Qax, 29 sentyabr, Mustafa Dadaşov, AZƏRTAC

Azərbaycanın bugünkü inkişafının təməl daşı kimi dəyərləndirilən “Əsrin müqaviləsi”nin imzalanmasından 29 il ötür. “Əsrin müqaviləsi” regionda, eləcə də postsovet məkanında qarşılıqlı etimadın və geniş əməkdaşlığın təməlini qoyub. Məhz bu müqavilə ölkəmizin neft-qaz sənayesinin, ümumilikdə Azərbaycanın bugünkü və gələcək inkişafının başlanğıcı olub. Azərbaycanın dövlət müstəqilliyinin möhkəmləndirilməsində “Əsrin müqaviləsi”nin rolu böyükdür. “Əsrin müqaviləsi” Azərbaycanın iqtisadi və siyasi müstəqilliyini təmin edib, beynəlxalq münasibətlər sistemində ölkəmizin rolunu artırıb, etibarlı tərəfdaş kimi mövqeyini möhkəmləndirərək, əməkdaşlığın coğrafiyasının regional çərçivədən çıxaraq beynəlxalq miqyas almasına yol açıb.

AZƏRTAC-ın bölgə müxbiri xəbər verir ki, bu fikirlər sentyabrın 28-də Qax Rayon İcra Hakimiyyətinin təşkilatçılığı ilə Ümummilli Lider Heydər Əliyevin anadan olmasının 100 illik yubileyinə həsr olunan “Əsrin müqaviləsi” tarixi Zəfərimizə gedən yolun başlanğıcıdır” mövzusunda keçirilən toplantıda səsləndirilib.

Rayon rəhbərliyi və ictimaiyyətin nümayəndələri əvvəlcə Ümummilli Lider Heydər Əliyevin abidəsini ziyarət edib, önünə gül dəstələri qoyublar.

Tədbir Dövlət Himninin səsləndirilməsi ilə başlayıb. Ulu Öndər Heydər Əliyevin və ərazi bütövlüyümüz uğrunda canlarından keçmiş şəhidlərin əziz xatirəsi bir dəqiqəlik sükutla yad edilib.

Heydər Əliyev Mərkəzində keçirilən toplantını rayon icra hakimiyyətinin başçısı Musa Şəkiliyev açaraq, Ümummilli Lider Heydər Əliyevin uzaqgörən siyasəti nəticəsində 1994-cü il sentyabrın 20-də “Əsrin müqaviləsi” kimi möhtəşəm neft müqaviləsinin imzalandığını diqqətə çatdırıb. Qeyd olunub ki, bu qlobal layihə Azərbaycanın suveren dövlət kimi öz təbii sərvətlərinə sahib çıxmaq, milli mənafelərini, iqtisadi və strateji maraqlarını müdafiə etmək əzmini bütün dünyaya göstərib, dövlət müstəqilliyinin mühüm təminatına çevrilib.

Tədbirdə rayon icra hakimiyyəti başçısının müavini - Sosial-iqtisadi inkişafın təhlili və proqnozlaşdırılması şöbəsinin müdiri Elbrus Tağıyevin mövzu ilə bağlı məruzəsi dinlənilib. Bildirilib ki, Ümummilli Lider Heydər Əliyevin müdrik rəhbərliyi, fövqəladə təşkilatçılıq bacarığı, gərgin və yorulmaz əməyi sayəsində respublikamız çox qısa bir zamanda geniş, dinamik inkişaf yoluna qədəm qoyub. Məhz Ulu Öndərin o zaman Azərbaycanı düçar olduğu iqtisadi çətinliklərdən, geriliklərdən tezliklə qurtarmaq əzmi ilə həyata keçirdiyi geniş miqyaslı tədbirlər sayəsində ölkəmiz inamla irəli getməyə, tərəqqi etməyə başlayıb.

