Fintex sektorunda yeni mərhələ: Edqar Abdullayev Assosiasiya sədri seçildi
Oktyabrın 28-də Azərbaycan Fintex Assosiasiyasının (AzFina) Ümumi Yığıncağında Mərkəzi Bankın nümayəndələrinin iştirakı ilə keçirilən şəffaf və anonim seçki prosesi nəticəsində Azərbaycanın ilk lisenziyalı elektron pul təşkilatı olan “United Payment” MMC-nin Baş İcraçı direktoru Edqar Abdullayev Azərbaycan Fintex Assosiasiyasının (AzFina) İdarə Heyətinin sədri seçilib.
Edqar Abdullayev maliyyə texnologiyaları sahəsində 18 ildən çox peşəkar və strateji liderlik təcrübəsinə malikdir. O, 10 il telekommunikasiya və innovasiya sahəsində, ardınca isə 8 ildən artıq müddətdə bank və fintex sektorunda strateji transformasiya layihələrinə rəhbərlik edərək, ölkənin rəqəmsal inkişafında mühüm rol oynayıb. Hazırda rəhbərlik etdiyi “United Payment” MMC 2021-ci ildən təsis edilib və ölkədə açıq bankçılıq, elektron pul, ödəniş aqreqasiyası, beynəlxalq rəqəmsal ödənişlər, həmçinin lisenziyalı fintex xidmətlərinin inkişafında öncül rol oynayır.
AzFina yeni rəhbərlik dövründə aşağıdakı strateji hədəflərə fokuslanmağı planlaşdırır:
• Fintex şirkətləri ilə requlyatorlar (Mərkəzi Bank və digər nəzarət orqanları) arasında daha şəffaf və səmərəli əməkdaşlıq mühiti qurmaq;
• Assosiasiyanın beynəlxalq nüfuzunu artırmaq və qlobal layihələrdə yerli fintexlərin iştirakını təmin etmək;
• Üzv bazasını genişləndirərək ölkədə rəqəmsal ödəniş xidmətlərinin koordinasiyalı inkişafına təkan vermək;
• Kiçik və orta sahibkarlıq (KOB) subyektləri üçün sərfəli və innovativ fintex həllərini təşviq etmək;
• İstehlakçılar üçün təhlükəsiz, innovativ və requlyator tələblərə uyğun məhsul və xidmətlərin təqdim olunmasına dəstək vermək.
Bu təyinatla bağlı danışan Edqar Abdullayev bildirib: “Ölkəmizin maliyyə ekosistemində kifayət qədər vacib rol oynayan lisenziyalı fintex təşkilatlarının etimadını doğrultmaq istiqamətində var gücümüzlə çalışacaq və bütün resurslarımızı səfərbər edəcəyik. Qarşıdakı dövrdə həm yerli bazarda, həm də beynəlxalq platformalarda daha çevik, şəffaf, dayanıqlı və innovativ fintex ekosistemi qurmaq əsas prioritetimiz olacaq”.
Assosiasiyanın üzv təşkilatlarının iştirakı ilə keçirilən səsvermə nəticəsində İdarə Heyətinin sədri Edqar Abdullayev (“United Payment Azerbaijan”) ilə yanaşı, sədrin müavini olaraq Eynar Abdullayev (“GoldenPay OJSC”) seçilib.
İdarə Heyətinin üzvlüyünə Zeynal Kərimzadə (“Epoint.az”), İqbal Rüstəmov (“PashaPay”) və Rasim Həmmədov (“Expresspay”) təyin edilib.
Həmçinin Nəzarət-təftiş komissiyasının üzvləri isə Mehriban Əlizadə (“PulPal” – onlayn ödəniş sistemi), Valeriya Qəniyeva (“Max Systems LLC”) və Murad Mirzə (akart.az) olmuşdur.
Qeyd edək ki, Azərbaycan Fintex Assosiasiyası hazırda ölkədə Mərkəzi Bankla birgə açıq bankçılıq platformasının genişlənməsi, rəqəmsal ödəniş alətlərinin inkişafı ilə ödəniş xidmətlərinin rəqəmsallaşması, maliyyə inklüzivliyinin artırılması və elektron pul tənzimləmələri çərçivəsində aparıcı sektor platformasına çevrilməkdədir.
Bölmənin digər xəbərləri
