ORDU
Əsgərlərimizin sayıqlığı və qəhrəmanlığı sayəsində düşmənin bütün cəhdlərinin, hücumlarının qarşısı qətiyyətlə alınır
Bakı, 4 avqust (AZƏRTAC). Xəbər verildiyi kimi, Ermənistan Respublikasının silahlı qüvvələrinin son günlər cəbhənin müxtəlif istiqamətlərində atəşkəs rejimini pozaraq Silahlı Qüvvələrimizin mövqelərinə basqını zamanı döyüşlərdə həlak olmuş hərbi qulluqçular müdafiə naziri, general-polkovnik Zakir Həsənovun 2014-cü il 3 avqust tarixli əmri ilə “Hərbi xidmətdə fərqlənməyə görə” 3-cü dərəcəli medalı ilə təltif ediliblər.
AZƏRTAC xəbər verir ki, avqustun 3-də və 4-də Tovuz, Qazax, Qax, Masallı, Ağdam, Biləsuvar və Xocavənd rayonlarında medallar şəhidlərin ailələrinə, yaxınlarına təqdim olunub, başsağlığı verilib.
Tovuz rayonunun Aşağı Öysüzlü kəndində şəhid əsgər Poladov Vüqar Hidayət oğlunun valideynlərinə medalın təqdimatı ilə bağlı mərasim keçirilib. Tədbirdə çıxış edənlər son günlər cəbhə xəttində baş verən hadisələrdən, əsgərlərimizin igidliklərindən danışıblar. Bildirilib ki, bütün təxribatlara baxmayaraq, əsgərlərimizin sayıqlığı və qəhrəmanlığı sayəsində düşmənin bütün cəhdlərinin, hücumlarının qarşısı qətiyyətlə alınır.
Müdafiə Nazirliyinin nümayəndəsi, general-leytenant Rövşən Əkbərov medalı şəhidin atası Hidayət Poladova təqdim edib.
Hidayət Poladov mərasimdə deyib: “Oğlum ölməyib, Vətən uğrunda şəhid olub və ən yüksək zirvəyə ucalıb. Mən özüm də Vətən uğrunda şəhid olmağa hazıram”.
Qazax rayonunun Cəfərli kəndində Azərbaycan Ordusunun giziri şəhid Almazov İsa Ziyad oğlunun xatirəsi ehtiramla yad olunub.
General-leytenant Rövşən Əkbərov medalı şəhid İsa Almazovun oğluna təqdim edib.
Qax rayonundan hərbi qulluğa çağırılmış və qəhrəmancasına həlak olmuş kiçik gizir Elçin Əhmədovun xatirəsinə həsr olunmuş mərasimdə də şəhidlərin igidliklərindən danışılıb. Bildirilib ki, şəhidlərimizin qanı heç vaxt yerdə qalmayacaq, düşmən tezliklə layiqli cəzasını alacaq.
Mərasimdə çıxış edən Müdafiə Nazirliyinin rəsmisi, polkovnik Abakər Mirzəyev deyib ki, Azərbaycan Silahlı Qüvvələrinin şəxsi heyəti Ali Baş Komandanın bütün əmrlərini yerinə yetirməyə tam hazırdır.
Daha bir tədbir Masallı rayonunda təşkil olunub.
İgid əsgər Rəhimov Əli Fətulla oğlunun doğulub boya-başa çatdığı Masallı rayonun Köçəkli kəndində keçirilən mərasimdə çıxış edənlər şəhidlərin ölməzliyi, Vətənin müqəddəsliyi, igidlərin əbədiyaşar olduqlarını vurğulayıblar.
Azərbaycan Respublikasının Prezidenti, Ali Baş Komandan İlham Əliyevin qətiyyəti sayəsində işğal altındakı torpaqlarımızın tezliklə düşmən tapdağından tam azad olunacağı əminliklə qeyd edilib.
Müdafiə Nazirliyinin mənəvi-psixoloji hazırlıq və ictimaiyyətlə əlaqələr idarəsinin rəis müavini Abdulla Qurbani medalı şəhidin qardaşı Zakir Rəhimova təqdim edib.
Z.Rəhimov ailəsi adından ölkə rəhbərliyinə minnətdarlıq edərək Vətənin müdafiəsinin hər şeydən vacib olduğunu, qardaşının şəhidlik zirvəsinə ucalması ilə qurur duyduqlarını bildirib.
Ağdam rayonunun Quzanlı qəsəbəsində keçirilən mərasimdə şəhid Əhmədov Qaryağdı Eldar oğlunun igidliyindən danışılıb.
Mərasimdə şəhidlərin şücaətindən bəhs edilib, ruhlarına dualar oxunub.
Müdafiə Nazirliyinin nümayəndəsi İslam Gəncəliyev və “Silahlı Qüvvələrə İctimai Nəzarət” İctimai Birliyinin sədri Emin Həsənli bildiriblər ki, Ermənistan ordusunun son günlər cəbhənin müxtəlif istiqamətlərində mövqelərimizə basqınının qarşısı Silahlı Qüvvələrimizin hərbi qulluqçularının göstərdiyi şücaət nəticəsində qətiyyətlə alınıb. Düşmən bütün istiqamətlərdə itki verərək geri çəkilməyə məcbur edilib.
Şəhidin atası Eldar Əhmədov deyib: “Oğlumun Vətən uğrunda həlak olması ilə fəxr edirəm. Təki Vətən sağ olsun!”.
Sonda şəhid Qaryağdı Əhmədovun ailəsinə “Hərbi xidmətdə fərqlənməyə görə” 3-cü dərəcəli medalı təqdim edilib.
