Eros Ramazzotti Budapeştdə daha bir canlı konsertlə çıxış edəcək
Budapeşt, 12 may, AZƏRTAC
İtaliyanın dünyaca məşhur müğənnisi və mahnı müəllifi Eros Ramazzottinin pərəstişkarları üçün xoş xəbər var. O, gələn yaz Budapeştə qayıdır.
AZƏRTAC Macarıstanın “index.hu portalına istinadla xəbər verir ki, "Una Storia Importante" adlı dünya turu çərçivəsində sənətçi 2026-cı ilin aprelində “MVM Dome” səhnəsində canlı konsertlə çıxış etməyi planlaşdırır.
Macarıstanda tədbirlərin təşkilatçısı bildirib ki, bu tur Ramazzotti ilə onun dinləyiciləri arasında yaranmış və zamanı, sərhədləri, nəsilləri aşan dərin bağın bayramıdır.
Qırxillik karyerası ərzində 61 yaşlı ifaçı 80 milyondan çox musiqi albomu satıb, onun mahnıları isə dünyada 9 milyard dəfədən çox səsləndirilib.
Ramazzotti indiyədək Macarıstanda beş dəfə - 2009, 2013, 2016, 2019-cu illərdə çıxış edib. Sonuncu dəfə 2023-cü ildə ənənəvi olaraq “Budapest Sportaréna”da səhnəyə çıxıb. 2026-cı il aprelin 19-da baş tutacaq konsert onun “MVM Dome” səhnəsində ilk çıxışı olacaq.
Vüqar Seyidov
AZƏRTAC-ın xüsusi müxbiri
Budapeşt
Bölmənin digər xəbərləri