Diqqətə çatdırılıb ki, Ümummilli Lider Heydər Əliyevin 1993-cü ildə xalqın təkidli tələbi ilə hakimiyyətə qayıdışından sonra Azərbaycanın neft-qaz sənayesində yeni bir mərhələnin əsası qoyulub. Cəmi bir il sonra - 1994-cü il sentyabrın 20-də ötən əsrin ən nəhəng və irimiqyaslı beynəlxalq neft sazişinin - Azərbaycana xoşbəxt gələcək vəd edən “Əsrin müqaviləsi”nin imzalanmasına nail olunub. Ulu Öndərin beynəlxalq aləmdə yaranmış mürəkkəb siyasi situasiyadan çox böyük məharətlə və uzaqgörənliklə lazımi nəticə çıxararaq, son dərəcə prinsipiallıq və qətiyyət göstərməklə yeganə düzgün yol seçməsi, “Əsrin müqaviləsi”nin ləngidilmədən, məhz həmin ərəfədə qəbul olunaraq, dünyanın 14 dövlətinin ən iri və nüfuzlu neft şirkətləri tərəfindən imzalanması müdrik Heydər Əliyev siyasətinin, onun dühasının böyük təntənəsi idi.

Qeyd olunub ki, “Əsrin müqaviləsi”nin imzalanması ilə Azərbaycanın qarşısında yeni üfüqlər açılıb, ölkənin ikitərəfli və çoxtərəfli münasibətlərinin davamlı inkişafı, milli-iqtisadi tərəqqi üçün əlverişli zəmin yaranıb, Azərbaycan qısa müddətdə böyük investisiyalar məkanına çevrilib. Ulu Öndər Heydər Əliyevin həyata keçirdiyi uğurlu siyasət nəticəsində ölkədə sabitliyin, təhlükəsizliyin hökm sürməsi Azərbaycanla iqtisadi əlaqələrin qurulmasında maraqlı olan dövlətlərin sayının artmasına səbəb olub və bu, imzalanan sazişlərdə, anlaşma memorandumlarında öz əksini tapıb. Avrasiyanın yeni geoiqtisadi xəritəsini müəyyənləşdirən “Əsrin müqaviləsi” yenicə müstəqillik əldə etmiş Azərbaycanın dünya birliyi ilə tərəfdaşlığının həlledici amillərindən birinə çevrilib.

Məruzəçi vurğulayıb ki, 30 illik işğala son qoyaraq Azərbaycanın ərazi bütövlüyünün və suverenliyinin bərpası ilə nəticələnən Vətən müharibəsində əldə etdiyimiz tarixi Zəfərdə də “Əsrin müqaviləsi” mühüm pay sahibidir. Neft-qaz ixracından əldə edilən gəlirlər sayəsində müasir ordu quruculuğunun həyata keçirilməsi, beynəlxalq münasibətlər sistemində haqq səsimizin davamlı olaraq eşidilməsi və işğalın aradan qaldırılması istiqamətində beynəlxalq hüquqi baza rolunu oynayan çoxsaylı qətnamələrin, qərarların, bəyanatların qəbulu buna bariz misaldır.

Toplantıda YAP Qax rayon təşkilatının sədri Natiq Allahverdiyev, Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin 19 saylı filialının müdiri Vüqar Əhmədzadə, Zaqatala Regional Qaz İstismarı İdarəsinin Qax sahəsinin rəisi Vüqar Xasıyev, Qax rayonu üzrə Maliyyə şöbəsinin rəisi Nəzir Hacıyev çıxış edərək, “Əsrin müqaviləsi”nin Azərbaycanın uzunmüddətli strateji maraqlarının, siyasi, iqtisadi mənafelərinin təmin edilməsinə, ölkəmizin dünya dövlətləri ilə qarşılıqlı əlaqələrinin dərinləşməsinə, beynəlxalq mövqelərinin möhkəmlənməsinə güclü təkan verdiyini bildiriblər. Vurğulanıb ki, əsası Ulu Öndər Heydər Əliyev tərəfindən qoyulan neft strategiyası Prezident İlham Əliyev tərəfindən uğurla davam etdirilir. Heydər Əliyevin müəllifi olduğu “Əsrin müqaviləsi” Azərbaycanı hələ uzun illər yaşadacaq və xalqımızın daha firavan həyatını təmin edəcək.

Sonda “Əsrin müqaviləsi” tarixi Zəfərimizə gedən yolun başlanğıcıdır” adlı videoçarx nümayiş olunub.