir ŞƏRH
Bakı, 10 oktyabr, AZƏRTAC
Azərbaycan Prezident İlham Əliyevin Müzəffər Ali Baş Komandanlığı ilə İkinci Qarabağ müharibəsində işğala son qoymaqla, bu il aprelin 23-də Laçın istiqamətində Azərbaycan-Ermənistan sərhədində sərhəd-buraxılış məntəqəsinin təsis olunması ilə ərazi bütövlüyümüzü, sentyabrın 19-da isə suverenliyimizi tam bərpa etməklə faktiki olaraq Ermənistanla arasındakı problemi prinsipial hissədə həll edib.
Bunu AZƏRTAC-a açıqlamasında Milli Məclisin deputatı Bəhruz Məhərrəmov deyib.
Ermənistanın bütövlükdə Azərbaycanın tarixi torpaqlarında yerləşməsinə baxmayaraq, Azərbaycanın heç vaxt Ermənistana ərazi iddiasının olmadığını söyləyən deputat əlavə edib: “Eyni zamanda, 30 il ərzində Azərbaycan ərazilərini işğalda saxlamış Ermənistan məğlubiyyətdən sonra Azərbaycanın ərazi bütövlüyünü tanımağa məcbur edilib, hətta baş nazir Nikol Paşinyan ərazi bütövlüyümüzü rəqəmlərdə ifadə edib. Belə olan halda Azərbaycan və Ermənistan arasında yekun sülh müqaviləsinin imzalanmasına prinsipial maneə qalmayıb. Daha doğrusu, əslində qalmayıb, lakin reallıqda Fransa başda olmaqla, regionda maraqları olan subyektlər Bakı ilə İrəvan arasında sülhə özlərinin Cənubi Qafqazdakı mənafelərinin sonu kimi baxırlar. Ermənistanın qütblərarası ziddiyyət nöqtəsinə çevrilməsi, erməni cəmiyyətində revanş əhvali-ruhiyyəsi Qərbin niyyətləri ilə üst-üstə düşür. Lakin Azərbaycanın hərbi-siyasi gücü, Azərbaycan Prezidentinin qətiyyəti və qlobal miqyasda nüfuzu Fransa və eyni çirkab niyyəti bölüşən digərlərinə Qafqazda rahat hərəkət imkanı tanımır. Bu mənada Qərbin şər bloku çıxış yolunu İrəvanı yenidən münaqişəni başlatmağa təşviq etməkdə görür. Ermənistanın prosesdə "cəsarətli" davranması üçün isə Qərb öz dəstəyini siyasi bəyanatlar vermək, qarayaxmadan ibarət kağız parçaları - qətnamələr qəbul etmək və ən təhlükəlisi, İrəvanı silahlandırmaqda görür. Amma Ermənistan Prezident İlham Əliyevin buyurduğu kimi, başa düşməlidir ki, heç kim gəlib onun yerinə döyüşməyəcək”.
Bəhruz Məhərrəmovun sözlərinə görə, silahlandırma faydasız olmaqla bərabər, Ermənistan üçün əslində sui-qəsddir. Çünki 30 il ərzində silahlanmaqla İrəvan Azərbaycanın qarşısında cəmi 44 gün davam gətirdi, son 3 il ərzində Hindistandan, Fransadan və digər dövlətlərdən daşınan silahlar da Ermənistanın karına gəlmədi, separatçılar və Qarabağdakı erməni hərbi birləşmələri cəmi 23 saat duruş gətirə bildi. Yəni, Prezident İlham Əliyev elə bir reallıq yaradıb ki, İrəvanın və daxil olduğu blokun məğlubiyyətdən başqa perspektivi yoxdur. Belə olan halda, Ermənistanı silahlandıranlar, əslində, bu ölkəni fəlakətə sürükləyirlər. Bu səbəbdən də hər kəsdən öncə bu reallığı ermənilər özləri anlamalıdırlar.
Bölmənin digər xəbərləri
