Fransada deputatlar 2026-cı ilin büdcə layihəsini rədd ediblər
Paris, 24 noyabr, AZƏRTAC
Fransa Milli Assambleyasında gələn ilin maliyyə qanunvericiliyi rədd edilib və bu, hökuməti çətin siyasi vəziyyətə salıb.
AZƏRTAC xəbər verir ki, gəlirlərlə bağlı təklifin rədd edilməsi (404 əleyhinə, 84 bitərəf və yalnız bir səs lehinə) xərclər üzrə də müzakirələrin aparılmadan rəddinə səbəb olub.
Bundan sonra, qanun layihəsi növbəti dəfə senata göndərilib və noyabrın 26-da yenidən müzakirələrə başlanılacaq. Bildirilir ki, senatda qeydə alınacaq uğursuz nəticə "xüsusi qanun"un qəbuluna səbəb olacaq ki, bu da maliyyə davamlılığının təmin edilməsi üçün nəzərdə tutulur. Sebastien Lecornu bu ssenarini istisna edir.
2026-cı ilin sonuna qədər mətnin qəbul edilməsi hələ də qeyri-müəyyəndir, çünki büdcə böhranı davam edir. Sağçıların tərəfdarı olan senat bu layihəni dəyişdirə və ya bloklaya bilər. Bu rəddetmə Fransanın büdcə vəziyyətinin gərgin olduğu bir dövrə təsadüf edir.
2024-cü ildə dövlət büdcəsinin kəsiri ÜDM-nin 5,8 faizini, yəni 168,6 milyard avro təşkil edib. Bu da ilkin proqnozlardan yüksək olub. Dövlət borcu isə ÜDM-nin 113,2 faizinə çatıb və artmağa davam edir. Hökumət vergi tədbirləri, qənaətlər sayəsində 2026-cı il üçün büdcə kəsirini 4,7 faizə qədər azaltmağı və maliyyə vəziyyətini stabilləşdirməyi planlaşdırır. Lakin bir neçə təşkilat bu proqnozları zəif hesab edir.
2025-ci ilin sentyabrında “Fitch” beynəlxalq reytinq agentliyi Fransanın kredit reytinqini “A+” səviyyəsinə endirib, yüksək borc və büdcə ilə bağlı davam edən qeyri-müəyyənliyi vurğulayıb. Oktyabrda isə “Moody’s” agentliyi reytinqi sabit saxlayıb, amma gələcək proqnozunun neqativ olduğunu, siyasi sabitlik və vergi inamı ilə bağlı artan riskləri qeyd edib.
Bölmənin digər xəbərləri
