«FƏLSƏFƏ VƏ SOSİAL-SİYASİ ELMLƏR” JURNALININ İLK NÖMRƏSİ ÇAPDAN ÇIXMIŞDIR
Jurnalın Redaksiya şurasının sədri Prezidentin İcra Aparatının rəhbəri, fəlsəfə elmləri doktoru Ramiz Mehdiyev, baş redaktoru professor Səlahəddin Xəlilovdur.
Redaksiya şurası adından giriş məqaləsində vurğulanır ki, Heydər Əliyevin vəfatı təkcə siyasi həyatımız, dövlətçiliyimiz üçün deyil, həm də ideya-siyasi və fəlsəfi fikrimiz üçün böyük itkidir. Lakin əsas vəzifə onun ideyalarının hər hansı bir itkidən qorunması, bu möhtəşəm ideya dünyasının əbədiyaşarlığının təmin olunmasıdır. Hisslər, xatirələr heykəllərdə rəmzləşdiyi kimi, ideyalar, fikirlər də ictimai siyasi proseslərdə reallaşır. Bu mənada Heydər Əliyevə ən böyük abidə onun siyasi xəttinin saxlanmasıdır ki, bu da Prezident İlham Əliyevin rəhbərliyi ilə həyata keçirilməkdədir.
Jurnalda Heydər Əliyevin keçid dövründə fəlsəfi və ictimai-siyasi fikrimizin inkişafındakı xidmətləri ön plana çəkilir. Göstərilir ki, ayrıca fəlsəfi əsərlər yazmasa da, onun çıxışları dərin fəlsəfi müddəalarla, müdrik kəlamlarla zəngin idi. Təsadüfi deyil ki, Heydər Əliyevin «Aforizmlər»indən ibarət kitab ölkəmizin hüdudlarından kənarda da böyük marağa səbəb olmuşdur.
Lakin Heydər Əliyevin filosofluğu təkcə onun öz çıxışlarında ayrı-ayrı müdrik kəlamlar, fəlsəfi fikirlər işlətməsi ilə məhdudlaşmırdı. Onun deyilməmiş, yazılmamış bütöv fəlsəfi sistemi vardır. Heydər Əliyevin çox müxtəlif sahələrə dair söylədiyi fikirlər, əslində, dərin qatlardakı vahid konsepsiyanın ayrı-ayrı təzahürləridir. Bu konsepsiya Azərbaycanın milli ideologiyasıdır, müasir azərbaycanlının sosial idealı, milli-fəlsəfi dünyagörüşüdür, Azərbaycan gerçəkliyini, onun ictimai-siyasi və mədəni-mənəvi həyatının bütün sahələrini əks etdirən mükəmməl elmi-nəzəri bir sistemdir. Bizim borcumuz onun söylədiyi fikirləri və əməli fəaliyyətini nəzəri təfəkkür səviyyəsində təhlil etməklə, bu konseptual sistemin təməllərini üzə çıxarmaqdır.
Jurnalın bu nömrəsində fəlsəfə elmləri doktoru, professor Ramiz Mehdiyevin «Heydər Əliyev kursu: ideya-siyasi və milli-mənəvi amillər», tarix elmləri doktoru Əli Həsənovun «Heydər Əliyev şəxsiyyəti: xarizmatik liderin səciyyəvi cəhətləri», professor Səlahəddin Xəlilovun «İdeya dünyasının əbədiyyəti» məqalələrində Heydər Əliyev irsi fəlsəfi və ideoloji aspektlərdə təhlil edilir və onun ideyalarının müasir mərhələ üçün əhəmiyyətindən bəhs olunur.
Bu nömrədə, həmçinin, AMEA-nın Fəlsəfə və Hüquqi-Siyasi Tədqiqatlar İnstitutunun direktoru, professor Yusif Rüstəmovun, Milli Məclisin deputatı, BDU-nun dosenti Rəbiyyət Aslanovanın, Bakı Slavyan Universitetinin dosenti Etibar Nəcəfovun, Azərbaycan Dövlət İqtisad Universitetinin dosenti Zakir Məmmədəliyevin və başqalarının müasir ictimai-siyasi fikrin aktual problemlərinə dair məqalələri dərc olunmuşdur. Oxucular bu yaxınlarda İstanbulda keçirilmiş Türk dünyası sosioloqlarının toplantısı haqqında geniş məlumatla, Nobel mükafatı laureatı Əbdüs Salamın «Elm və İslam» əsərinin Azərbaycan dilinə tərcüməsi ilə də tanış ola biləcəklər.
Tənqid və biblioqrafiya bölməsində bir daha Heydər Əliyev irsinə müraciət edilmiş, Sona Vəliyevanın «Heydər Əliyev və azərbaycançılıq məfkurəsi» kitabı haqqındakı məqaləsində Heydər Əliyevin milli-mənəvi dəyərlərimizlə bağlı ideyaları geniş təhlil olunmuş kitabın Azərbaycanda milli şüurun inkişafında xüsusi rolu vurğulanır.
Bölmənin digər xəbərləri
