Finlandiyada yaşamaq üçün icazə ilə bağlı müraciətlərin sayı azalıb
Stokholm, 25 noyabr, Nərgiz Cəfərli, AZƏRTAC
Finlandiya Miqrasiya Agentliyi (Migri) iş, təhsil və sığınacaq məqsədləri üçün yaşayış icazəsi üçün müraciətlərin sayında əhəmiyyətli azalma olduğunu bildirir.
AZƏRTAC xəbər verir ki, “Migri” bu ilin yanvar-oktyabr aylarında iş icazəsi üçün müraciətlərin sayı ötən illə müqayisədə 29 faiz azalaraq təxminən 11 min nəfər təşkil etdiyini qeyd edir. Azalmaya səbəb kimi ölkədəki zəif iqtisadi artım göstərilir.
Əcnəbi tələbələrdən müraciətlərin sayı da azalıb. Bu il 11 839 müraciət təqdim edilib ki, bu da əvvəlki illə müqayisədə 5 faiz azdır. “Migri” ehtimal edir ki, bu il tətbiq edilən 100 avro miqdarında tələbə rüsumu, eləcə də yüksək təhsil haqları abituriyentləri Finlandiyada təhsildən çəkindirmiş ola bilər.
Digər Avropa İttifaqı ölkələrindəki kimi, Finlandiyada da sığınacaqla bağlı müraciətlərdə azalma tendensiyası müşahidə edir.
Yanvar-oktyabr aylarında ilkin müraciətlərin sayı 1709-a düşüb, bu da bir il əvvəlkindən 15 faiz azdır.
“Migri”nin qiymətləndirməsinə görə, bu, həm Dəməşqdə hakimiyyət dəyişikliyindən sonra suriyalı müraciət edənlərin sayının azalması, həm də Aİ ölkələrinə girişin sərtləşdirilməsi ilə əlaqədardır.
Bölmənin digər xəbərləri
