Fransada Azərbaycan Xalq Cümhuriyyətinin 100 illiyinə həsr olunmuş festival keçiriləcək
Bakı, 30 aprel, AZƏRTAC
Fransada mayın 14-dən 17-dək pianoçuların Adilə Əliyevanın adını daşıyan 12-ci Beynəlxalq Festivalı keçiriləcək.
Diasporla İş üzrə Dövlət Komitəsinin mətbuat xidmətindən AZƏRTAC-a bildiriblər ki, festival Azərbaycan Xalq Cümhuriyyətinin 100-cü ildönümünə həsr olunub. Fransada yaşayan soydaşımız Adilə Əliyeva adına beynəlxalq musiqi müsabiqəsinin keçirilməsi ənənə halını alıb və Avropanın, həmçinin ABŞ-ın musiqi ictimaiyyətinin böyük marağına səbəb olub.
İndiyədək bu müsabiqənin qalibləri Doyçe qramofon, Soni, Fransa radiosu, Nyu-York filarmoniyasının orkestri, Karneqi holl və digər bu kimi nüfuzlu yerlərdən, İngiltərə, Almaniya və Avstriyadan dəvətlər alıb, Parisdə ödənişsiz təhsil almaq imkanı qazanıb və yaxşı təqaüdlə təmin olunublar.
Uzun illərdir Fransada keçirilən müsabiqə öz imkanları çərçivəsində, Azərbaycan da daxil olmaqla dünyanın müxtəlif ölkələrindən olan istedadları üzə çıxarır, onları tanıdır və gənc musiqiçiləri musiqi təhsilini inkişaf etdirməyə şərait yaradır.
Qeyd edək ki, pianoçuların 11-ci beynəlxalq müsabiqəsi ötən ilin may ayında Cenevrə şəhərində keçirilib. Azərbaycanın Əməkdar Artisti A.Əliyeva Fransa Ali Beynəlxalq Musiqi Akademiyasının direktorudur. Hazırda Fransada yaşayan musiqiçi Bakı şəhərində anadan olub, sonradan Moskvaya köçərək bu şəhərdə Çaykovski adına Konservatoriyanı bitirib. 25 ilə yaxındır ki, Fransada yaşayan A.Əliyeva 50-dən çox ölkənin konsert salonlarında çıxış edib, 30-dan çox disk buraxıb. Adilə Əliyeva hər il Azərbaycanın ali və orta musiqi məktəblərinə ustad-dərsləri verir.
Bölmənin digər xəbərləri