Avqustun 4-də Biləsuvar rayonunun Nərimankənd kəndində keçirilən mərasimdə cəbhənin Ağdam- Ağdərə istiqamətində düşmən hücumunu dəf edərkən şəhid olmuş biləsuvarlı gizirlər Pərvin Əliyev və Rahil Hüseynovun igidliklərindən geniş söhbət açılıb.
Bildirilib ki, Biləsuvar rayonunun Nərimankənd kəndində dünyaya göz açan Pərvin Əliyev və Rahil Hüseynov şəhidlik zirvəsinə ucalmaqla həmyerliləri - Azərbaycanın Milli Qəhrəmanı Mübariz İbrahimovun ardıcılları kimi yeni tarix yazdılar. Onlar Vətən uğrunda canı, torpağa tökülən qanı ilə əbədi olaraq xalqımızın yaddaşında qalacaqlar.
Qeyd olunub ki, şəhidlərin bir kənddən başlayan həyat yolu artıq milyonların ünvanına çevrilib, əbədiyaşarlıq qazanıb. İndi Rahil və Pərvinin adı Azərbaycan boyda bir məmləkətdə dillərdə səslənir, onların övladlıq borcu layiqincə qiymətləndirilir. Ölümlərindən sonra “Hərbi xidmətdə fərqlənməyə görə” 3-cü dərəcəli medalı ilə təltif olunmaları da bunun əyani göstəricisidir.
Pərvin Əliyev və Rahil Hüseynovun ölümlərindən sonra təltif olunduqları medalı Müdafiə Nazirliyinin rəsmisi, polkovnik Abdulla Qurbani şəhidlərin valideynləri Rəfiqə Əliyevaya və Əfqan Hüseynova təqdim edib.
Şəhidlərin valideynləri ailələri adından Azərbaycan Prezidenti, Ali Baş Komandan İlham Əliyevə və Müdafiə Nazirliyinə minnətdarlıq edərək bildiriblər ki, şəhid qanına boyanan əzəli və əbədi torpaqlarımız Azərbaycan Silahlı Qüvvələri tərəfindən tezliklə işğaldan azad olunacaq və o zaman övladlarının şəhid ruhları dinclik tapacaq.
Xocavəndli məcburi köçkünlər üçün Beyləqan rayonu ərazisində salınmış Yeni Xocavənd qəsəbəsində cəbhənin Ağdam istiqamətində ermənilərin hücum cəhdinin qarşısını alarkən şəhid olan müddətdən artıq həqiqi hərbi xidmət hərbi qulluqçusu Quliyev Sənan Qeyrət oğlunun xatirəsi böyük ehtiramla yad edilib.
Mərasimdə şəhidin şücaətindən bəhs edilib, ruhuna dualar oxunub.
Xocavənd Rayon İcra Hakimiyyətinin başçısı Eyvaz Hüseynov bildirib ki, torpaqlarımızın müdafiəsi uğrunda düşmənə qarşı mərdliklə vuruşan xocavəndlilərdən 145 nəfəri şəhid olub. Erməni quldurları təkcə Qaradağlı kəndindən 77 nəfər soydaşımızı, o cümlədən şəhid Sənan Quliyevin 20-yə qədər yaxın qohumunu qətlə yetiriblər. Qeyd edilib ki, doğma kəndi işğal edilən, yaxın qohumları ermənilər tərəfindən qətlə yetirilən Sənan Quliyev Vətənə olan borcunu ləyaqətlə yerinə yetirərək şəhid olub.
Bildirilib ki, xocavəndlilər Prezident İlham Əliyevin münaqişənin həlli ilə bağlı aparılan danışıqlardakı mövqeyini dəstəkləyirlər. Eyni zamanda, işğal altında olan torpaqlarımızın azad edilməsi üçün Ali Baş Komandanın əmri ilə erməni faşistlərinə qarşı silaha sarılmağa hər an hazırdırlar.
Müdafiə Nazirliyinin mənəvi-psixoloji hazırlıq və ictimaiyyətlə əlaqələr idarəsinin rəis müavini, polkovnik Abdulla Qurbani son günlər cəbhədə həlak olmuş hərbi qulluqçuların ailələrinə baş çəkdiyini deyərək bildirib ki, bu gün hər bir şəhid atası, anası qürur hissi yaşayır. Onlar övladlarının Vətən uğrunda həlak olması ilə fəxr edirlər. Bu gün Azərbaycan xalqı ilə ordu bir yerdədir. Bu birlik isə ordumuzun işğal altında olan torpaqlarımızı azad etməyə hazır və qadir olduğunu göstərir.
Ailəsi adından Azərbaycan Prezidenti, Ali Baş Komandan İlham Əliyevə, Müdafiə Nazirliyinin rəhbərliyinə minnətdarlıq edən şəhidin babası Əlqəmə Quliyev nəvəsi ilə fəxr etdiyini deyərək, 75 yaşının olmasına baxmayaraq Vətənin müdafiəsinə hazır olduğunu bildirib.
Sonra şəhid Sənan Quliyevin ailəsinə “Hərbi xidmətdə fərqlənməyə görə” 3-cü dərəcəli medalı təqdim edilib.
Mərasimdə iştirak edən hərbi qulluqçular və xocavəndli məcburi köçkünlər həmişə xalqımıza və dövlətimizə sadiq qalacaqlarına, daim Ali Baş Komandanın əmrinə hazır olacaqlarına, işğal altında olan torpaqlarımızı azad edəcəklərinə and içiblər.