Fidan Hacıyeva: Gənc musiqiçilərin konsertləri həmişə böyük uğur qazanır
Bakı, 8 dekabr, Anara Axundova, AZƏRTAC
Fidan Hacıyevanın Vokal Musiqi Məktəbinin Belcanto konsert zalında istedadlı gənc pianoçu Çarlz Emin Neylorun solo konserti keçirilib. Konsertdə Azərbaycanın Xalq artisti Fidan Hacıyeva da iştirak edib.
AZƏRTAC xəbər verir ki, proqramda Azərbaycan və dünya bəstəkarlarının klassik musiqiləri səsləndirilib. Gənc istedadların konsertləri Fidan Hacıyevanın məktəbində mütəmadi olaraq təşkil olunur və gələcək musiqiçilərin formalaşmasının mühüm tərkib hissəsidir.
Xalq artisti AZƏRTAC-ın müxbiri ilə söhbətində uşaqların və gənclərin musiqiyə cəlb edilməsinin böyük əhəmiyyət daşıdığını bildirib.
“Hər şey ailədən başlayır. Valideynlər evdə klassik və xalq musiqisinə qulaq asmalıdır ki, uşaqlar bu musiqiyə alışsın və onu mənimsəsin. Mən hər kəsə uşaqlarını mütləq musiqi məktəbinə yazdırmağı tövsiyə edirəm. Musiqi uşağın düzgün və harmonik inkişafına kömək edir.
Musiqi ilə məşğul olan uşaqlar və gənclər səhnəyə çıxarılmalı, onların auditoriya qarşısında çıxış etməsinə imkan yaradılmalıdır. Mən məktəbimdə uşaqların iştirakı ilə mütəmadi konsertlər keçirirəm. Burada elə bir mühit yaratmışıq ki, uşaqlar səhnədən çəkinməsin və səhnəyə çıxmaqdan zövq alsınlar.
Gənc musiqiçilərin konsertləri həmişə böyük maraqla qarşılanır. Bu konsertlərə həm uşaqlar, həm böyüklər, həm Bakı sakinləri, həm də şəhərin qonaqları gəlirlər. Biz öz xor kollektivimizi yaratmışıq. Onun adı “Mezzo”dur. Artıq bir neçə ildir ki, İsveç səfirliyində Santa Luçiya bayramında çıxış edirik. Bu il də çıxış edəcəyik. Dekabrın 23-də isə Beynəlxalq Muğam Mərkəzində bütün şagirdlərimizin iştirak edəcəyi konsert keçirəcəyik.
Uşağa sevdiyi əsərləri ifa etməyə icazə vermək çox vacibdir. Məhz bundan başlamaq lazımdır. Daha sonra isə daha mürəkkəb əsərlərə keçmək olar. Hər şey sevgi ilə edilməlidir. Çünki söhbət uşaqlardan gedir. Onları, ilk növbədə, sevmək lazımdır. Əvvəlcə pedaqoq yox, dost olmaq gərəkdir”, - deyə xalq artisti qeyd edib.
Gecənin solisti, 12 yaşlı Çarlz Neylor AZƏRTAC-ın müxbiri ilə söhbətində ilk solo konsertindən əvvəl həyəcan keçirdiyini bildirib. “Eyni zamanda, bilirəm ki, bunun öhdəsindən gələcəyəm. Yeddi əsər ifa edəcəyəm və ən sevdiyim isə Şopenin 20 nömrəli Noktyurnudur. Bu konsert mənim üçün çox vacibdir, çünki həm ifamdakı, həm də səhnə hisslərimdəki inkişafı görməyə imkan verəcək. Bu inkişafı hiss etdikdə özümü xoşbəxt hiss edirəm”, – deyə gənc musiqiçi əlavə edib.
Fidan Hacıyeva isə gecə ərzində Üzeyir Hacıbəylinin “Sevgili canan” əsərini, eləcə də “Historia de un Amor”, “My Way” və “Caruso” mahnılarını ifa edib.
Bölmənin digər xəbərləri
