FÖVQƏLADƏ HALLAR NAZİRLİYİ MÜLKİ MÜDAFİƏ TEXNİKASINA BAXIŞ KEÇİRMİŞDİR
Əvvəlcə, Azərbaycan Respublikasının dövlət himni səslənmişdir.
Fövqəladə hallar naziri Kəmaləddin Heydərov tədbirin iştirakçılarını bayram münasibətilə təbrik etmiş, Beynəlxalq Mülki Müdafiə Təşkilatı (BMMT) haqqında qısa məlumat vermişdir. Bildirilmişdir ki, BMMT fəaliyyətini insanın əsas hüquqlarından olan təhlükəsizliyini təmin etməyə yönəldir, ayrı-ayrı xilasetmə qüvvələrinin işinin əlaqələndirilməsini təşkilata daxil olan bütün dövlətlər arasında əməkdaşlığı təşkil edir. Natiq bu gün nümayiş etdirilən müasir mülki müdafiə avadanlığının, texnikanın ölkəmizə gətirilməsini ümummilli lider Heydər Əliyevin bu sahəyə göstərdiyi diqqət və qayğının bariz nümunəsi olduğunu vurğulamışdır. O, Prezident İlham Əliyevin diqqəti sayəsində bir sıra bölgələrdə qəza-xilasetmə dəstələrinin yaradıldığını, bu qurumların baş verə biləcək təbii və texnogen qəzalar zamanı əhalinin və ərazinin mühafizəsinə daim hazır olduğunu nəzərə çarpdırmışdır. K.Heydərov ölkə başçısının təşəbbüsü ilə respublika ərazisində fövqəladə halların qarşısının alınması və nəticələrinin aradan qaldırılmasında çevikliyin təmin edilməsi məqsədi ilə Naxçıvan Muxtar Respublikasında qəza-xilasetmə taburunun, Lənkəran və Şəkidə qəza-xilasetmə dəstələrinin yaradıldığını, onların lazımi avadanlıq və texnika ilə təmin edildiyini söyləmişdir. Prezident İlham Əliyevin Naxçıvan MR-də qəza-xilasetmə taburunun açılışında iştrak etdiyini vurğulayan nazir, mülki müdafiə qəza-xilasetmə dəstələrinin bu müasir texniki təminatla yalnız respublikamızda deyil, digər ölkələrdə də baş verə biləcək təbii fəlakətlərin nəticələrini aradan qaldırmağa qadir olduğunu bildirmişdir.
Nərimanov Rayon İcra Hakimiyyətinin başçısı Abdin Fərzəliyev tədbirin iştirakçılarını bayram münasibətilə təbrik etmiş, ölkəmizdə fövqəladə halların qarşısının alınması istiqamətində görülən tədbirləri alqışlamışdır.
Sonra nazir K.Heydərov müasir mülki müdafiə avadanlığının, yanğından mühafizə qurğularının texniki xüsusiyyətləri ilə maraqlanmış, tövsiyələrini vermişdır.
