FİFA DÜNYA BİRİNCİLİYİ MATÇLARINI İDARƏEDƏCƏK HAKİMLƏRİ MÜƏYYƏNLƏŞDİRİR
AZƏRTAC-ın xüsusi müxbiri 2006-cı ildə Almaniyada keçiriləcək futbol üzrə dünya birinciliyi təşkilat komitəsinin KİV-lərdə dərc edilən son məlumatına istinadla xəbər verir ki, FİFA-nın Hakimlər Komissiyası oktyabrın 25-də Sürixdə keçirdiyi toplantıda 2006-cı il dünya birinciliyi matçlarına hakimlik etməyə namizəd göstərilən 44 bitərəf və 111 assistent referinin siyahısını təsdiq etmişdir. Hakimlərin adları yaxın vaxtlarda elan olunacaq. Hakimliyə namizədlərin siyahısına Avropadan - 17, Cənubi Amerikadan - 7, Asiyadan - 6, Afrikadan - 6, Şimali və Mərkəzi Amerika və Atlantik okeanı regionundan - 6, Okeaniyadan - 2 namizəd salınmışdır.
Hakimliyə namizəd göstərilən 155 nəfər referi FİFA-nın 2006-cı ilin mart ayında Frankfurt şəhərində keçirəcəyi seçmə test-sınaq yoxlamalarına cəlb olunacaqdır. Sağlamlıq və psixoloji sınaq test yoxlamalarından uğurla çıxanların arasından 30 referi və onların assistentləri müəyyən edilərək dünya birinciliyinin təşkilat komitəsinin sərəncamına veriləcəkdir.
Bölmənin digər xəbərləri
