REGİONLAR
FERMERLƏRİN PROBLEMLƏRİ ÖYRƏNİLMİŞ, TƏKLİFLƏRİ ÜMUMİLƏŞDİRİLMİŞDİR
Azərbaycan Marketinq Cəmiyyətindən AZƏRTAC-ın müxbirinə bildirmişlər ki, “Azərbaycan Respublikası regionlarının sosial-iqtisadi inkişafı Dövlət Proqramı”nın qəbulundan sonra fermerlərin problemlərini öyrənmək və çatışmazlıqlar barədə dövlət orqanları və qeyri-hökumət təşkilatlarını məlumatlandırmaq məqsədi İlə ölkəmizin cənub bölgəsində marketinq tədqiqatları aparılmışdır. Araşdırmalar 12 kənd və 2 qəsəbəni əhatə etmişdir. Problemlər sırasında elektrik enerjisinin fasilələrlə verilməsi və onun tarifinin yüksəkliyi, maliyyə çətinlikləri, satış yerlərinin qənaətbəxş olmaması, vergi orqanları ilə anlaşılmazlıq və sair göstərilmişdir.
Fermerlər sahənin inkişaf etdirilməsi üçün bazara çıxarılmış yerli və xarici məhsulların keyfiyyətinə nəzarətin gücləndirilməsi, daxili bazara dövlət qayğısının artırılması, istehsalın genişləndirilməsinə dövlət və xarici sərmayələrin cəlb edilməsi, güzəştli və uzunmüddətli kreditlərin tətbiq olunması, ixrac edilən məhsul üçün gömrük rüsumlarının azaldılması, regionlarda soyuducu anbarların tikilməsi kimi səmərəli təkliflər vermişlər.